ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠣᠶᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠱᠠᠩᠰᠢ ᠶᠢᠨ ᠰᠢᠳᠦᠯᠭᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/11/6
    ᠱᠠᠩᠰᠢ ᠨᠢ ᠬᠤᠷᠴᠢᠨᠴᠣᠳ ᠲᠤ ᠠᠶᠢᠯ ᠲᠣᠰᠬᠤᠨ ᠤ ᠬᠢᠨ ᠦᠮᠦᠭ ᠲᠦᠰᠢᠭ ᠡᠵᠡᠳ ᠰᠠᠬᠢᠭᠤᠰᠣ ᠪᠠᠷ ᠦᠵᠡᠭᠳᠡᠵᠦ ᠪᠠᠶᠢᠬᠰᠠᠨ ᠠᠴᠠ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠪᠠᠨ ᠲᠡᠳᠡ ᠶᠡᠭᠡ ᠪᠠᠷ ᠬᠦᠨᠳᠦᠳᠭᠡᠳᠡᠭ ᠪᠠᠶᠢᠵᠠᠢ᠃  ᠱᠠᠩᠰᠢ ᠶᠢᠨ ᠮᠤᠳᠦ ᠶᠢᠨ ᠤᠯᠠᠩᠬᠢ ᠨᠢ ᠬᠠᠶᠢᠯᠠᠰᠤᠨ ᠮᠤᠳᠦ ᠪᠤᠯᠪᠠᠴᠤ ᠵᠠᠷᠢᠮ ᠭᠠᠵᠠᠷ ᠤᠨ ᠬᠢᠨ ᠤᠳᠠ ᠪᠠ ᠪᠤᠰᠤᠳ ᠲᠦᠷᠦᠯ ᠤᠨ ᠮᠤᠳᠦ ᠪᠠᠷ ᠴᠦ ᠱᠠᠩᠰᠢ ᠪᠤᠯᠭᠠᠳᠠᠭ ᠴᠦ ᠪᠤᠢ᠃ ᠱᠠᠩᠰᠢ ᠲᠠᠬᠢᠬᠤ ᠡᠳᠦᠷ ᠪᠣᠯᠬᠤ ᠲᠠᠢ ᠵᠡᠷᠭᠡ ᠠᠶᠢᠯ ᠲᠣᠰᠬᠤᠨ ᠤ ᠡᠷᠡᠭᠳᠡᠶᠢᠴᠣᠳ ᠱᠠᠩᠰᠢ ᠶᠢᠨ ᠮᠣᠳᠣᠨ ᠲᠣᠣᠷ᠎ᠠ ᠪᠠᠨ ᠴᠣᠬᠯᠠᠷᠠᠯᠳᠣᠵᠦ ᠲᠠᠬᠢᠯᠭ᠎ᠠ ᠶᠢᠨ ᠠᠵᠢᠯ ᠢᠶᠠᠨ ᠡᠬᠢᠯᠡᠭᠦᠯᠳᠡᠭ᠃ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ︽ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠪᠠᠭᠤᠯᠭᠠᠬᠤ  ᠶᠣᠰᠣᠨ︾᠂ ︽ᠱᠠᠩᠰᠢ ᠡᠷᠭᠢᠬᠦ ᠶᠣᠰᠣᠨ︾᠂ ︽ᠱᠠᠩᠰᠢ ᠳᠤ ᠰᠢᠭᠦᠰᠦ ᠡᠷᠭᠦᠬᠦ ᠶᠣᠰᠣᠨ︾᠂ ︽ᠱᠠᠩᠰᠢ  ᠪᠠᠶᠠᠰᠬᠠᠬᠤ ᠶᠣᠰᠣᠨ︾ ᠭᠡᠵᠦ ᠪᠠᠶᠢᠳᠠᠬ᠃               ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠪᠠᠭᠤᠯᠭᠠᠬᠤ ᠶᠣᠰᠣᠨ         ᠬᠤᠷᠴᠢᠨᠴᠣᠳ ᠤᠨ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠨᠢ ᠦᠨᠡᠨ ᠳᠡᠭᠡᠨ᠂ ᠬᠤᠷᠴᠢᠨ ᠤ ᠪᠦᠭᠡ ᠶᠢᠨ ᠱᠠᠰᠢᠨ ᠤ ᠵᠠᠩ ᠦᠢᠯᠡ᠂ ᠣᠯᠠᠮᠵᠢᠯᠠᠯᠳᠦ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠲᠠᠢ ᠨᠢᠬᠳᠠ ᠣᠶᠠᠯᠳᠣᠵᠦ ᠬᠤᠯᠪᠣᠯᠳᠣᠬᠰᠠᠨ ᠲᠠᠬᠢᠯᠭ᠎ᠠ ᠪᠣᠯᠣᠨ᠎ᠠ᠃ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠡᠮᠡᠭᠳᠡᠢ ᠬᠦᠮᠦᠨ ᠣᠷᠣᠯᠴᠠᠬᠤ ᠶᠣᠰᠣ ᠪᠠᠶᠢᠳᠠᠬ ᠦᠭᠡᠢ᠃ ᠬᠤᠷᠴᠢᠨᠴᠣᠳ ᠱᠠᠩᠰᠢ ᠶᠢᠨ ᠮᠣᠳᠣ ᠪᠠᠨ ᠲᠠᠬᠢᠬᠤ ᠳᠠᠭᠠᠨ ᠲᠣᠷ᠎ᠠ ᠶᠢᠨ ᠨᠢᠭᠡ ᠡᠳᠦᠷ ᠰᠣᠩᠭᠤᠭᠠᠳ ᠶᠠᠪᠣᠬᠳᠠᠭᠤᠯᠬᠤ ᠪᠢᠰᠢ ᠵᠠᠪᠠᠯ ᠬᠠᠷ᠎ᠠ᠂ ᠬᠠᠷᠠᠬᠴᠢᠨ᠂ ᠬᠦᠬᠡ᠂ ᠬᠦᠭᠡᠭᠴᠢᠨ ᠡᠳᠦᠷ ᠢ ᠰᠢᠯᠢᠵᠦ ᠯᠣᠣ᠂ ᠮᠣᠭᠠᠢ ᠡᠳᠦᠷ ᠢ ᠰᠣᠩᠭᠤᠨ᠎ᠠ ᠭᠡᠳᠡᠭ᠃ ᠬᠡᠷᠪᠡ ᠡᠳᠦᠷ ᠤᠨ ᠦᠡᠭᠭᠡ ᠪᠣᠯᠣᠨ ᠡᠳᠦᠷ ᠤᠨ ᠡᠷᠬᠡᠰ ᠨᠢ ᠲᠠᠭᠠᠷᠠᠬᠤ ᠦᠭᠡᠢ ᠪᠣᠯ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠨᠢ ᠮᠣᠳᠣᠨ ᠳᠠᠭᠠᠨ ᠪᠠᠭᠤᠬᠤ ᠳᠤ ᠬᠠᠷᠰᠢ ᠲᠣᠬᠢᠶᠠᠯᠳᠣᠳᠠᠬ ᠠᠴᠠ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠬᠢᠯᠢᠩᠨᠡᠵᠦ ᠲᠡᠭᠡᠳᠦ ᠲᠡᠭᠷᠢ ᠠᠴᠠ ᠪᠣᠷᠣᠭᠠᠨ ᠬᠤᠷ᠎ᠠ ᠭᠤᠶᠣᠵᠦ ᠦᠭᠬᠦ ᠦᠭᠡᠢ ᠪᠣᠯᠳᠠᠬ ᠠᠴᠠ ᠬᠡᠴᠢᠨᠡᠬᠡᠨ ᠵᠠᠯᠪᠠᠷᠢᠬᠰᠠᠨ ᠴᠦ ᠲᠣᠰᠠ ᠦᠭᠡᠢ ᠶᠣᠮ ᠭᠡᠨ᠎ᠡ᠃ ᠡᠭᠦᠨ ᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠬᠠᠷ᠎ᠠ᠂ ᠬᠠᠷᠠᠬᠴᠢᠨ ᠨᠢ ᠮᠣᠩᠭᠤᠯ ᠤᠨ  ᠣᠯᠠᠮᠵᠢᠯᠠᠯᠳᠦ ᠵᠢᠷᠣᠬᠠᠢ ᠶᠢᠨ ᠲᠠᠪᠣᠨ ᠮᠠᠬᠠᠪᠣᠳ ᠤᠨ ᠶᠣᠰᠣᠨ ᠳᠤ ᠣᠰᠣ ᠶᠢ ᠲᠦᠯᠦᠭᠡᠯᠡᠵᠦ᠂ ᠬᠦᠬᠡ᠂ ᠬᠦᠭᠡᠭᠴᠢᠨ ᠨᠢ ᠮᠣᠳᠣ ᠶᠢ ᠲᠦᠯᠦᠭᠡᠯᠡᠳᠡᠭ ᠶᠣᠮ᠃ ᠬᠤᠷᠴᠢᠨ ᠳᠤ ᠪᠠᠰᠠ ︿ᠯᠣᠣ᠂ ᠮᠣᠭᠠᠢ ᠨᠢ ᠯᠣᠣᠰ ᠤᠨ ᠡᠵᠡᠳ᠂ ᠪᠣᠷᠣᠭᠠᠨ ᠤ ᠰᠠᠬᠢᠭᠤᠰᠣ﹀ ᠭᠡᠵᠦ ᠶᠠᠷᠢᠳᠠᠬ ᠠᠴᠠ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠨᠢ ᠬᠦᠭᠡᠭᠴᠢᠨ ᠯᠣᠣ᠂ ᠬᠦᠭᠡᠭᠴᠢᠨ ᠮᠣᠭᠠᠢ ᠡᠳᠦᠷ ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠠᠭᠠᠨ ᠠᠮᠠᠷᠬᠠᠨ ᠵᠠᠯᠠᠷᠠᠨ ᠪᠠᠭᠤᠵᠦ᠂ ᠬᠠᠷᠠᠬᠴᠢᠨ ᠯᠣᠣ᠂ ᠬᠠᠷᠠᠬᠴᠢᠨ ᠮᠣᠭᠠᠢ ᠡᠳᠦᠷ ᠯᠣᠣᠰ ᠤᠨ ᠡᠵᠡᠳ ᠲᠠᠢ ᠰᠠᠨᠠᠭ᠎ᠠ ᠪᠠᠨ ᠲᠦᠷᠭᠡᠨ ᠣᠯᠣᠯᠴᠠᠵᠦ ᠲᠡᠶᠢᠯᠦᠨ᠎ᠡ ᠭᠡᠵᠦ ᠰᠡᠳᠭᠢᠭᠰᠡᠨ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ᠃ ᠡᠳᠦᠷ ᠤᠨ ᠦᠡᠭᠭᠡ ᠨᠢ ᠲᠠᠭᠠᠷᠠᠪᠠᠯ ᠮᠣᠷᠢ ᠬᠤᠨᠢᠨ ᠡᠳᠦᠷ ᠢ ᠪᠠᠰᠠ ᠰᠣᠩᠭᠤᠵᠦ ᠪᠣᠯᠣᠨ᠎ᠠ ᠭᠡᠳᠡᠭ ᠃ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢ ᠵᠠᠷᠢᠮ ᠨᠣᠳᠤᠬ ᠤᠨ ᠬᠢᠨ ᠲᠣᠬᠳᠠᠬᠰᠠᠨ ᠡᠳᠦᠷ ᠭᠠᠷᠭᠠᠵᠦ ᠶᠠᠪᠣᠬᠳᠠᠭᠤᠯᠳᠠᠬ᠃ ᠮᠠᠨ ᠤ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠵᠠᠷᠢᠮ ᠭᠠᠵᠠᠷ ᠲᠤ ᠪᠢᠯᠢᠭ ᠤᠨ ᠣᠯᠠᠷᠢᠯ ᠤᠨ ᠲᠠᠪᠣᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠢ ᠰᠣᠩᠭᠤᠵᠦ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠪᠠᠨ ᠶᠠᠪᠣᠬᠳᠠᠭᠤᠯᠳᠠᠬ ᠶᠣᠮ︾ ᠭᠡᠪᠡ᠃          ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠪᠠᠭᠤᠯᠭᠠᠬᠤ ᠶᠣᠰᠣ ᠭᠡᠳᠡᠭ ᠨᠢ ᠱᠠᠩᠰᠢ ᠲᠠᠬᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠠᠶᠢᠯ ᠲᠣᠰᠬᠤᠨ ᠤ ᠬᠢᠨ ᠯᠠᠮᠠ ᠪᠣᠶᠣ ᠪᠦᠬᠡ ᠵᠠᠯᠠᠵᠦ ᠨᠣᠮ ᠲᠠᠷᠨᠢ ᠣᠡᠭᠰᠢᠭᠤᠯᠵᠦ ᠪᠠᠶᠢᠭᠠᠳ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠢ  ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠤᠨᠢ ᠵᠠᠯᠠᠵᠦ ᠪᠠᠭᠤᠯᠭᠠᠬᠤ ᠶᠢ ᠬᠡᠯᠡᠳᠡᠭ᠃ ᠱᠠᠩᠰᠢ ᠪᠠᠭᠤᠯᠭᠠᠬᠤ ᠶᠣᠰᠣᠨ ᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠮᠣᠩᠭᠤᠯᠴᠣᠳ ᠡᠷᠳᠡ ᠲᠡᠭᠡᠳᠦ ᠦᠶ᠎ᠡ ᠳᠤ ᠪᠦᠭᠡ ᠶᠢᠨ ᠱᠠᠰᠢᠨ ᠢ ᠰᠢᠳᠦᠵᠦ ᠪᠠᠶᠢᠬᠰᠠᠨ  ᠪᠤᠯᠬᠤᠷ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠨᠢ ᠬᠤᠷᠴᠢᠨ ᠨᠣᠳᠤᠬ ᠲᠤ ᠣᠯᠠᠮᠵᠢᠯᠠᠬᠳᠠᠨ ᠣᠷᠣᠵᠦ ᠢᠷᠡᠬᠦ ᠠᠴᠠ ᠡᠮᠦᠨ᠎ᠡ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠪᠠᠭᠤᠯᠭᠠᠬᠤ ᠠᠵᠢᠯ ᠢ ᠪᠦᠭᠡ ᠨᠠᠷ ᠬᠦᠢᠴᠡᠳᠭᠡᠵᠦ ᠪᠠᠶᠢᠬᠰᠠᠨ ᠨᠢ ᠯᠠᠪᠳᠠᠢ᠃ ᠪᠦᠭᠡ  ᠢᠳᠣᠭᠠᠨ ᠨᠠᠷ ᠤᠨ ᠣᠡᠭᠭᠤᠳ ᠰᠢᠳᠦᠭᠡᠨ ᠨᠢ ᠢᠮᠠᠬᠳᠠ ᠬᠡᠭᠡᠷ᠎ᠡ ᠭᠠᠳᠠᠨ᠎ᠠ ᠭᠠᠭᠴᠠ ᠮᠣᠳᠣᠨ ᠳᠤ ᠰᠠᠭᠤᠳᠠᠬ ᠪᠣᠶᠣ  ᠮᠣᠳᠣ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ ᠭᠡᠳᠡᠭ᠃ ᠡᠶᠢᠮᠦ ᠠᠴᠠ ᠪᠦᠬᠡ ᠨᠠᠷ ᠱᠠᠩᠰᠢ ᠶᠢᠨ ᠮᠣᠳᠣ ᠶᠢ ᠰᠠᠬᠢᠭᠤᠰᠣ ᠪᠣᠯᠭᠠᠨ ᠲᠠᠬᠢᠳᠠᠬ ᠪᠦᠭᠡᠳ ᠲᠡᠭᠷᠢ ᠲᠠᠬᠢᠬᠤ ᠪᠠᠷ ᠪᠣᠰᠬᠠᠬᠰᠠᠨ ᠣᠪᠣᠭᠠᠨ ᠲᠡᠭᠡᠷ᠎ᠡ ᠪᠠᠨ ᠵᠡᠯᠮ᠎ᠡ ᠶᠢᠨ ᠮᠣᠳᠣ ᠬᠠᠳᠬᠤᠳᠠᠬ ᠶᠣᠮ ᠭᠡᠨ᠎ᠡ᠃ ᠡᠷᠳᠡᠨ ᠳᠤ ᠪᠦᠭᠡ ᠢᠳᠣᠭᠠᠨ ᠦᠬᠦᠪᠡᠯ ᠪᠠᠰᠠ ᠲᠦᠷᠪᠡᠨ ᠮᠦᠴᠢ ᠪᠠᠷ ᠨᠢ ᠲᠣᠶᠠᠴᠢᠵᠦ ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠤ ᠡᠯᠬᠦᠳᠡᠭ ᠴᠦ ᠪᠠᠶᠢᠵᠠᠢ᠃ ᠡᠯᠭᠦᠵᠦ ᠲᠠᠯᠪᠢᠬᠰᠠᠨ ᠶᠠᠰᠣ ᠮᠢᠬ᠎ᠠ ᠶᠢ ᠨᠢ ᠬᠡᠳᠦᠨ ᠲᠣᠯᠤᠭ᠎ᠠ ᠬᠤᠨᠤᠬ ᠲᠤ ᠰᠢᠪᠠᠭᠤ᠂ ᠱᠠᠭᠠᠵᠠᠭᠠᠢ᠂ ᠡᠯᠢᠶ᠎ᠡ᠂ ᠪᠦᠷᠭᠦᠳ ᠵᠡᠷᠭᠡ ᠶᠢᠨ ᠵᠢᠭᠦᠷᠳᠡᠨ ᠠᠮᠢᠳᠠᠳ ᠢᠳᠡᠵᠦ ᠪᠠᠷᠠᠪᠠᠯ ᠶᠡᠭᠡ ᠰᠠᠶᠢᠨ ᠭᠡᠳᠡᠭ ᠶᠤᠮ᠃ ᠡᠭᠦᠨ ᠢ ᠪᠠᠰᠠ ︿ᠰᠦᠷᠯᠡᠡ ᠣᠷᠣᠰᠢᠭᠤᠯᠬᠤ﹀ ᠭᠡᠵᠦ ᠬᠡᠯᠡᠳᠡᠭ᠃ ᠪᠦᠭᠡ ᠶᠢᠨ ᠱᠠᠰᠢᠨ ᠤ ᠶᠣᠰᠣᠨ ᠳᠤ ᠪᠦᠭᠡ ᠨᠠᠷ ᠦᠬᠦᠪᠡᠯ ᠰᠦᠨᠡᠰᠦ ᠨᠢ ᠰᠠᠬᠢᠭᠤᠰᠣ ᠪᠣᠶᠣ ᠰᠢᠳᠦᠭᠡᠨ ᠪᠣᠯᠳᠠᠬ ᠠᠴᠠ ᠪᠢᠰᠢ ᠡᠩ ᠤᠨ ᠬᠦᠮᠦᠨ ᠤ ᠰᠦᠨᠡᠰᠦ ᠰᠢᠭ ᠲᠦᠷᠦᠯ ᠡᠷᠢᠵᠦ ᠶᠠᠪᠣᠳᠠᠬ ᠦᠭᠡᠢ ᠭᠡᠨ᠎ᠡ᠃ ᠬᠤᠷᠴᠢᠨᠴᠣᠳ ᠪᠠᠰᠠ ᠪᠦᠭᠡ ᠶᠢ ᠲᠡᠭᠷᠢ ᠶᠢᠨ ᠵᠢᠭᠡ ᠭᠡᠵᠦ ᠰᠢᠳᠢᠴᠢᠯᠡᠨ ᠶᠠᠷᠢᠳᠠᠬ ᠪᠣᠯᠬᠤᠷ ᠦᠬᠦᠭᠰᠡᠨ ᠪᠦᠭᠡ ᠨᠠᠷ ᠢ ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠤ ᠬᠡᠢ ᠲᠠᠯᠪᠢᠨ ᠣᠷᠣᠰᠢᠭᠤᠯᠪᠠᠯ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠠᠴᠠ ᠦᠬᠦᠭᠰᠡᠨ ᠪᠦᠭᠡ ᠶᠢᠨ ᠰᠦᠭ ᠰᠦᠨᠡᠰᠦ ᠶᠢ ᠨᠢ ᠢᠪᠡᠭᠡᠵᠦ ᠰᠢᠳᠢ ᠶᠢᠨ ᠬᠦᠴᠦᠨ ᠢ ᠨᠢ ᠨᠡᠮᠡᠭᠳᠡᠭᠦᠯᠦᠨ ᠡᠷᠳᠡᠮᠳᠡᠨ ᠪᠦᠭᠡ ᠶᠢᠨ ᠲᠣᠬᠰᠢᠨ ᠰᠢᠳᠦᠭᠡᠨ ᠪᠣᠯᠭᠠᠵᠦ ᠲᠡᠶᠢᠯᠦᠨ᠎ᠡ ᠭᠡᠳᠡᠭ᠃ ᠬᠤᠵᠢᠮ ᠨᠢ ᠪᠣᠯᠵᠦ ᠢᠷᠡᠭᠡᠳ ᠡᠨᠡ ᠬᠦ ᠪᠦᠭᠡ ᠨᠠᠷ ᠢ ︿ᠰᠦᠷᠯᠠᠡ ᠣᠷᠤᠰᠢᠭᠤᠯᠬᠤ﹀ ᠶᠣᠰᠣ ᠨᠢ ᠠᠷᠠᠳ ᠤᠨ ᠲᠣᠮᠳᠠ ᠴᠦ ᠲᠠᠷᠬᠠᠬᠰᠠᠨ ᠶᠣᠮ᠃ ᠮᠠᠨ ᠤ ᠠᠶᠢᠯ ᠠᠴᠠ ᠬᠤᠶᠢᠰᠢ ᠲᠠᠪᠣᠨ ᠭᠠᠵᠠᠷ ᠤᠨ ᠠᠯᠣᠰ ᠲᠤ ᠨᠢᠭᠡ ᠭᠠᠷᠪᠤ ᠶᠢ ᠬᠡᠢ ᠲᠡᠭᠡᠷ᠎ᠡ ᠲᠡᠭᠳᠡᠭᠡᠭᠰᠡᠨ ᠭᠡᠳᠡᠭ ᠮᠣᠳᠣ ᠪᠠᠶᠢᠬᠰᠠᠨ ᠶᠣᠮ᠃ ᠡᠨᠡ ᠮᠣᠳᠣᠨ ᠲᠡᠭᠡᠷ᠎ᠡ ᠵᠢᠷᠠᠭᠠᠳ ᠣᠨ ᠤ ᠦᠶ᠎ᠡ ᠳᠤ ᠭᠠᠷᠪᠤ ᠭᠡᠳᠡᠭ ᠬᠦᠮᠦᠨ ᠤ ᠬᠡᠭᠦᠷ ᠢ ᠲᠠᠯᠪᠢᠬᠰᠠᠨ ᠭᠡᠳᠡᠭ᠃ ᠢᠡᠭᠭᠢᠵᠦ ᠲᠡᠭᠳᠡᠭᠡᠵᠦ ᠲᠠᠯᠪᠢᠬᠰᠠᠨ ᠡᠭᠡᠯ ᠬᠦᠮᠦᠨ ᠤ ᠰᠦᠨᠡᠰᠦ ᠨᠢ ᠴᠦ ᠪᠦᠭᠡ ᠨᠠᠷ ᠤᠨ ᠬᠦᠯᠦᠭ ᠪᠣᠯᠵᠦ ᠠᠳᠠ ᠴᠢᠳᠭᠦᠷ ᠲᠤ ᠲᠠᠷᠣᠯᠭ᠎ᠠ ᠬᠢᠬᠦ ᠳᠤᠨᠢ ᠬᠠᠪᠰᠣᠷᠤᠯᠭ᠎ᠠ ᠪᠣᠯᠳᠠᠬ᠃ ᠡᠭᠦᠨ ᠠᠴᠠ ᠪᠢᠳᠡ ᠱᠠᠩᠰᠢ ᠨᠢ ᠪᠦᠭᠡ ᠨᠠᠷ ᠤᠨ ᠴᠢᠬᠤᠯᠠ ᠨᠢᠭᠡ ᠰᠢᠳᠦᠭᠡᠨ ᠪᠠᠶᠢᠬᠰᠠᠨ ᠭᠡᠳᠡᠭ ᠢ ᠮᠡᠳᠡᠵᠦ ᠪᠣᠯᠣᠨ᠎ᠠ︾ ᠭᠡᠵᠡᠢ᠃ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠪᠦᠭᠡ ᠶᠢᠨ ᠣᠷᠢᠯᠭ᠎ᠠ ᠳᠤ᠄          ᠴᠠᠰᠣ ᠴᠠᠭᠠᠨ ᠠᠭᠤᠯᠠ          ᠴᠠᠬᠢᠭᠤᠷ ᠴᠠᠭᠠᠨ ᠬᠠᠳᠠ          ᠱᠠᠰᠳᠢᠷ ᠤᠨ ᠭᠠᠭᠴᠠ ᠮᠣᠳᠣ          ᠰᠠᠯᠠᠭ᠎ᠠ ᠪᠣᠯᠭᠠᠨ ᠨᠢ ᠰᠠᠨᠠᠯ          ᠰᠠᠨᠠᠯ ᠤᠨ ᠮᠢᠩᠭᠠᠨ ᠰᠣᠬᠠᠢ          ᠨᠠᠪᠴᠢ ᠶᠢᠨ ᠲᠦᠮᠡᠨ ᠦᠵᠦᠭ          ᠭᠡᠵᠦ ᠭᠠᠷᠳᠠᠬ ᠪᠠ ︽ᠠᠷᠣ ᠬᠢᠨᠭ᠍ᠭᠠᠨ ᠤ ᠠᠷᠣ ᠳᠠᠬᠢ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠲᠣᠮᠳᠠᠬᠢ ᠠᠭᠠᠷᠣ  ᠽᠠᠨᠳᠠᠨ ᠮᠣᠳᠣᠨ ᠤ ᠪᠠᠷᠠᠭᠤᠨ ᠬᠤᠶᠢᠳᠦ ᠰᠠᠯᠠᠭᠠᠨ ᠳᠤ ᠬᠤᠪᠣᠬᠳᠦ ᠠᠪᠤ ᠶᠢᠨ ᠪᠠᠶᠢᠷᠢ ᠰᠠᠭᠤᠳᠠᠯ ᠲᠠᠢ᠂ ᠵᠡᠭᠦᠨ  ᠣᠷᠢᠳᠦ ᠰᠠᠯᠠᠭᠠᠨ ᠳᠤ ᠬᠤᠳᠣᠬᠳᠦ ᠠᠪᠠᠢ ᠰᠠᠭᠤᠳᠠᠬ︾ ᠶᠣᠮ ᠭᠡᠨ᠎ᠡ᠃ ︽ᠲᠡᠭᠦᠨ ᠢ ᠪᠠᠰᠠ ᠲᠡᠭᠷᠢ ᠶᠢᠨ ᠬᠦᠯ︾ ᠬᠡᠯᠴᠡᠳᠡᠭ ᠭᠡᠵᠦ ᠪᠠ᠊ · ᠰᠦᠬᠡ ᠶᠢᠨ ᠭᠤᠣᠯᠯᠠᠨ ᠨᠠᠶᠢᠷᠠᠭᠤᠯᠣᠬᠰᠠᠨ ︽ᠠᠨᠳᠠᠢ ᠶᠢᠨ ᠨᠣᠳᠤᠬ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠲᠡᠦᠬᠡ ᠰᠣᠶᠣᠯ ᠤᠨ ᠲᠣᠪᠴᠢᠶ᠎ᠠ︾ ᠭᠡᠬᠦ ᠨᠣᠮ ᠳᠤ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠵᠦ ᠪᠠᠶᠢᠭ᠎ᠠ ᠶᠣᠮ᠃ ᠲᠣᠰ ᠲᠡᠮᠳᠡᠭᠯᠡᠯ ᠠᠴᠠ ᠦᠵᠡᠪᠡᠯ ᠬᠤᠪᠣᠬᠳᠤ ᠪᠦᠬᠡ ᠪᠠ ᠬᠤᠳᠣᠬᠳᠦ ᠠᠪᠠᠢ ᠨᠢ ᠪᠦᠷ ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠤ ᠰᠠᠭᠤᠳᠠᠬ ᠨᠢ ᠲᠣᠳᠣᠷᠬᠠᠢ ᠃ ᠬᠤᠪᠣᠬᠳᠤ ᠪᠦᠭᠡ ᠶᠢ ᠬᠤᠷᠴᠢᠨ ᠪᠦᠭᠡ ᠨᠠᠷ ᠤᠨ ᠶᠡᠭᠡ ᠪᠠᠭᠰᠢ᠂ ᠡᠪᠦᠭᠡ ᠭᠡᠵᠦ ᠬᠤᠷᠴᠢᠨᠴᠣᠳ ᠦᠵᠡᠳᠡᠭ ᠠᠴᠠ ᠰᠢᠨᠵᠢᠪᠡᠯ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢ ᠠᠯᠢ ᠡᠷᠳᠡ ᠳᠤ ᠪᠦᠭᠡ ᠨᠠᠷ ᠡᠷᠭᠢᠯᠡᠨ ᠶᠠᠪᠣᠬᠳᠠᠭᠤᠯᠵᠦ ᠪᠠᠶᠢᠭᠰᠠᠨ ᠨᠢ ᠯᠠᠪᠳᠠᠢ᠃ ᠲᠣᠰ ᠨᠣᠮ ᠳᠤ ᠲᠡᠮᠳᠡᠭᠯᠡᠭᠰᠡᠨ ᠢᠶᠠᠷ᠄ ︽ᠵᠠᠷᠢᠮ ᠠᠶᠢᠯ ᠤᠨ ᠬᠢᠨ ᠪᠠᠰᠠ ᠠᠶᠢᠯ ᠠᠶᠢᠮᠠᠬ ᠲᠠᠭᠠᠨ ᠬᠡᠯᠡᠮᠦᠷᠴᠢ ᠴᠣᠯᠠ ᠲᠠᠢ ᠨᠠᠰᠣᠳᠠᠨ ᠢᠶᠠᠨ ︿ᠴᠠᠭᠠᠨ ᠡᠪᠦᠭᠡᠨ﹀ ᠡᠷᠭᠦᠮᠵᠢᠯᠡᠭᠡᠳ ᠱᠠᠩᠰᠢ ᠶᠢᠨ ᠡᠵᠡᠨ ᠤ ᠵᠠᠬ᠎ᠠ ᠳᠤ ᠰᠠᠭᠤᠯᠭᠠᠵᠦ᠂ ︿ᠬᠡᠰᠢᠭ ᠤᠨ ᠲᠡᠭᠡᠵᠢ﹀ ᠬᠤᠨᠢᠨ ᠡᠪᠴᠢᠭᠦᠦ ᠪᠠᠷᠢᠭᠤᠯᠵᠦ ᠢᠷᠦᠭᠡᠯ  ᠣᠡᠭᠰᠢᠭᠤᠯᠬᠤ ᠶᠢᠨ ᠬᠠᠮᠳᠦ ᠣᠯᠠᠨ ᠢᠶᠠᠷ ᠢᠶᠠᠨ ᠮᠦᠷᠭᠦᠵᠡᠭᠡᠳᠡᠭ ᠶᠣᠮ᠃ ᠡᠨᠡ ᠦᠶᠡᠰ ᠴᠠᠭᠠᠨ ᠡᠪᠦᠭᠡᠨ ᠨᠢ᠄       ᠡᠭᠦᠯᠡᠨ ᠤ ᠵᠠᠪᠰᠠᠷ ᠢᠶᠠᠷ ᠲᠡᠭᠷᠢ ᠦᠵᠡ       ᠡᠭᠦᠳᠡᠨ ᠤ ᠴᠢᠯᠦᠭᠡ ᠪᠠᠷ ᠪᠣᠷᠬᠠᠨ ᠦᠵᠡ       ᠦᠷ᠎ᠡ ᠬᠡᠦᠬᠡᠳ ᠲᠤ ᠮᠢᠨᠢ ᠡᠪᠡᠳᠴᠢᠨ ᠦᠭᠡᠢ       ᠡᠩ ᠲᠡᠯᠡᠬᠡᠢ ᠳᠤ ᠰᠠᠮᠠᠭᠤᠨ ᠦᠭᠡᠢ       ᠦᠯᠵᠡᠢ ᠵᠢᠷᠭᠠᠯ ᠬᠤᠣᠰᠯᠠᠬᠤ ᠶᠣᠮ ᠡ       ᠦᠨᠢ ᠡᠭᠦᠷᠢᠳᠡ ᠲᠠᠶᠢᠪᠤᠡᠭ ᠶᠣᠮ ᠡ       ᠲᠠᠪᠣᠨ ᠲᠠᠷᠢᠶ᠎ᠠ ᠲᠡᠭᠰᠢ ᠲᠦᠷᠦᠬᠦ ᠶᠣᠮ ᠡ       ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠠᠳᠠᠯᠢ ᠦᠰᠬᠦ ᠶᠣᠮ ᠡ᠃      ᠭᠤᠣᠨᠢ ᠪᠡᠶ᠎ᠡ ᠳᠤ ᠭᠠᠷᠣᠵᠠ ᠦᠭᠡᠢ       ᠭᠤᠸᠠᠩᠭᠠᠨ ᠰᠣᠪᠳᠠᠬ ᠲᠤ ᠭᠡᠮ ᠦᠭᠡᠢ       ᠭᠠᠯ ᠭᠤᠯᠣᠮᠳᠠ ᠪᠠᠳᠠᠷᠠᠬᠤ ᠶᠣᠮ ᠡ      ᠭᠠᠴᠢᠬ ᠵᠣᠪᠠᠯᠠᠩ ᠠᠴᠠ ᠬᠡᠯᠳᠦᠷᠢᠬᠦ ᠶᠣᠮ ᠡ       ᠦᠨᠦᠴᠢᠨ ᠬᠡᠦᠬᠡᠳ ᠲᠤ ᠡᠮᠬᠡᠭ ᠦᠭᠡᠢ       ᠡᠷ᠎ᠡ ᠦᠭᠡᠢ ᠪᠡᠯᠪᠡᠰᠦᠨ ᠳᠤ ᠨᠢᠭᠦᠯ ᠦᠭᠡᠢ       ᠡᠴᠢᠭᠡ ᠡᠬᠡ ᠪᠠᠨ ᠬᠦᠨᠳᠦᠯᠡᠬᠦ ᠶᠣᠮ ᠡ       ᠦᠷ᠎ᠡ ᠵᠣᠯᠵᠠᠭ᠎ᠠ ᠪᠠᠨ ᠦᠰᠭᠡᠬᠦ ᠶᠣᠮ ᠡ᠃       ᠮᠣᠩᠭᠤᠯ ᠲᠠᠷᠢᠶ᠎ᠠ ᠪᠠᠨ ᠬᠠᠶᠢᠷᠠᠯᠠᠪᠠᠯ       ᠮᠦᠡᠭᠬᠡ ᠲᠡᠭᠷᠢ ᠪᠠᠶᠠᠰᠬᠤ ᠶᠣᠮ ᠡ      ᠮᠦᠨᠳᠦᠷ ᠦᠭᠡᠢ ᠵᠦᠰᠡᠷ ᠪᠣᠷᠣᠭᠠᠨ ᠢ       ᠮᠦᠨᠦ ᠮᠠᠷᠭᠠᠰᠢ ᠣᠷᠣᠭᠤᠯᠬᠤ ᠶᠣᠮ ᠡ       ᠬᠤᠷᠠᠭ᠎ᠠ ᠢᠰᠢᠭᠡ ᠪᠠᠨ ᠬᠠᠶᠢᠷᠠᠯᠠᠪᠠᠯ       ᠬᠤᠷᠮᠣᠰᠳᠠ ᠲᠡᠭᠷᠢ ᠪᠠᠶᠠᠰᠬᠤ ᠶᠣᠮ ᠡ       ᠬᠤᠣᠷ ᠦᠭᠡᠢ ᠵᠦᠭᠡᠯᠡᠨ ᠬᠤᠷ᠎ᠠ ᠶᠢ       ᠬᠤᠭᠤᠴᠠᠭ᠎ᠠ ᠬᠤᠭᠤᠴᠠᠭᠠᠨ ᠳᠤᠨᠢ ᠪᠠᠭᠤᠯᠭᠠᠬᠤ ᠶᠣᠮ ᠡ ᠭᠡᠬᠦ ᠮᠡᠳᠦ ᠪᠠᠷ ᠢᠷᠦᠭᠡᠯ ᠲᠠᠯᠪᠢᠳᠠᠬ︾ ᠭᠡᠵᠦ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠵᠠᠷᠢᠮ ᠭᠠᠵᠠᠷ ᠤᠨ ᠱᠠᠩᠰᠢ ᠲᠠᠬᠢᠬᠤ ᠶᠣᠰᠣᠨ ᠤ ᠲᠣᠬᠠᠢ ᠵᠠᠩ ᠦᠢᠯᠡ ᠶᠢ ᠲᠡᠮᠳᠡᠭᠯᠡᠵᠠᠢ᠃          ᠱᠠᠩᠰᠢ ᠲᠠᠬᠢᠬᠤ ᠡᠳᠦᠷ ᠪᠣᠯᠬᠤ ᠲᠠᠢ ᠵᠡᠷᠭᠡ ᠠᠶᠢᠯ ᠤᠨ ᠣᠯᠠᠨ ᠢᠶᠠᠷ ᠢᠶᠠᠨ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠪᠠᠨ ᠲᠣᠣᠷ᠎ᠠ ᠴᠣᠬᠯᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠵᠠᠯᠠᠯᠭᠠᠨ ᠳᠤ ᠢᠷᠡᠭᠰᠡᠨ ᠯᠠᠮᠠ ᠨᠢ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠬᠤᠶᠢᠳᠦ ᠵᠦᠭ ᠲᠤ ᠰᠢᠷᠡᠭᠡ ᠲᠠᠯᠪᠢᠵᠦ ᠱᠠᠩᠰᠢ ᠶᠢᠨ ᠮᠣᠳᠣ ᠵᠦᠭ ᠡᠮᠦᠨᠡᠰᠢ ᠬᠠᠨᠳᠣᠨ ᠰᠠᠭᠤᠭᠠᠳ ᠠᠷᠠᠵᠠ ᠬᠦᠵᠢ ᠠᠰᠠᠭᠠᠵᠦ ᠂ ᠴᠠᠭᠠᠨ ᠢᠳᠡᠭᠡ ᠦᠷᠦᠵᠦ᠂ ᠬᠤᠨᠭ᠍ᠬᠤ ᠰᠠᠵᠢᠨ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠢ ᠲᠠᠭᠤᠳᠠᠵᠦ᠂ ᠯᠣᠣᠰ ᠤᠨ ᠡᠵᠡᠨ ᠢ ᠪᠠᠶᠠᠰᠬᠠᠬᠤ ᠨᠣᠮ ᠲᠠᠷᠨᠢ ᠪᠠᠨ ᠡᠬᠢᠯᠡᠭᠦᠯᠳᠡᠭ᠃ ᠪᠠᠰᠠ ᠨᠦᠬᠦᠴᠡᠯ ᠰᠠᠶᠢᠨ ᠠᠶᠢᠯ ᠤᠨ ᠬᠢᠨ ᠬᠡᠳᠦ ᠬᠡᠳᠦᠨ ᠯᠠᠮᠠ ᠵᠠᠯᠠᠵᠦ ᠨᠣᠮ ᠣᠡᠭᠰᠢᠭᠤᠯᠳᠠᠬ ᠴᠦ ᠪᠣᠢ᠃ ᠱᠠᠩᠰᠢ ᠪᠠᠨ ᠲᠠᠬᠢᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭᠠᠬᠢ ᠭᠤᠷᠪᠠᠨ ᠬᠤᠨᠤᠬ ᠲᠤ ᠬᠤᠷ᠎ᠠ ᠪᠣᠷᠣᠭᠠᠨ ᠪᠠᠭᠤᠪᠠᠯ ᠱᠠᠩᠰᠢ ᠶᠢᠨ ᠢᠷᠦᠭᠡᠯ ᠣᠡᠭᠰᠢᠬᠰᠠᠨ ᠯᠠᠮᠠ ᠶᠢ ᠣᠡᠭᠰᠢᠯᠭ᠎ᠠ ᠰᠠᠶᠢᠨ ᠯᠠᠮᠠ ᠭᠡᠵᠦ ᠪᠦᠭᠦᠳᠡᠭᠡᠷ ᠢᠶᠠᠨ ᠡᠷᠭᠦᠨ ᠮᠠᠬᠳᠠᠵᠦ᠂ ᠦᠭᠯᠢᠭᠡ ᠪᠠᠷᠢᠴᠠ ᠪᠠᠷᠢᠵᠦ᠂ ᠡᠷᠦᠬᠡ ᠭᠡᠷ ᠲᠡᠭᠡᠨ ᠵᠠᠯᠠᠵᠦ ᠨᠣᠳᠤᠬ ᠣᠰᠣ ᠪᠠᠨ ᠪᠠᠶᠠᠰᠬᠠᠬᠤ ᠨᠣᠮ ᠣᠡᠭᠰᠢᠭᠤᠯᠳᠠᠬ ᠶᠣᠮ᠃              ᠱᠠᠩᠰᠢ ᠡᠷᠭᠢᠬᠦ ᠶᠣᠰᠣᠨ          ᠯᠠᠮᠠ ᠨᠠᠷ ᠠᠴᠠ ᠱᠠᠩᠰᠢ ᠲᠠᠬᠢᠬᠤ ᠨᠣᠮ ᠢᠶᠠᠨ ᠣᠡᠭᠰᠢᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ᠂ ᠠᠶᠢᠯ ᠤᠨ ᠣᠯᠠᠨ ᠢᠶᠠᠷ ᠢᠶᠠᠨ ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠠᠭᠠᠨ ᠮᠦᠷᠭᠦᠨ ᠲᠠᠭᠠᠳᠬᠠᠵᠦ ᠮᠦᠷᠯᠡᠨ ᠵᠢᠬᠰᠠᠭᠠᠵᠦ᠂ ᠬᠠᠭᠤᠷᠠᠢ  ᠪᠣᠳᠠᠭ᠎ᠠ᠂ ᠠᠷᠢᠬᠢ᠂ ᠴᠠᠭᠠᠨ ᠢᠳᠡᠭᠡ᠂ ᠰᠦ ᠰᠠᠭᠠᠯᠢ᠂ ᠵᠡᠷᠭᠡ ᠶᠢ ᠪᠡᠷᠢᠵᠦ ᠱᠠᠩᠰᠢ ᠶᠢᠨ ᠮᠣᠳᠣᠨ ᠳᠠᠭᠠᠨ ᠢᠳᠡᠭᠡᠨ ᠣᠮᠳᠠᠭᠠᠨ ᠤ ᠲᠡᠭᠡᠵᠢ ᠪᠠᠨ ᠡᠷᠭᠦᠨ ᠰᠡᠷᠵᠢᠮᠯᠡᠵᠦ᠂ ᠵᠦᠡᠭ ᠪᠡᠯᠭᠡᠳᠦ ᠦᠭᠡ ᠬᠠᠶᠢᠷᠠᠯᠠᠵᠦ ᠨᠠᠷᠠᠨ ᠤ ᠡᠷᠭᠢᠯᠳᠡ ᠶᠢ  ᠲᠠᠭᠠᠵᠦ ᠭᠤᠷᠪᠠ ᠣᠳᠠᠭ᠎ᠠ ᠲᠣᠭᠤᠷᠢᠨ ᠡᠷᠭᠢᠨ᠎ᠡ᠃ ᠭᠡᠬᠦ ᠳᠤ ᠡᠮᠡᠭᠳᠡᠢ ᠬᠦᠮᠦᠰ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ  ᠣᠷᠣᠯᠴᠠᠪᠠᠯ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠬᠢᠯᠢᠩᠨᠡᠬᠦ ᠪᠣᠶᠣ ᠪᠣᠵᠠᠷᠯᠠᠬᠳᠠᠵᠦ ᠰᠢᠳᠢ ᠶᠢᠨ ᠬᠦᠴᠦᠨ ᠨᠢ ᠪᠠᠭᠤᠷᠠᠳᠠᠬ ᠶᠣᠮ ᠭᠡᠨ᠎ᠡ᠃ ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠬᠰᠠᠨ ᠡᠮᠡᠭᠳᠡᠢ ᠴᠦ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠢ ᠬᠢᠯᠢᠩᠨᠡᠭᠦᠯᠦᠭᠰᠡᠨ ᠠᠴᠠ ᠪᠣᠯᠵᠦ ᠰᠡᠪᠤᠷᠬᠡᠵᠦ᠂ ᠰᠣᠯᠢᠶ᠎ᠠ ᠡᠯᠢᠶ᠎ᠡ ᠡᠪᠡᠳᠴᠢᠨ ᠲᠣᠰᠬᠤ ᠪᠣᠶᠣ ᠬᠠᠨᠢᠶᠠᠳᠦ ᠲᠠᠬᠰᠢᠭᠤᠷ ᠲᠤ ᠨᠡᠷᠪᠡᠭᠳᠡᠬᠦ ᠠᠶᠣᠯᠳᠠᠢ᠃ ᠡᠭᠦᠨ ᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠡᠮᠡᠭᠳᠡᠢ ᠬᠦᠮᠦᠨ ᠢ ᠣᠷᠣᠯᠴᠠᠭᠤᠯᠳᠠᠬ ᠦᠭᠡᠢ ᠶᠣᠰᠣ ᠨᠢ ᠬᠡᠵᠢᠶ᠎ᠡ ᠠᠴᠠ ᠪᠣᠢ ᠪᠣᠯᠵᠠᠢ ᠭᠡᠳᠡᠭ ᠨᠢ ᠣᠳᠣ ᠪᠣᠯᠳᠠᠯ᠎ᠠ ᠲᠣᠳᠣᠷᠬᠠᠢ ᠦᠭᠡᠢ ᠪᠠᠶᠢᠬᠰᠠᠭᠠᠷ᠃ ᠡᠨᠡ ᠨᠢ ᠮᠣᠩᠭᠤᠯ ᠣᠷᠣᠨ ᠳᠤ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠲᠡᠯᠭᠡᠷᠡᠵᠦ᠂ ᠯᠠᠮᠠ ᠨᠠᠷ ᠠᠴᠠ ᠲᠠᠬᠢᠯᠭ᠎ᠠ ᠶᠢᠨ ᠶᠣᠰᠣᠯᠠᠯ ᠡᠷᠬᠢᠯᠡᠬᠦ ᠪᠣᠯᠣᠬᠰᠠᠨ ᠤ ᠲᠠᠷᠠᠭ᠎ᠠ ᠪᠣᠢ ᠪᠣᠯᠣᠬᠰᠠᠨ ᠶᠠᠪᠣᠳᠠᠯ ᠪᠠᠶᠢᠵᠦ ᠴᠦ ᠮᠡᠳᠡᠨ᠎ᠡ᠃ ᠣᠴᠢᠷ ᠨᠢ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠶᠣᠰᠣ ᠭᠤᠷᠢᠮ ᠳᠤ ᠰᠠᠬᠢᠯ ᠰᠠᠨᠸᠠᠷ ᠠᠪᠣᠬᠰᠠᠨ ᠯᠠᠮᠠ ᠨᠠᠷ ᠡᠬᠡᠨᠡᠷ ᠠᠪᠴᠦ ᠪᠣᠯᠳᠠᠬ ᠦᠭᠡᠢ᠂ ᠡᠮᠡᠭᠳᠡᠢ ᠬᠦᠮᠦᠨ ᠲᠠᠢ ᠣᠢᠢᠷᠠᠳᠴᠦ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠶᠣᠰᠣ ᠪᠠᠶᠢᠳᠠᠬ ᠠᠴᠠ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠶᠢ ᠯᠠᠮᠠ ᠶᠢᠨ ᠱᠠᠰᠢᠨ ᠤ ᠨᠢᠭᠡ ᠲᠦᠷᠦᠯ ᠪᠣᠯᠭᠠᠨ ᠱᠠᠩᠰᠢ ᠶᠢᠨ ᠮᠤᠳᠦ ᠶᠢ ᠪᠣᠷᠬᠠᠨᠴᠢᠯᠠᠨ ᠦᠵᠡᠭᠰᠡᠨ ᠯᠦᠭᠡ ᠬᠤᠯᠪᠣᠭ᠎ᠠ ᠲᠠᠢ ᠮᠠᠭᠠᠳ︾ ᠭᠡᠵᠡᠢ᠃          ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠨᠢ ᠬᠤᠷᠴᠢᠨ ᠨᠣᠳᠤᠬ ᠲᠤ ᠴᠡᠴᠡᠭᠯᠡᠯᠳᠡ ᠪᠠᠨ ᠣᠯᠬᠤ ᠠᠴᠠ ᠡᠮᠦᠨ᠎ᠡ ᠲᠠᠬᠢᠯᠭ᠎ᠠ ᠲᠠᠪᠢᠯᠭ᠎ᠠ ᠶᠢᠨ ᠶᠣᠰᠣᠯᠠᠯ ᠤᠨ ᠦᠢᠯᠡ ᠶᠢ ᠭᠤᠣᠯᠳᠠᠭᠤ ᠪᠦᠭᠡ ᠢᠳᠣᠭᠠᠨ ᠨᠠᠷ ᠬᠦᠢᠴᠡᠳᠭᠡᠵᠦ ᠪᠠᠶᠢᠵᠠᠢ᠃  ᠪᠦᠭᠡ ᠶᠢᠨ ᠱᠠᠰᠢᠨ ᠳᠤ ᠡᠷᠡᠭᠳᠡᠢ ᠶᠢ ᠨᠢ ᠪᠦᠭᠡ ᠭᠡᠵᠦ᠂ ᠡᠮᠡᠭᠳᠡᠢ ᠶᠢ ᠨᠢ ᠢᠳᠣᠭᠠᠨ ᠭᠡᠵᠦ ᠬᠡᠯᠡᠳᠡᠭ᠃ ᠪᠦᠭᠡ ᠮᠦᠷᠭᠦᠯ ᠢ ᠡᠬᠡᠴᠢᠯᠡᠯ ᠤᠨ ᠣᠪᠣᠬ ᠲᠦᠷᠦᠯ ᠤᠨ ᠦᠶ᠎ᠡ ᠳᠤ ᠪᠣᠢ ᠪᠣᠯᠵᠠᠢ ᠭᠡᠵᠦ ᠡᠷᠳᠡᠮᠳᠡᠳ ᠦᠵᠡᠳᠡᠭ ᠠᠴᠠ ᠠᠯᠢ ᠡᠷᠳᠡ ᠪᠠᠯᠠᠷ ᠡᠷᠳᠡᠨ ᠤ ᠦᠶ᠎ᠡ ᠳᠤ ᠢᠳᠦᠭᠠᠨ ᠨᠢ ᠪᠦᠭᠡ ᠶᠢᠨ ᠱᠠᠰᠢᠨ ᠳᠤ ᠭᠤᠣᠯᠯᠠᠵᠦ᠂ ᠱᠠᠰᠢᠨ ᠤ ᠦᠢᠯᠡ ᠶᠢ ᠡᠷᠭᠢᠯᠡᠳᠡᠭ ᠪᠠᠶᠢᠯ᠎ᠠ᠃ ᠢᠳᠣᠭᠠᠨ ᠨᠢ ᠬᠡᠳᠦ᠋ᠢᠪᠡᠷ ᠲᠡᠭᠷᠢ ᠪᠠ ᠡᠵᠡᠳ ᠰᠠᠬᠢᠭᠤᠰᠣ ᠶᠢ ᠲᠦᠯᠦᠭᠡᠯᠡᠵᠦ ᠦᠭᠡ ᠶᠠᠷᠢᠳᠠᠬ  ᠪᠣᠯᠪᠠᠴᠦ ᠡᠮᠡᠭᠳᠡᠢ ᠬᠦᠮᠦᠨ ᠪᠣᠯᠬᠤᠷ ᠮᠣᠳᠣᠨ ᠲᠠᠬᠢᠯᠭ᠎ᠠ᠂ ᠲᠡᠭᠷᠢ ᠲᠠᠬᠢᠯᠭ᠎ᠠ ᠁ ᠮᠡᠳᠦ ᠶᠢᠨ ᠲᠠᠬᠢᠯᠭ᠎ᠠ ᠲᠠᠪᠢᠯᠭ᠎ᠠ ᠶᠢᠨ ᠶᠣᠰᠣᠯᠠᠯ ᠵᠡᠷᠭᠡ ᠳᠤ ᠡᠮᠡᠭᠳᠡᠢ ᠬᠦᠮᠦᠨ ᠣᠷᠣᠯᠴᠠᠵᠦ ᠪᠠᠶᠢᠬᠰᠠᠨ ᠨᠢ ᠯᠠᠪᠳᠠᠢ᠃ ᠡᠬᠡᠴᠢᠯᠡᠯ ᠤᠨ ᠨᠡᠶᠢᠭᠡᠮ ᠵᠠᠳᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠡᠴᠢᠭᠡᠴᠢᠯᠡᠯ ᠤᠨ ᠨᠡᠶᠢᠭᠡᠮ ᠪᠣᠢ ᠪᠣᠯᠵᠦ ᠪᠦᠭᠡ ᠨᠠᠷ ᠠᠴᠠ ᠲᠠᠬᠢᠯᠭ᠎ᠠ ᠲᠠᠪᠢᠯᠭ᠎ᠠ ᠶᠢᠨ ᠶᠣᠰᠣᠯᠠᠯ ᠢ ᠡᠷᠬᠢᠯᠡᠨ ᠬᠢᠬᠦ ᠪᠣᠯᠵᠠᠢ᠃ ᠣᠯᠣᠰ ᠪᠠᠶᠢᠭᠤᠯᠤᠭᠳᠠᠬᠤ ᠠᠴᠠ ᠡᠮᠦᠨᠡᠬᠡᠨ ᠪᠣᠯᠳᠠᠯ᠎ᠠ ᠡᠮᠡᠭᠳᠡᠶᠢᠴᠣᠳ ᠤᠨ ᠪᠠᠶᠢᠷᠢ ᠰᠠᠭᠤᠷᠢ ᠨᠢ ᠡᠷᠡᠭᠳᠡᠢ ᠬᠦᠮᠦᠨ ᠠᠴᠠ ᠲᠣᠣᠷ᠎ᠠ ᠪᠠᠶᠢᠬᠰᠠᠨ ᠴᠦ ᠡᠮᠡᠭᠳᠡᠶᠢᠴᠦᠳ ᠢ ᠲᠠᠬᠢᠯᠭ᠎ᠠ ᠰᠢᠳᠦᠯᠭᠡ ᠶᠢᠨ ᠶᠣᠰᠣᠯᠠᠯ ᠳᠤ ᠣᠷᠣᠯᠴᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠭᠠᠳᠠᠭᠤᠷᠬᠠᠵᠦ ᠦᠵᠡᠳᠡᠭ ᠮᠣᠩᠭᠤᠯᠴᠣᠳ ᠤᠨ ᠲᠣᠬᠠᠢ ᠶᠣᠰᠣ ᠵᠠᠩᠰᠢᠯ ᠢ ᠲᠡᠮᠳᠡᠭᠯᠡᠭᠰᠡᠨ ᠰᠣᠳᠣᠷ ᠨᠣᠮ ᠲᠣᠩ ᠴᠦᠬᠡᠨ ᠬᠠᠷᠠᠬᠳᠠᠨ᠎ᠠ᠃ ᠭᠡᠪᠡᠴᠦ ᠡᠷᠳᠡ ᠦᠶ᠎ᠡ ᠳᠤ ᠠᠷᠪᠠᠨ ᠨᠠᠢᠮᠠᠨ ᠨᠠᠰᠣᠳᠠᠢ ᠬᠡᠦᠬᠡᠨ ᠢᠶᠠᠷ ᠯᠣᠣᠰ ᠲᠠᠬᠢᠵᠦ ᠪᠠᠶᠢᠬᠰᠠᠨ᠂ ᠡᠰᠡᠬᠦᠯ᠎ᠡ ᠶᠠᠮᠠᠷ ᠨᠢᠭᠡᠨ ᠰᠢᠳᠦᠭᠡᠨ ᠢᠶᠠᠨ ᠲᠠᠬᠢᠬᠤ ᠳᠤ ᠡᠮᠡᠭᠳᠡᠢ ᠬᠦᠮᠦᠨ ᠪᠤᠶᠤ ᠬᠡᠤᠬᠡᠳ ᠢᠶᠠᠷ ᠠᠮᠢᠳᠦ ᠬᠦᠮᠦᠨ ᠤ ᠲᠠᠬᠢᠯᠭ᠎ᠠ ᠪᠣᠯᠭᠠᠵᠦ ᠪᠠᠶᠢᠬᠰᠠᠨ ᠲᠣᠬᠠᠢ ᠦᠯᠢᠭᠡᠷ ᠲᠣᠮᠤᠬ ᠣᠳᠣᠬᠠᠨ ᠪᠣᠯᠳᠠᠯ᠎ᠠ ᠣᠯᠠᠮᠵᠢᠯᠠᠬᠳᠠᠬᠰᠠᠭᠠᠷ ᠪᠠᠶᠢᠨ᠎ᠠ᠃ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠡᠮᠡᠭᠳᠡᠢ ᠬᠦᠮᠦᠨ ᠣᠷᠣᠯᠴᠠᠪᠠᠯ ᠰᠡᠪᠤᠷᠬᠡᠵᠦ ᠡᠪᠡᠳᠴᠢᠯᠡᠨ᠎ᠡ ᠭᠡᠳᠡᠭ ᠨᠢ ᠪᠠᠷᠤᠬ ᠲᠣᠮᠤᠬ ᠲᠤ ᠭᠠᠷᠳᠠᠬ ᠡᠷᠳᠡ ᠦᠶ᠎ᠡ ᠶᠢᠨ ᠪᠠᠯᠠᠷᠯᠢᠬ ᠲᠠᠬᠢᠯᠭ᠎ᠠ ᠠᠴᠠ ᠦᠨᠳᠦᠰᠦᠯᠡᠯ ᠲᠠᠢ ᠪᠠᠶᠢᠵᠦ ᠮᠡᠳᠡᠨ᠎ᠡ᠃          ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠬᠰᠠᠨ ᠬᠦᠮᠦᠰ ᠱᠠᠩᠰᠢ ᠶᠢᠨ ᠮᠣᠳᠣ ᠪᠠᠨ ᠨᠠᠷᠠᠨ ᠡᠷᠭᠢᠯᠳᠡ ᠪᠠᠷ ᠭᠤᠷᠪᠠᠨᠳᠠ ᠲᠣᠭᠤᠷᠢᠵᠦ ᠰᠢᠪᠰᠢᠨ ᠲᠠᠭᠠᠳᠬᠠᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠱᠠᠩᠰᠢ ᠶᠢᠨ ᠮᠣᠳᠣᠨ ᠲᠡᠭᠡᠷ᠎ᠡ ᠪᠠᠨ ᠰᠠᠭᠤᠯᠠᠭ᠎ᠠ  ᠰᠠᠪᠠ ᠪᠠᠷ ᠣᠰᠣ ᠰᠦᠷᠴᠢᠵᠦ ᠪᠣᠷᠣᠭᠠᠨ ᠬᠦᠰᠡᠵᠦ ᠪᠠᠶᠢᠬᠤ ᠰᠠᠨᠠᠭ᠎ᠠ ᠪᠠᠨ ᠢᠯᠡᠳᠭᠡᠳᠡᠭ᠃ ᠱᠠᠩᠰᠢ ᠶᠢᠨ  ᠮᠣᠳᠣᠨ ᠳᠤ ᠣᠰᠣ ᠰᠦᠷᠴᠢᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ᠂ ᠴᠣᠬᠯᠠᠷᠠᠬᠰᠠᠨ ᠣᠯᠠᠨ ᠢᠶᠠᠷ ᠢᠶᠠᠨ ᠨᠠᠰᠣᠳᠠᠢ ᠵᠠᠯᠠᠭᠤᠰ  ᠢᠯᠭᠠᠯ ᠦᠭᠡᠢ ᠬᠠᠷᠢᠯᠴᠠᠨ ᠣᠰᠣ ᠰᠦᠷᠴᠢᠯᠳᠦᠵᠦ ︽ᠪᠤᠷᠤᠭᠠᠨ ᠤᠷᠤᠵᠦ ᠪᠠᠶᠢᠨ᠎ᠠ︾ ᠭᠡᠵᠦ ᠬᠦᠭᠡᠷᠦᠯᠳᠦᠨ  ᠪᠠᠶᠠᠰᠣᠯᠴᠠᠳᠠᠬ ᠶᠣᠮ᠃ ᠬᠤᠷᠴᠢᠨᠴᠣᠳ ᠡᠨᠡ ᠬᠦ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠣᠰᠣ ᠰᠦᠷᠴᠢᠬᠦ ᠶᠤᠰᠦ ᠪᠠᠨ᠄ ︽ ᠬᠡᠳᠦᠢ ᠠᠷᠪᠢᠨ ᠣᠰᠣ ᠰᠦᠷᠴᠢᠵᠦ ᠬᠡᠳᠦᠢ ᠶᠡᠭᠡ ᠨᠣᠷᠪᠠᠯ ᠲᠡᠳᠦᠢ ᠶᠡᠭᠡ ᠪᠣᠷᠣᠭᠠᠨ ᠣᠷᠣᠨ᠎ᠠ᠃ ᠬᠡᠨ ᠨᠢ  ᠣᠰᠣᠨ ᠳᠤ ᠢᠯᠡᠭᠦᠦ ᠨᠣᠷᠤᠬᠳᠠᠪᠠᠯ ᠲᠡᠭᠦᠨ ᠤ ᠲᠠᠷᠢᠶ᠎ᠡ ᠡᠨᠡ ᠵᠢᠯ ᠲᠡᠯᠪᠡ ᠲᠦᠷᠦᠨ᠎ᠡ︾ ᠬᠡᠮᠡᠨ ᠪᠡᠯᠭᠡᠰᠢᠶᠡᠳᠡᠭ᠃             ᠱᠠᠩᠰᠢ ᠳᠤ ᠰᠢᠭᠦᠰᠦ ᠡᠷᠭᠦᠬᠦ ᠶᠣᠰᠣᠨ          ᠱᠠᠩᠰᠢ ᠳᠤ ᠰᠢᠭᠦᠰᠦ ᠡᠷᠭᠦᠬᠦ ᠳᠤ ᠭᠤᠣᠯᠳᠠᠭᠤ ᠬᠤᠨᠢ ᠪᠣᠶᠣ ᠢᠮᠠᠭ᠎ᠠ ᠪᠠᠷ ᠰᠢᠭᠦᠰᠦ ᠡᠷᠭᠦᠳᠡᠭ᠃ ᠭᠡᠬᠦ ᠳᠤ ᠡᠮ᠎ᠡ ᠬᠤᠨᠢ ᠪᠣᠶᠣ ᠡᠮ᠎ᠡ ᠢᠮᠠᠭ᠎ᠠ ᠪᠠᠶᠢᠵᠦ ᠪᠣᠯᠬᠤ ᠦᠭᠡᠢ ᠵᠠᠪᠠᠯ ᠢᠷᠭᠡ ᠪᠣᠶᠣ ᠰᠡᠷᠬᠡ ᠪᠠᠶᠢᠵᠦ᠂ ᠲᠡᠮᠳᠡᠭ ᠦᠭᠡᠢ  ᠰᠢᠷᠬ᠎ᠠ ᠰᠣᠷᠪᠢ ᠦᠭᠡᠢ ᠲᠣᠩ ᠴᠠᠭᠠᠨ ᠬᠤᠨᠢ ᠪᠣᠯ ᠬᠠᠮᠤᠬ ᠰᠠᠶᠢᠨ ᠪᠠᠶᠢᠳᠠᠬ᠃          ᠡᠭᠦᠨ ᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠮᠣᠩᠭᠤᠯᠴᠣᠳ ᠡᠷᠳᠡᠨ ᠠᠴᠠ ᠠᠪᠣᠭᠠᠳ ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠤᠨ ᠨᠢᠭᠡ ᠪᠣᠯᠬᠤ ᠬᠤᠨᠢ ᠶᠢ ᠬᠠᠯᠠᠭᠤᠨ ᠬᠤᠰᠢᠭᠤᠳᠦ ᠲᠡᠵᠢᠭᠡᠪᠦᠷᠢ ᠭᠡᠵᠦ ᠬᠦᠨᠳᠦᠳᠭᠡᠨ ᠲᠡᠭᠷᠢ ᠶᠢᠨ ᠲᠠᠬᠢᠯᠭ᠎ᠠ᠂  ᠣᠪᠣᠭ᠎ᠠ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠁ ᠶᠣᠰᠣᠯᠠᠯ ᠲᠠᠬᠢᠯᠭ᠎ᠠ ᠵᠡᠷᠭᠡ ᠳᠤ ᠬᠦᠨᠳᠦᠳᠭᠡᠨ ᠬᠡᠷᠡᠭᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠶᠣᠮ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠲᠡᠮᠳᠡᠭ ᠦᠭᠡᠢ ᠴᠠᠭᠠᠨ ᠬᠤᠨᠢ ᠨᠢ ᠲᠡᠭᠷᠢ ᠪᠣᠷᠬᠠᠨ ᠵᠢᠴᠢ ᠡᠵᠡᠳ ᠰᠠᠬᠢᠭᠤᠰᠣ ᠶᠢᠨ ᠨᠢᠳᠦᠨ ᠳᠤ ᠲᠠᠭᠠᠯᠠᠬᠳᠠᠳᠠᠬ ᠠᠴᠠ ᠪᠦᠭᠡ ᠨᠠᠷ ᠴᠦ ᠭᠡᠰᠡᠨ ᠪᠢᠯᠢᠭ ᠤᠨ ᠣᠯᠠᠷᠢᠯ ᠤᠨ ᠶᠢᠰᠦᠨ ᠰᠠᠷ᠎ᠠ ᠶᠢᠨ ᠶᠢᠰᠦᠨ ᠤ ᠡᠳᠦᠷ ᠲᠡᠭᠷᠢ ᠲᠠᠬᠢᠬᠤ ᠳᠠᠭᠠᠨ ᠲᠡᠮᠳᠡᠭ ᠦᠭᠡᠢ ᠴᠠᠭᠠᠨ ᠬᠤᠨᠢ ᠪᠠᠷ ᠲᠠᠬᠢᠯ ᠪᠣᠯᠭᠠᠳᠠᠬ᠃ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠨᠢ  ᠴᠦ ᠡᠭᠦᠨ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ ᠪᠠᠶᠢᠵᠦ ᠮᠡᠳᠡᠨ᠎ᠡ︾ ᠭᠡᠵᠡᠢ᠃          ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠡᠷᠡᠭᠯᠡᠬᠦ ᠬᠤᠨᠢ ᠪᠠᠨ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠲᠣᠣᠷ᠎ᠠ ᠠᠪᠠᠴᠢᠭᠠᠳ ︽ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠳᠤ ᠡᠷᠭᠦᠬᠦ ᠬᠤᠨᠢ︾ ᠭᠡᠵᠦ ᠨᠡᠷ᠎ᠡ ᠵᠢᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠲᠣᠣᠷ᠎ᠠ ᠬᠦᠯᠢᠵᠦ ᠲᠠᠯᠪᠢᠨ᠎ᠠ᠃ ᠡᠨᠡ ᠦᠶᠡᠰ ᠱᠠᠩᠰᠢ ᠶᠢᠨ ᠵᠠᠯᠠᠯᠭ᠎ᠠ ᠳᠤ ᠢᠷᠡᠭᠰᠡᠨ ᠯᠠᠮᠠ ᠠᠴᠠ ᠲᠠᠬᠢᠯ ᠲᠠᠪᠰᠢ ᠲᠠᠯᠪᠢᠨ  ᠱᠠᠩᠰᠢ ᠲᠠᠬᠢᠬᠤ ᠨᠣᠮ ᠣᠡᠭᠰᠢᠨ᠎ᠠ᠃ ᠨᠣᠮ ᠦᠨᠳᠦᠷᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠱᠠᠩᠰᠢ ᠳᠤ ᠨᠡᠷ᠎ᠡ ᠵᠢᠭᠠᠬᠰᠠᠨ ᠡᠨᠡ ᠬᠦ ᠬᠤᠨᠢ ᠪᠠᠨ ᠦᠷᠦᠴᠡᠯᠡᠨ ᠨᠢᠳᠦᠯᠵᠦ ᠱᠠᠩᠰᠢ ᠳᠤ ᠰᠢᠭᠦᠰᠦ ᠡᠷᠭᠦᠨ᠎ᠡ᠃ ᠱᠠᠩᠰᠢ ᠶᠢᠨ ᠰᠢᠭᠦᠰᠦ ᠴᠢᠨᠠᠬᠰᠠᠨ  ᠱᠦᠯᠦᠨ ᠳᠤ ᠴᠠᠭᠠᠨ ᠪᠣᠳᠠᠭ᠎ᠠ ᠣᠢᠢᠵᠦ ᠠᠮᠤᠰᠣ ᠪᠣᠯᠭᠠᠭᠠᠳ ᠠᠶᠢᠯ ᠤᠨ ᠣᠯᠠᠨ ᠢᠶᠠᠷ ᠢᠶᠠᠨ ᠱᠠᠩᠰᠢ ᠶᠢᠨ ᠬᠡᠰᠢᠭ ᠭᠡᠵᠦ ᠬᠤᠪᠢᠶᠠᠯᠴᠠᠵᠦ ᠢᠳᠡᠳᠡᠭ᠃ ᠠᠮᠦᠰᠣ ᠳᠤ ᠬᠡᠷᠡᠭᠯᠡᠬᠦ ᠴᠠᠭᠠᠨ ᠪᠣᠳᠠᠭ᠎ᠠ ᠶᠢ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠬᠤ ᠬᠦᠮᠦᠨ ᠪᠣᠯᠭᠠᠨ ᠭᠡᠷ ᠠᠴᠠ ᠪᠠᠨ ᠠᠪᠴᠦ ᠣᠴᠢᠳᠠᠬ ᠶᠣᠮ᠃ ᠭᠠᠭᠴᠠ ᠡᠷᠦᠬᠡ ᠪᠣᠶᠣ ᠬᠡᠳᠦᠬᠡᠨ ᠭᠡᠷ ᠤᠨ ᠬᠢᠨ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠡᠷᠡᠭᠯᠡᠬᠦ ᠴᠠᠭᠠᠨ ᠪᠣᠳᠠᠭ᠎ᠠ ᠶᠢ ᠭᠠᠷᠭᠠᠬᠤ ᠶᠢ ᠠᠶᠢᠯ ᠬᠤᠳᠠᠯᠠᠭᠠᠷ ᠢᠶᠠᠨ ᠵᠦᠪᠰᠢᠶᠡᠷᠡᠳᠡᠭ ᠦᠭᠡᠢ ᠶᠣᠰᠣ ᠪᠠᠶᠢᠳᠠᠬ᠃ ᠡᠭᠦᠨ ᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠡᠳᠦᠷ ᠪᠣᠯᠬᠤ ᠲᠠᠢ ᠵᠡᠷᠭᠡ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠬᠤ ᠬᠦᠮᠦᠨ ᠪᠦᠷᠢ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠡᠷᠡᠭᠰᠡᠬᠦ ᠴᠠᠭᠠᠨ ᠪᠣᠳᠠᠭ᠎ᠠ ᠭᠡᠵᠦ ᠭᠡᠷ ᠠᠴᠠ ᠪᠠᠨ ᠨᠢᠭᠡ ᠠᠶᠠᠭ᠎ᠠ ᠪᠣᠶᠣ ᠬᠤᠶᠠᠷ ᠠᠶᠠᠭ᠎ᠠ ᠲᠡᠭᠦᠵᠢᠯᠡᠵᠦ ᠣᠴᠢᠭᠠᠳ ᠱᠠᠩᠰᠢ ᠪᠠᠨ ᠬᠠᠮᠳᠦ ᠪᠠᠷ ᠲᠠᠬᠢᠳᠠᠬ ᠶᠣᠮ᠃ ︿ᠣᠯᠠᠨ ᠤ ᠬᠦᠴᠦᠨ ᠳᠤ ᠣᠪᠣᠭ᠎ᠠ ᠰᠢᠯᠵᠢᠨ᠎ᠡ﹀ ᠭᠡᠳᠡᠭ ᠢᠶᠠᠷ ᠣᠯᠠᠨ ᠬᠦᠮᠦᠨ ᠤ ᠰᠦᠵᠢᠭ ᠤᠨ ᠬᠦᠴᠦᠨ ᠳᠤ ᠡᠵᠡᠳ ᠰᠠᠬᠢᠭᠤᠰᠣ ᠴᠦ ᠲᠣᠬᠳᠣᠯᠣᠨ ᠪᠠᠶᠠᠰᠳᠠᠬ ᠶᠣᠰᠣ ᠪᠠᠶᠢᠳᠠᠬ ᠠᠴᠠ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢ ᠬᠠᠮᠢᠶᠠᠷᠣᠬᠴᠢ ᠴᠦ ᠠᠶᠢᠯ ᠲᠣᠰᠬᠤᠨ ᠤ ᠪᠠᠨ ᠬᠡᠨ ᠨᠢᠭᠡ ᠬᠦᠮᠦᠨ ᠤ ᠲᠠᠬᠢᠯᠭ᠎ᠠ ᠳᠤ ᠬᠡᠷᠡᠭᠰᠡᠬᠦ ᠴᠠᠭᠠᠨ ᠪᠣᠳᠠᠭ᠎ᠠ ᠶᠢ ᠣᠷᠬᠢᠬᠳᠠᠭᠤᠯᠣᠯ ᠦᠭᠡᠢ ᠬᠡᠷᠡᠭᠯᠡᠬᠦ ᠶᠢ ᠬᠢᠴᠢᠶᠡᠳᠡᠭ᠃ ᠡᠪᠦᠭᠡᠴᠦᠳ ᠤᠨ ᠶᠠᠷᠢᠶᠠᠨ ᠳᠤ ︿ᠵᠠᠭᠤᠨ ᠡᠷᠦᠬᠡ ᠶᠢᠨ ᠪᠦᠰ ᠤᠨ ᠦᠭᠡᠳᠡᠰᠦ ᠪᠠᠷ ᠬᠤᠶᠠᠭ ᠬᠢᠭᠰᠡᠨ ᠪᠦᠭᠡ ᠨᠠᠷ ᠰᠠᠶ᠋ᠢ ᠲᠡᠭᠷᠢ ᠳᠤ ᠭᠠᠷᠬᠤ ᠣᠪᠠᠳᠢᠰ ᠪᠦᠷᠢᠳᠦᠭᠦᠯᠵᠦ ᠴᠢᠳᠠᠨ᠎ᠠ᠃ ᠵᠠᠭᠤᠨ ᠠᠶᠢᠯ ᠤᠨ ᠴᠠᠪ ᠢ ᠪᠠᠷᠢᠵᠦ ᠶᠠᠪᠣᠬᠰᠠᠨ ᠪᠠᠳᠢᠷᠴᠢ ᠯᠠᠮᠠ ᠰᠠᠶ᠋ᠢ ᠪᠣᠷᠬᠠᠨ ᠪᠣᠯᠬᠤ ᠦᠨᠡᠨ ᠤ ᠮᠦᠷ ᠢ ᠣᠯᠵᠦ ᠴᠢᠳᠠᠨ᠎ᠠ﹀ ᠭᠡᠳᠡᠭ᠃ ᠮᠣᠩᠭᠤᠯ ᠤᠨ ᠰᠡᠴᠡᠨ ᠦᠭᠡᠨ ᠳᠤ ᠪᠠᠰᠠ ︿ᠭᠠᠭᠴᠠ ᠮᠣᠳᠣ ᠭᠠᠯ ᠪᠣᠯᠬᠤ ᠦᠭᠡᠢ᠂ ᠭᠠᠭᠴᠠ ᠬᠦᠮᠦᠨ ᠠᠶᠢᠯ ᠪᠣᠯᠬᠤ ᠦᠭᠡᠢ﹀ ᠭᠡᠬᠦ ᠰᠠᠶᠢᠬᠠᠨ ᠦᠭᠡ ᠪᠠᠶᠢᠳᠠᠬ ᠠᠴᠠ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠨᠢ ᠴᠦ ᠣᠯᠠᠨ ᠡᠷᠦᠬᠡ ᠶᠢᠨ ᠴᠠᠭᠠᠨ ᠪᠣᠳᠠᠭ᠎ᠠ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠰᠠᠶ᠋ᠢ ᠰᠢᠳᠢ ᠶᠢᠨ ᠬᠦᠴᠦᠨ ᠨᠢ ᠨᠡᠮᠡᠭᠳᠡᠵᠦ ᠬᠤᠷ᠎ᠠ ᠪᠣᠷᠣᠭᠠᠨ ᠣᠷᠣᠭᠤᠯᠵᠦ ᠲᠡᠶᠢᠯᠳᠡᠭ ᠶᠣᠮ︾ ᠭᠡᠵᠡᠢ᠃          ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠢᠭᠦᠰᠦ᠂ ᠪᠣᠳᠠᠭ᠎ᠠ ᠶᠢ ᠲᠠᠶᠠᠭᠠᠷ ᠢᠶᠠᠨ ᠬᠤᠪᠢᠶᠠᠯᠴᠠᠵᠦ ᠢᠳᠡᠨ᠎ᠡ᠃ ᠭᠡᠬᠦ ᠳᠡᠭᠡᠨ ᠪᠣᠯᠢᠶᠠᠯᠳᠣᠵᠦ ᠪᠣᠯᠳᠠᠬ ᠦᠭᠡᠢ᠃ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠡᠷᠡᠭᠦᠯ ᠶᠠᠷᠭᠢᠶᠠᠨ ᠭᠠᠷᠪᠠᠯ ᠱᠠᠩᠰᠢ ᠶᠢᠨ  ᠪᠣᠷᠬᠠᠨ ᠬᠢᠯᠢᠩᠨᠡᠵᠦ᠂ ᠭᠤᠷᠪᠠᠨ ᠵᠢᠯ ᠭᠠᠨᠭ᠌ ᠭᠠᠴᠢᠬ ᠪᠣᠯᠬᠤ᠂ ᠵᠠᠭᠤᠷᠮᠠᠬ ᠰᠦᠨᠡᠰᠦ ᠣᠯᠠᠰᠢᠷᠠᠬᠤ᠂ ᠡᠪᠡᠳᠴᠢᠨ ᠬᠢᠵᠢᠭ ᠲᠡᠯᠭᠡᠷᠡᠬᠦ ᠮᠡᠳᠦ ᠶᠢᠨ ᠦᠭᠡᠳᠡ ᠦᠭᠡᠢ ᠣᠴᠢᠷ ᠠᠶᠢᠯ ᠬᠤᠳᠠᠯᠠᠭᠠᠷ ᠤᠨ ᠲᠣᠮᠳᠠ ᠲᠣᠬᠢᠶᠠᠯᠳᠣᠨ᠎ᠠ ᠭᠡᠳᠡᠭ  ᠶᠣᠮ᠃ ︽︿ᠠᠪᠤ ᠶᠢᠨ ᠬᠡᠦᠬᠡᠳ ᠠᠳᠠᠯᠢ ᠦᠭᠡᠢ᠂ ᠠᠷᠪᠠᠨ ᠬᠤᠷᠣᠭᠤ ᠲᠡᠭᠰᠢ ᠦᠭᠡᠢ ᠭᠡᠳᠡᠭ﹀ ᠢᠶᠠᠷ ᠵᠠᠷᠢᠮ  ᠠᠶᠢᠯ ᠤᠨ ᠬᠢᠨ ᠲᠦᠷᠦᠭᠦᠦ ᠬᠡᠳᠦᠨ ᠵᠢᠯ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠤᠭᠤᠷᠣᠨᠳᠦ ᠪᠠᠨ ᠬᠡᠯᠡ ᠠᠮᠠ ᠪᠣᠯᠣᠬᠰᠠᠨ ᠠᠴᠠ ᠭᠤᠷᠪᠠᠨ ᠵᠢᠯ ᠳᠤ ᠲᠣᠰᠣᠯ ᠪᠣᠷᠣᠭᠠᠨ ᠴᠦ ᠣᠷᠣᠬᠰᠠᠨ ᠦᠭᠡᠢ ᠦᠵᠡᠭᠳᠡᠯ ᠴᠦ ᠭᠠᠷᠴᠦ ᠦᠡᠭᠭᠡᠷᠡᠭᠰᠡᠨ ᠶᠣᠮ᠃ ᠲᠡᠭᠷᠢ ᠲᠦᠮᠡᠨ ᠨᠢᠳᠦ ᠲᠠᠢ ᠭᠡᠳᠡᠭ ᠨᠢ ᠦᠨᠡᠨ ᠶᠣᠮ ᠪᠠᠶᠢᠵᠠᠢ᠃ ᠢᠪ ᠢᠯᠡᠬᠡᠨ ᠬᠤᠶᠢᠳᠦ  ᠠᠶᠢᠯ ᠳᠤ ᠪᠣᠷᠣᠭᠠᠨ ᠨᠡᠪᠳᠡᠷᠡᠳᠡᠯ᠎ᠡ ᠣᠷᠣᠬᠰᠠᠨ ᠪᠠᠶᠢᠳᠠᠯ᠎ᠠ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠡᠯᠡ ᠠᠮᠠ ᠪᠣᠯᠵᠦ  ᠦᠡᠭᠭᠡᠷᠡᠭᠰᠡᠨ᠂ ᠪᠡᠯᠴᠢᠭᠡᠷ ᠣᠰᠣ ᠨᠡᠶᠢᠯᠡᠵᠦ ᠪᠠᠶᠢᠭ᠎ᠠ ᠡᠮᠦᠨ᠎ᠡ ᠠᠶᠢᠯ ᠳᠤᠨᠢ ᠲᠣᠰᠣᠯ ᠪᠣᠷᠣᠭᠠᠨ ᠴᠦ ᠣᠷᠣᠬᠤ ᠦᠭᠡᠢ ᠦᠵᠡᠭᠳᠡᠯ ᠭᠠᠷᠳᠠᠬ ᠨᠢ ᠰᠣᠨᠢᠨ ᠡ︾ ᠭᠡᠵᠦ ᠬᠦᠷᠢᠶ᠎ᠡ ᠨᠣᠳᠣᠬᠳᠠᠢ ᠨᠢᠭᠡᠨ ᠲᠠᠷᠢᠶᠠᠴᠢᠨ ᠡᠪᠦᠭᠡᠨ ᠠᠴᠠ ᠬᠠᠭᠤᠴᠢᠯᠠᠵᠦ ᠪᠠᠶᠢᠬᠰᠠᠨ ᠶᠣᠮ᠃ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠬᠡᠯᠡ ᠠᠮᠠ ᠪᠣᠯᠬᠤ ᠠᠴᠠ ᠬᠦᠮᠦᠨ ᠪᠦᠬᠦᠨ ᠬᠢᠴᠢᠶᠡᠳᠡᠭ ᠠᠴᠠ ᠠᠶᠢᠯ ᠠᠶᠢᠮᠠᠬ ᠲᠠᠭᠠᠨ ᠢᠳᠡᠭᠡᠯ ᠲᠠᠢ᠂ ᠲᠦᠪ ᠭᠤᠣᠯᠴᠢ᠂ ᠬᠡᠯᠡ ᠠᠮᠠᠨ ᠳᠠᠭᠠᠨ ᠬᠤᠷᠴᠠ᠂ ᠣᠷᠢᠶᠠᠯᠠᠬᠤ ᠬᠦᠴᠦᠨ ᠢᠶᠠᠷ ᠴᠢᠩᠭ᠎ᠠ ᠨᠢᠭᠡ ᠶᠢ ᠪᠠᠨ ᠪᠦᠭᠦᠳᠡᠭᠡᠷ ᠢᠶᠠᠨ ᠱᠠᠩᠰᠢ ᠬᠠᠮᠢᠶᠠᠷᠣᠬᠴᠢ ᠪᠠᠷ ᠰᠣᠩᠭᠤᠨ ᠭᠠᠷᠭᠠᠵᠦ ᠱᠠᠩᠰᠢ ᠶᠢᠨ ᠬᠡᠰᠢᠭ ᠢ ᠬᠦᠮᠦᠨ ᠪᠦᠷᠢ ᠳᠤ ᠠᠳᠠᠯᠢ ᠲᠡᠭᠰᠢ ᠬᠤᠪᠢᠶᠠᠨ ᠦᠭᠬᠦ ᠶᠢ ᠬᠢᠴᠢᠶᠡᠳᠡᠭ ᠪᠦᠭᠡᠳ ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠬᠰᠠᠨ ᠬᠦᠮᠦᠰ ᠴᠦ ᠡᠷᠦᠢ ᠬᠤᠷᠣᠢ ᠦᠭᠡ ᠶᠠᠷᠢᠵᠦ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠢ ᠬᠢᠯᠢᠩᠨᠡᠭᠦᠯᠬᠦ ᠠᠴᠠ ᠬᠡᠷᠰᠡᠦᠯᠡᠳᠡᠭ᠃ ᠣᠯᠠᠨ ᠢᠶᠠᠷ ᠢᠶᠠᠨ ᠱᠠᠩᠰᠢ ᠶᠢᠨ ᠬᠡᠰᠢᠭ ᠢ ᠬᠦᠷᠳᠡᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠱᠠᠩᠰᠢ ᠶᠢᠨ ᠰᠢᠭᠦᠰᠦ ᠪᠣᠳᠠᠭ᠎ᠠ ᠨᠢ ᠪᠠᠰᠠ ᠦᠯᠡᠳᠡᠪᠦᠷᠢ ᠲᠠᠢ ᠪᠠᠶᠢᠪᠠᠯ ᠬᠡᠨ ᠬᠦᠮᠦᠨ ᠴᠦ ᠭᠡᠰᠡᠨ ᠭᠡᠷ ᠲᠡᠭᠡᠨ ᠠᠪᠠᠴᠢᠵᠦ ᠪᠣᠯᠳᠠᠬ ᠦᠭᠡᠢ ᠶᠣᠮ᠃ ᠱᠠᠩᠰᠢ ᠶᠢᠨ ᠬᠡᠰᠢᠭ ᠢ ᠭᠡᠷ ᠲᠡᠭᠡᠨ ᠬᠤᠯᠠᠭᠤᠵᠦ ᠠᠪᠠᠴᠢᠬᠰᠠᠨ ᠬᠦᠮᠦᠨ ᠪᠠᠶᠢᠪᠠᠯ ᠠᠶᠢᠯ ᠲᠣᠰᠬᠤᠨ ᠳᠤ ᠬᠤᠯᠠᠭᠠᠢᠢᠴᠢ ᠲᠡᠭᠡᠷᠡᠮ ᠰᠠᠮᠠᠭᠤᠷᠠᠵᠦ᠂ ᠱᠠᠩᠰᠢ ᠶᠢᠨ ᠬᠡᠰᠢᠭ ᠬᠤᠯᠠᠭᠠᠢᠢᠯᠠᠬᠰᠠᠨ ᠬᠦᠮᠦᠨ ᠤ ᠭᠡᠷ ᠲᠤ ᠠᠶᠣᠯ ᠭᠠᠮᠰᠢᠬ ᠪᠣᠯᠣᠨ᠎ᠠ ᠭᠡᠵᠦ ᠣᠯᠠᠨ ᠢᠶᠠᠷ ᠢᠶᠠᠨ ᠦᠵᠡᠳᠡᠭ ᠠᠴᠠ ᠦᠯᠡᠳᠡᠭᠰᠡᠨ ᠱᠠᠩᠰᠢ ᠶᠢᠨ ᠴᠠᠪ ᠢᠶᠠᠨ ᠰᠢᠳᠠᠭᠠᠬᠤ ᠪᠣᠶᠣ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠬᠠᠪᠢ ᠳᠤ ᠨᠦᠬᠡ ᠮᠠᠯᠳᠠᠭᠠᠳ ᠢᠷᠦᠭᠡᠯ᠂ ᠨᠣᠮ ᠣᠡᠭᠰᠢᠵᠦ  ᠪᠠᠶᠢᠭᠠᠳ ᠪᠣᠯᠠᠵᠦ ᠬᠠᠶᠠᠬᠤ ᠶᠣᠰᠣ ᠪᠠᠶᠢᠳᠠᠬ᠃ ᠨᠣᠮ ᠣᠡᠭᠰᠢᠬᠤ ᠦᠢᠯᠡ ᠶᠢ ᠱᠠᠩᠰᠢ ᠶᠢᠨ ᠵᠠᠯᠠᠯᠭ᠎ᠠ ᠳᠤ ᠢᠷᠡᠭᠰᠡᠨ  ᠯᠠᠮᠠ ᠨᠠᠷ ᠠᠴᠠ ᠬᠦᠢᠴᠡᠳᠭᠡᠳᠡᠭ᠃          ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠣᠷᠣᠬᠰᠢ ᠲᠠᠢ ᠪᠣᠯᠪᠠᠯ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠨᠢ ᠮᠣᠳᠣᠨ ᠳᠠᠭᠠᠨ ᠲᠦᠷᠭᠡᠨ ᠵᠠᠯᠠᠷᠠᠨ ᠰᠠᠭᠠᠳᠠᠭᠠᠳ ᠰᠡᠳᠭᠢᠯ ᠰᠠᠨᠠᠭ᠎ᠠ ᠨᠢ ᠬᠦᠭᠰᠡᠨ ᠪᠠᠶᠠᠰᠴᠦ ᠲᠠᠬᠢᠯᠭ᠎ᠠ ᠶᠢᠨ ᠦᠢᠯᠡ ᠪᠠᠷᠠᠬᠤ ᠠᠴᠠ ᠡᠮᠦᠨ᠎ᠡ  ᠵᠦᠭᠡᠯᠡᠨ ᠰᠠᠯᠬᠢ ᠬᠦᠳᠡᠯᠭᠡᠵᠦ᠂ ᠴᠢᠬᠢᠭ ᠤᠨ ᠦᠨᠦᠷ ᠰᠡᠩᠭᠢᠨᠡᠭᠦᠯᠦᠨ ᠡᠭᠦᠯᠡ ᠡᠪᠬᠡᠷᠡᠯᠳᠦᠭᠦᠯᠵᠦ ᠬᠤᠷ᠎ᠠ  ᠪᠣᠷᠣᠭᠠᠨ ᠢᠶᠠᠨ ᠵᠠᠯᠠᠨ ᠪᠠᠭᠤᠯᠭᠠᠳᠠᠬ ᠶᠣᠮ ᠭᠡᠨ᠎ᠡ᠃             ᠱᠠᠩᠰᠢ ᠪᠠᠶᠠᠰᠬᠠᠬᠤ ᠶᠣᠰᠣᠨ          ᠱᠠᠩᠰᠢ ᠪᠠᠨ ᠡᠷᠭᠢᠵᠦ᠂ ᠱᠠᠩᠰᠢ ᠳᠠᠭᠠᠨ ᠰᠢᠭᠦᠰᠦ ᠡᠷᠭᠦᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠮᠣᠩᠭᠤᠯ ᠤᠨ ᠣᠯᠠᠮᠵᠢᠯᠠᠯᠳᠦ ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠣᠮ ᠢ ᠶᠠᠪᠣᠬᠳᠠᠭᠤᠯᠳᠠᠬ᠃ ᠡᠭᠦᠨ ᠳᠤ ︽ᠰᠣᠷ ᠬᠠᠷᠪᠣᠬᠤ︾ ︽ᠪᠦᠬᠡ  ᠪᠠᠷᠢᠯᠳᠣᠬᠤ︾ ︽ᠮᠣᠷᠢ ᠣᠷᠣᠯᠳᠣᠬᠤ︾ ᠵᠡᠷᠭᠡ ᠪᠠᠭᠳᠠᠨ᠎ᠠ᠃ ᠡᠭᠦᠨ ᠢᠶᠠᠨ ᠪᠠᠰᠠ ᠬᠤᠷᠴᠢᠨᠴᠣᠳ ︽ᠱᠠᠩᠰᠢ  ᠪᠠᠶᠠᠰᠬᠠᠬᠤ︾ ᠭᠡᠳᠡᠭ᠃          ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠠᠪᠣᠬᠳᠠᠭᠤᠯᠵᠦ ᠪᠠᠶᠢᠭ᠎ᠠ ᠴᠢᠮᠡᠭᠡ ᠪᠠᠷ ᠬᠤᠯᠠ ᠣᠢᠢᠷ᠎ᠠ ᠶᠢᠨ ᠠᠶᠢᠯ ᠲᠣᠰᠬᠤᠨ ᠤ ᠨᠡᠷᠡᠳᠦ ᠪᠦᠭᠡᠴᠤᠳ᠂ ᠬᠠᠪᠣᠳᠦ ᠰᠣᠷᠴᠢᠳ᠂ ᠬᠤᠷᠳᠣᠨ ᠮᠣᠷᠢᠨ ᠤ ᠣᠶᠠᠭᠠᠴᠢᠳ ᠱᠠᠩᠰᠢ ᠶᠢᠨ ᠨᠠᠶᠢᠷ ᠲᠤ  ᠣᠷᠣᠯᠴᠠᠬᠤ ᠭᠡᠵᠦ ᠬᠤᠷᠠᠨ ᠴᠣᠬᠯᠠᠷᠠᠵᠦ ᠨᠠᠶᠢᠷ ᠲᠤ ᠬᠦᠷ ᠨᠡᠮᠡᠳᠡᠭ᠃ ᠡᠶᠢᠮᠦᠷᠬᠦᠤ ᠨᠠᠶᠢᠷ ᠨᠢ ᠵᠠᠷᠢᠮ ᠭᠠᠵᠠᠷ ᠲᠤ ᠬᠤᠶᠠᠷ ᠭᠤᠷᠪᠠᠨ ᠡᠳᠦᠷ ᠢᠶᠠᠷ ᠦᠷᠭᠦᠯᠵᠢᠯᠡᠳᠡᠭ ᠴᠦ ᠪᠣᠢ᠃ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠨᠢ ᠨᠠᠶᠢᠷ ᠬᠦᠷ ᠲᠤ ᠲᠣᠷᠠᠳᠠᠢ ᠡᠪᠦᠬᠡᠨ ᠰᠠᠬᠢᠭᠤᠰᠣ ᠪᠣᠯᠬᠤᠷ ᠨᠠᠶᠢᠷ ᠨᠠᠭᠠᠳᠣᠮ ᠨᠢ ᠪᠦᠷ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠣᠷᠴᠢᠮ ᠳᠤ ᠶᠠᠪᠣᠬᠳᠠᠳᠠᠬ ᠪᠠᠶᠢᠵᠠᠢ᠃ ᠱᠠᠩᠰᠢ ᠶᠢᠨ ᠨᠠᠶᠢᠷ ᠲᠤ ᠲᠡᠷᠢᠭᠦᠯᠡᠭᠰᠡᠨ ᠮᠣᠷᠢ᠂ ᠪᠦᠬᠡ᠂ ᠬᠠᠷᠪᠣᠭᠠᠴᠢᠨ ᠵᠡᠷᠭᠡ ᠪᠠᠨ ᠪᠠᠰᠠ ︽ᠱᠠᠩᠰᠢ ᠶᠢᠨ ᠨᠠᠶᠢᠷ ᠲᠤ ᠬᠡᠳᠦ ᠣᠳᠠᠭ᠎ᠠ ᠲᠡᠷᠢᠭᠦᠯᠡᠭᠰᠡᠨ︾ ᠭᠡᠵᠦ ᠠᠯᠳᠠᠷ ᠴᠣᠯᠠ ᠶᠢ ᠨᠢ ᠡᠷᠭᠦᠨ ᠢᠷᠦᠬᠡᠨ ᠮᠠᠬᠳᠠᠵᠦ  ᠱᠠᠩᠰᠢ ᠶᠢᠨ ᠱᠠᠩ ᠬᠦᠷᠳᠡᠭᠡᠳᠡᠭ ᠠᠴᠠ ᠱᠠᠩᠰᠢ ᠲᠠᠬᠢᠬᠰᠠᠨ ᠠᠶᠢᠯ ᠲᠣᠰᠬᠤᠨ ᠤ ᠬᠢᠨ ᠴᠦ ᠱᠠᠩᠰᠢ ᠶᠢᠨ ᠲᠡᠷᠢᠬᠦᠨ ᠢᠶᠠᠨ ᠪᠣᠰᠣᠳ ᠲᠤ ᠠᠯᠳᠠᠬᠤ ᠦᠭᠡᠢ ᠭᠡᠵᠦ ᠨᠠᠶᠢᠷ ᠲᠤ ᠢᠳᠡᠪᠬᠢᠳᠡᠢ ᠣᠷᠣᠯᠴᠠᠵᠦ ᠰᠠᠶᠢᠨ ᠮᠣᠷᠢ᠂ ᠰᠠᠶᠢᠨ ᠬᠠᠷᠪᠣᠭᠠᠴᠢ᠂ ᠰᠠᠶᠢᠨ ᠪᠦᠬᠡᠴᠦᠳ ᠢᠶᠠᠨ ᠭᠠᠷᠭᠠᠵᠦ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠢᠶᠠᠨ ᠪᠠᠶᠠᠰᠠᠬᠳᠠᠬ᠃ ᠨᠠᠶᠢᠷ ᠦᠨᠳᠦᠷᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠱᠠᠩᠰᠢ ᠲᠠᠬᠢᠬᠴᠢᠳ ᠠᠴᠠ ᠱᠠᠩᠰᠢ ᠶᠢᠨ ᠬᠡᠰᠢᠭ ᠢᠶᠠᠨ ᠬᠦᠷᠳᠡᠵᠦ ᠨᠢᠭᠡ ᠵᠢᠯ ᠤᠨ  ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠠᠵᠢᠯ ᠢᠶᠠᠨ ᠬᠤᠷᠢᠶᠠᠳᠠᠬ᠃ ᠭᠡᠪᠡᠴᠦ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠢ ᠡᠷᠭᠢᠯᠡᠨ ᠶᠠᠪᠣᠬᠳᠠᠭᠤᠯᠪᠠᠯ ᠵᠠᠪᠠᠯ ᠭᠤᠷᠪᠠᠨ ᠵᠢᠯ ᠲᠠᠷᠠᠭᠠᠯᠠᠨ ᠲᠣᠬᠳᠠᠬᠰᠠᠨ ᠡᠳᠦᠷ ᠲᠡᠭᠡᠨ ᠵᠠᠪᠡᠯ ᠬᠢᠬᠦ ᠶᠣᠰᠣᠳᠠᠢ ᠪᠠᠶᠢᠳᠠᠬ᠃ ᠬᠡᠷᠪᠡ ᠭᠤᠷᠪᠠᠨ ᠵᠢᠯ ᠤᠨ ᠲᠤᠭ᠎ᠠ ᠬᠤᠭᠤᠴᠠᠭ᠎ᠠ ᠨᠢ ᠭᠦᠢᠴᠡᠬᠦ ᠦᠭᠡᠢ ᠪᠣᠯ ᠱᠠᠩᠰᠢ ᠶᠢᠨ ᠪᠣᠷᠬᠠᠨ ᠭᠤᠮᠣᠷᠬᠠᠵᠦ ᠭᠠᠨᠭ᠌ ᠭᠠᠴᠢᠭ ᠪᠣᠯᠣᠭᠠᠳ ᠬᠡᠴᠢᠨᠡᠬᠡᠨ ᠣᠳᠠᠭ᠎ᠠ ᠲᠠᠬᠢᠯᠭ᠎ᠠ ᠶᠠᠪᠣᠬᠳᠠᠭᠤᠯᠣᠬᠰᠠᠨ ᠴᠦ ᠪᠣᠷᠣᠭᠠᠨ ᠬᠤᠷ᠎ᠠ ᠪᠠᠭᠤᠬᠤ ᠦᠭᠡᠢ ᠶᠣᠮ ᠭᠡᠨ᠎ᠡ᠃ ᠨᠣᠳᠤᠬ ᠤᠨ ᠬᠦᠮᠦᠰ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ᠄ ︽ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠲᠠᠪᠤᠨᠮᠣᠳᠦ ᠭᠠᠴᠠᠭᠠᠨ ᠤ ᠴᠣᠬᠴᠢᠭᠦᠦ ᠭᠡᠳᠡᠭ ᠠᠶᠢᠯ ᠨᠢ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠶᠡᠷᠡᠨ ᠨᠠᠢᠮᠠᠨ ᠣᠨ ᠤ ᠶᠡᠭᠡ ᠦᠶᠡᠷ ᠣᠰᠣᠳᠣᠯ ᠤᠨ ᠦᠶ᠎ᠡ ᠳᠤ᠂ ᠪᠣᠰᠣᠳ ᠠᠶᠢᠯ ᠤᠨ ᠬᠢᠨ ᠬᠠᠰᠢᠯᠭ᠎ᠠ ᠪᠣᠰᠬᠠᠭᠠᠳ ᠶᠠᠭᠠᠷᠠᠵᠦ ᠪᠠᠶᠢᠬᠤ ᠳᠤ  ᠡᠨᠡ ᠠᠶᠢᠯ ᠤᠨ ᠬᠢᠨ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠠᠪᠣᠬᠳᠠᠭᠤᠯᠵᠦ ᠪᠠᠶᠢᠯ᠎ᠠ︾ ᠭᠡᠳᠡᠭ᠃ ᠡᠭᠦᠨ ᠤ ᠲᠣᠬᠠᠢ ᠲᠣᠰ ᠠᠶᠢᠯ ᠤᠨ ᠲᠠᠷᠢᠶᠠᠴᠢᠨ ᠪᠠᠢ ᠬᠤ᠋ ᠬᠠᠭᠤᠴᠢᠯᠠᠬᠤ ᠳᠠᠭᠠᠨ᠄ ︽ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠶᠡᠷᠡᠨ ᠵᠢᠷᠭᠤᠭᠠᠨ ᠣᠨ ᠳᠤ  ᠮᠠᠨ ᠤ ᠡ᠊ᠨᠳᠡ ᠶᠡᠭᠡ ᠭᠠᠨᠭ᠌ ᠬᠠᠭᠰᠠᠷᠠᠭᠠᠨ ᠪᠣᠯᠵᠦ ᠪᠢᠳᠠᠨ ᠤ ᠠᠶᠢᠯ ᠲᠣᠰᠬᠤᠨ ᠢᠶᠠᠷ ᠢᠶᠠᠨ ᠱᠠᠩᠰᠢ ᠶᠢᠨ ᠮᠣᠳᠣ ᠪᠠᠨ ᠲᠠᠬᠢᠬᠰᠠᠨ ᠶᠣᠮ᠃ ᠶᠡᠷᠡᠨ ᠲᠣᠯᠣᠭᠠᠨ ᠣᠨ ᠴᠦ ᠭᠠᠶᠢᠭᠤᠢ᠂ ᠶᠡᠷᠡᠨ ᠨᠡᠢᠮᠡᠨ ᠣᠨ ᠳᠤ ᠬᠤᠷ᠎ᠠ ᠪᠣᠷᠣᠭᠠᠨ  ᠶᠡᠬᠡᠳᠦᠭᠡᠳ ᠡᠷᠭᠢᠨ ᠲᠣᠭᠤᠷᠢᠨ ᠤ ᠠᠶᠢᠯ ᠲᠣᠰᠬᠤᠨ ᠳᠤ ᠶᠡᠭᠡ ᠦᠶᠡᠷ ᠣᠰᠤᠳᠣᠯ ᠪᠣᠯᠣᠬᠰᠠᠨ ᠶᠣᠮ᠃ ᠭᠡᠪᠡᠴᠦ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠶᠠᠪᠣᠬᠳᠠᠭᠤᠯᠪᠠᠯ ᠵᠠᠪᠠᠯ ᠭᠤᠷᠪᠠᠨ ᠵᠢᠯ ᠲᠠᠷᠠᠭᠠᠯᠠᠨ ᠲᠣᠬᠳᠠᠬᠰᠠᠨ ᠡᠳᠦᠷ ᠲᠡᠭᠡᠨ ᠲᠠᠬᠢᠯᠭ᠎ᠠ ᠲᠠᠯᠪᠢᠬᠤ ᠶᠣᠰᠣᠳᠠᠢ ᠭᠡᠳᠡᠭ ᠲᠡᠭᠡᠳᠦ ᠠᠴᠠ ᠣᠯᠠᠮᠵᠢᠯᠠᠬᠰᠠᠨ ᠶᠣᠰᠣ ᠪᠠᠶᠢᠳᠠᠬ ᠪᠣᠯᠬᠤᠷ ᠪᠢᠳᠡ ᠠᠷᠭ᠎ᠠ ᠦᠭᠡᠢ ᠶᠡᠷᠡᠨ ᠨᠠᠢᠮᠠᠨ ᠣᠨ ᠳᠤ ᠪᠠᠰᠠ ᠱᠠᠩᠰᠢ ᠶᠢᠨ ᠲᠠᠬᠢᠯᠭ᠎ᠠ ᠪᠠᠨ ᠶᠠᠪᠣᠬᠳᠠᠭᠤᠯᠵᠠᠢ᠃ ᠪᠠᠰᠠ ᠨᠢᠭᠡ ᠠᠪᠴᠦ ᠬᠡᠯᠡᠪᠡᠯ᠂ ᠮᠠᠩᠬᠠᠨ  ᠨᠣᠳᠤᠬ ᠲᠤ ᠦᠶᠡᠷ ᠣᠰᠣᠳᠣᠯ ᠤᠨ ᠭᠠᠮᠰᠢᠬ ᠡᠭᠦᠰᠬᠦ ᠨᠢ ᠲᠣᠩ ᠴᠦᠬᠡᠨ᠃ ᠬᠠᠷᠢᠨ ᠨᠢᠭᠡᠯᠬᠡᠨ ᠭᠠᠷᠠᠬ ᠬᠤᠷ᠎ᠠ  ᠪᠠᠭᠤᠬᠤ ᠦᠭᠡᠢ ᠪᠣᠯ ᠭᠠᠨᠭ᠌ ᠭᠠᠴᠢᠬ ᠪᠣᠯᠴᠢᠬᠠᠳᠠᠬ ᠪᠣᠯᠬᠤᠷ ᠣᠯᠠᠮᠵᠢᠯᠠᠯᠳᠦ ᠶᠣᠰᠣ ᠪᠠᠨ ᠡᠷᠡᠰ ᠪᠠᠷᠢᠮᠳᠠᠯᠠᠬᠤ ᠶᠢ  ᠠᠶᠢᠯ ᠬᠤᠳᠠᠯᠠᠭᠠᠷ ᠢᠶᠠᠨ ᠰᠠᠨᠠᠯ ᠨᠢᠭᠡᠳᠡᠢ ᠵᠦᠪᠰᠢᠶᠡᠷᠡᠭᠰᠡᠨ ᠶᠣᠮ︾ ᠭᠡᠵᠡᠢ᠃          ᠮᠣᠩᠭᠤᠯᠴᠣᠳ ᠡᠷᠳᠡ ᠲᠡᠭᠡᠳᠦ ᠦᠶ᠎ᠡ ᠠᠴᠠ ᠪᠠᠨ ᠣᠰᠣᠨ ᠤ ᠲᠣᠩᠭᠠᠯᠠᠬ ᠡᠪᠡᠰᠦᠨ ᠤ ᠰᠣᠷᠭᠤᠬ ᠢ ᠲᠠᠭᠠᠵᠦ  ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠦ᠂ ᠡᠬᠡ ᠪᠠᠶᠢᠭᠠᠯᠢ ᠲᠠᠢ ᠪᠠᠨ ᠵᠣᠬᠢᠴᠠᠯᠳᠣᠨ ᠠᠮᠢᠳᠣᠷᠠᠬᠰᠠᠭᠠᠷ ᠢᠷᠡᠪᠡ᠃ ᠡᠬᠡ  ᠪᠠᠶᠢᠭᠠᠯᠢ ᠶᠢᠨ ᠢᠶᠠᠨ ᠣᠡᠭᠭᠤᠨ ᠲᠠᠷᠬᠠᠨ ᠲᠦᠷᠢ ᠲᠦᠷᠬᠦ ᠶᠢ ᠵᠠᠭᠤᠨ ᠮᠢᠩᠭᠠᠨ ᠵᠢᠯ ᠢᠶᠠᠷ ᠬᠠᠮᠠᠭᠠᠯᠠᠵᠦ ᠬᠢᠮᠠᠭᠠᠳᠠᠵᠦ ᠢᠷᠡᠬᠦ ᠳᠡᠭᠡᠨ ᠠᠮᠢᠳᠠᠨ ᠪᠣᠳᠠᠰ ᠢᠶᠠᠨ ᠰᠠᠬᠢᠭᠤᠯᠰᠣᠨᠴᠢᠯᠠᠨ ᠰᠢᠳᠦᠬᠦ ᠠᠷᠭ᠎ᠠ ᠪᠠᠷᠢᠯ ᠢᠶᠠᠷ ᠪᠠᠶᠢᠭᠠᠯᠢ ᠲᠠᠢ ᠪᠠᠨ ᠰᠠᠨᠠᠭ᠎ᠠ ᠪᠠᠨ ᠣᠯᠣᠯᠴᠠᠵᠦ ᠪᠠᠶᠢᠵᠠᠢ᠃ ᠮᠣᠩᠭᠤᠯᠴᠣᠳ ᠤᠨ ᠲᠣᠮᠳᠠ ︽ᠠᠭᠤᠯᠠ ᠪᠣᠯᠭᠠᠨ ᠳᠤ ᠰᠠᠬᠢᠭᠤᠰᠣ ᠲᠠᠢ᠂ ᠣᠷᠭᠤᠮᠠᠯ ᠪᠣᠯᠭᠠᠨ ᠳᠤ ᠡᠵᠡᠳ ᠲᠠᠢ︾ ᠭᠡᠵᠦ ᠶᠠᠷᠢᠬᠳᠠᠳᠠᠬ ᠠᠴᠠ ᠲᠡᠳᠡ ᠠᠭᠤᠯᠠ ᠠᠴᠠ ᠣᠷᠭᠤᠮᠠᠯ᠂ ᠣᠰᠣ᠂ ᠴᠢᠮᠬᠢ ᠰᠢᠷᠣᠢ ᠳᠠᠭᠠᠨ ᠬᠦᠷᠳᠡᠯ᠎ᠡ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠵᠦ ᠰᠢᠳᠣᠨ ᠪᠢᠰᠢᠷᠡᠭᠰᠡᠭᠡᠷ ᠢᠷᠡᠪᠡ᠃ ᠬᠤᠵᠢᠮ ᠨᠢ ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠨᠢ ᠬᠡᠳᠦ᠋ᠢᠪᠡᠷ ᠨᠡᠪᠴᠢᠨ ᠣᠷᠣᠵᠦ ᠢᠷᠡᠭᠰᠡᠨ ᠪᠣᠯᠪᠠᠴᠦ ᠲᠡᠳᠡᠡ ᠤ ᠡᠬᠡ ᠪᠠᠶᠢᠭᠠᠯᠢ ᠪᠠᠨ ᠰᠢᠳᠦᠨ ᠪᠢᠰᠢᠷᠡᠵᠦ᠂ ᠬᠠᠶᠢᠷᠠᠯᠠᠵᠦ᠂ ᠬᠠᠮᠠᠭᠠᠯᠠᠬᠤ ᠵᠠᠩ ᠵᠠᠩᠰᠢᠯ ᠨᠢ ᠠᠯᠳᠠᠬᠳᠠᠭ᠎ᠠ ᠦᠭᠡᠢ ᠪᠠᠷ ᠣᠳᠣ ᠳᠤ ᠲᠣᠯᠳᠠᠯ᠎ᠠ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃             ᠱᠠᠩᠰᠢ ᠶᠢᠨ ᠮᠣᠳᠣ ᠪᠠᠷ ᠵᠢᠷᠣᠬᠠᠢ ᠦᠵᠡᠬᠦ ᠠᠷᠭ᠎ᠠ          ᠬᠤᠷᠴᠢᠨᠴᠣᠳ ᠤᠨ ᠲᠣᠮᠳᠠ ︽ᠱᠠᠩᠰᠢ ᠶᠢᠨ ᠮᠣᠳᠣ ᠶᠢ ᠰᠢᠨᠵᠢᠵᠦ ᠵᠢᠯ ᠤᠨ ᠦᠡᠭᠭᠡ ᠶᠢ ᠪᠠᠷᠣᠬᠴᠠᠭᠠᠯᠠᠨ ᠮᠡᠳᠡᠬᠦ︾ ᠨᠢᠭᠤᠴᠠ ᠨᠢᠭᠡᠨ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠣᠳᠣ ᠳᠤ ᠲᠣᠯᠳᠠᠯ᠎ᠠ ᠣᠯᠠᠮᠵᠢᠯᠠᠬᠳᠠᠵᠦ ᠢᠷᠡᠵᠡᠢ᠃ ᠭᠡᠪᠡᠴᠦ ᠡᠨᠡ ᠬᠦ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠢ ᠬᠤᠷᠴᠢᠨᠴᠣᠳ ᠪᠦᠬᠦᠨ ᠮᠡᠳᠡᠬᠦ ᠪᠢᠰᠢ ᠴᠦᠬᠡᠨ ᠲᠣᠭᠠᠨ ᠤ ᠠᠵᠢᠬᠴᠢ ᠬᠢᠷᠠᠬᠠᠢ ᠨᠠᠰᠣᠳᠠᠶᠢᠴᠣᠣᠯ ᠯᠡ ᠰᠠᠶ᠋ᠢ ᠮᠡᠳᠡᠳᠡᠭ ᠪᠣᠯᠪᠠᠴᠦ ᠪᠦᠷᠢᠨ ᠮᠡᠳᠡᠭᠴᠢᠳ ᠲᠣᠩ ᠴᠦᠬᠡᠨ ᠪᠠᠶᠢᠨ᠎ᠠ᠃ ᠱᠠᠩᠰᠢ ᠶᠢᠨ ᠮᠣᠳᠣ ᠪᠠᠷ ᠵᠢᠷᠣᠬᠠᠢ ᠰᠢᠨᠵᠢᠬᠦ ᠳᠤ ᠶᠠᠭᠤᠨ ᠤ ᠣᠷᠢᠳ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠵᠣᠭᠠᠯᠠᠬᠤ᠂ ᠨᠠᠪᠴᠢᠯᠠᠬᠤ᠂ ᠬᠦᠬᠡᠷᠡᠬᠦ᠂ ᠨᠠᠪᠴᠢ ᠨᠢ ᠰᠢᠷᠡᠯᠠᠬᠤ ᠳᠤᠨᠢ ᠬᠦᠷᠳᠡᠯ᠎ᠡ ᠨᠢᠬᠳᠠ ᠰᠢᠨᠵᠢᠯᠡᠵᠦ ᠡᠳᠦᠷ᠂ ᠰᠠᠷ᠎ᠠ᠂ ᠣᠯᠠᠷᠢᠯ ᠲᠠᠢ ᠬᠠᠷᠭᠤᠭᠤᠯᠣᠨ ᠰᠢᠨᠵᠢᠯᠡᠬᠦ ᠴᠢᠬᠤᠯᠠᠳᠠᠢ ᠶᠣᠮ᠃ ᠡᠨᠡ ᠬᠦ ᠠᠷᠭ᠎ᠠ ᠶᠢᠨ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠣᠷᠭᠤᠮᠠᠯ᠂ ᠠᠮᠢᠳᠠᠨ ᠨᠢ ᠵᠢᠯ ᠤᠨ ᠦᠡᠭᠭᠡ ᠶᠢ ᠲᠠᠨᠢᠵᠦ ᠮᠡᠳᠡᠬᠦ ᠲᠠᠯ᠎ᠠ ᠪᠠᠷ ᠬᠦᠮᠦᠨ ᠠᠴᠠ ᠬᠠᠪᠢ ᠦᠭᠡᠢ ᠮᠡᠷᠭᠡᠨ ᠪᠠᠶᠢᠳᠠᠬ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠱᠠᠩᠰᠢ ᠶᠢᠨ ᠮᠣᠳᠣ ᠨᠢ ᠣᠷᠳᠦ ᠣᠳᠠᠭᠠᠨ ᠰᠠᠯᠬᠢ ᠪᠣᠷᠣᠭᠠᠨ ᠢ ᠦᠡᠭᠭᠡᠷᠡᠭᠦᠯᠵᠦ ᠣᠨ ᠵᠢᠯ ᠣᠳᠠᠬᠰᠠᠨ ᠮᠣᠳᠣ ᠪᠣᠯᠬᠤᠷ ᠦᠨᠳᠦᠰᠦ ᠨᠢ ᠬᠤᠯᠠ ᠭᠦᠶᠦᠵᠦ᠂ ᠨᠠᠪᠴᠢ ᠨᠠᠮᠠᠭ᠎ᠠ ᠨᠢ ᠶᠡᠭᠡ ᠪᠠᠷ ᠰᠢᠬᠦᠷᠯᠡᠨ ᠣᠷᠭᠤᠳᠠᠬ ᠠᠴᠠ ᠪᠠᠶᠢᠭᠠᠯᠢ ᠶᠢᠨ ᠠᠭᠤᠷ ᠠᠮᠢᠰᠬᠤᠯ ᠢ ᠲᠠᠨᠢᠬᠤ ᠲᠠᠯ᠎ᠠ ᠪᠠᠷ ᠣᠨᠣᠪᠴᠢᠳᠠᠢ ᠪᠠᠶᠢᠳᠠᠬ᠃ ᠱᠠᠩᠰᠢ ᠶᠢᠨ ᠮᠣᠳᠣ ᠠᠴᠠ ᠴᠠᠬ ᠠᠭᠤᠷ ᠢ ᠰᠢᠨᠵᠢᠬᠦ ᠶᠢ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠭᠡᠵᠦ ᠬᠡᠯᠡᠭᠰᠡᠨ ᠴᠦ ᠪᠣᠯᠣᠨ᠎ᠠ᠃ ᠪᠠᠰᠠ ᠠᠵᠢᠬᠴᠢ ᠬᠢᠷᠠᠬᠠᠢ ᠬᠦᠮᠦᠰ ᠤᠨ ᠰᠢᠨᠵᠢᠯᠡᠨ ᠰᠣᠳᠣᠯᠵᠦ ᠮᠡᠳᠡᠭᠰᠡᠨ ᠠᠮᠢᠳᠣᠷᠠᠯ ᠤᠨ ᠲᠣᠮᠳᠠᠬᠢ ᠲᠣᠷᠰᠢᠯᠭ᠎ᠠ ᠭᠡᠵᠦ ᠶᠠᠷᠢᠬᠰᠠᠨ ᠴᠦ ᠪᠣᠯᠣᠨ᠎ᠠ︾ ᠭᠡᠵᠡᠢ᠃ ᠱᠠᠩᠰᠢ ᠶᠢᠨ ᠮᠣᠳᠣ ᠶᠢ ᠭᠤᠣᠯᠳᠠᠭᠤ ᠬᠠᠪᠣᠷ᠂ ᠵᠣᠨ ᠤ ᠣᠯᠠᠷᠢᠯ ᠳᠤ  ᠰᠢᠨᠵᠢᠳᠡᠭ ᠶᠣᠮ᠃ ᠲᠣᠣᠷ᠎ᠠ ᠬᠡᠳᠦᠨ ᠠᠷᠭ᠎ᠠ ᠠᠴᠠ ᠬᠤᠪᠢᠶᠠᠯᠴᠠᠶ᠎ᠠ᠃          ᠬᠠᠪᠣᠷ ᠤᠨ ᠣᠯᠠᠷᠢᠯ ᠳᠤ ᠱᠠᠩᠰᠢ ᠶᠢᠨ ᠮᠣᠳᠣ ᠶᠢ ᠰᠢᠨᠵᠢᠬᠦ ᠠᠷᠭ᠎ᠠ᠃ ᠬᠠᠪᠣᠷ ᠤᠨ ᠣᠯᠠᠷᠢᠯ ᠳᠤ ᠭᠤᠣᠯᠳᠠᠭᠤ ᠱᠠᠩᠰᠢ ᠶᠢᠨ ᠮᠣᠳᠣ ᠪᠠᠷ ᠵᠢᠯ ᠤᠨ ᠬᠤᠷ᠎ᠠ ᠪᠣᠷᠣᠭᠠᠨ᠂ ᠰᠠᠯᠬᠢ᠂ ᠡᠪᠡᠳᠴᠢᠨ ᠬᠢᠵᠢᠭ ᠵᠡᠷᠭᠡ ᠶᠢ ᠰᠢᠨᠵᠢᠯᠡᠳᠡᠭ᠃ ᠬᠠᠪᠣᠷ ᠮᠣᠳᠣ ᠬᠦᠯᠦᠭᠡᠯᠡᠬᠦ ᠦᠶᠡᠰ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠡᠭᠡᠪᠦᠷ ᠲᠠᠯ᠎ᠠ ᠨᠢ ᠡᠷᠳᠡ ᠬᠦᠯᠦᠭᠡᠯᠡᠭᠰᠡᠨ ᠪᠠᠶᠢᠪᠠᠯ ᠵᠣᠨ ᠤ ᠣᠯᠠᠷᠢᠯ ᠤᠨ ᠡᠬᠢᠨ ᠰᠠᠷ᠎ᠠ ᠪᠠᠷ ᠪᠣᠷᠣᠭᠠᠨ ᠬᠤᠷ᠎ᠠ ᠴᠦᠬᠡᠨ᠂ ᠲᠣᠮᠳᠠ ᠰᠠᠷ᠎ᠠ ᠪᠠᠷ ᠪᠣᠷᠣᠭᠠᠨ ᠬᠤᠷ᠎ᠠ ᠡᠯᠪᠡᠭ ᠃ ᠰᠡᠭᠦᠳᠡᠷ ᠲᠠᠯ᠎ᠠ ᠶᠢᠨ ᠬᠢᠨ ᠡᠷᠳᠡ ᠬᠦᠯᠦᠭᠡᠯᠡᠭᠰᠡᠨ ᠪᠠᠶᠢᠪᠠᠯ ᠬᠠᠪᠣᠷ ᠤᠨ ᠲᠠᠷᠢᠯᠭ᠎ᠠ ᠶᠢᠨ ᠬᠤᠭᠤᠴᠠᠭᠠᠨ ᠳᠤ  ᠪᠣᠷᠣᠭᠠᠨ ᠬᠤᠷ᠎ᠠ ᠲᠣᠳᠠᠬᠤ ᠦᠭᠡᠢ᠃ ᠪᠦᠬᠦᠳᠡᠭᠡᠷ ᠢᠶᠠᠨ ᠵᠢᠭᠳᠡ ᠭᠦᠯᠦᠭᠡᠯᠡᠭᠰᠡᠨ ᠪᠠᠶᠢᠪᠠᠯ ᠪᠣᠷᠣᠭᠠᠨ ᠬᠤᠷ᠎ᠠ  ᠲᠡᠭᠰᠢᠬᠡᠨ ᠵᠢᠯ ᠪᠣᠯᠣᠨ᠎ᠠ᠃ ᠬᠠᠶᠢᠯᠠᠰᠣᠨ ᠱᠠᠩᠰᠢ ᠵᠣᠭᠠᠯᠠᠬᠤ ᠦᠶᠡᠰ ᠲᠤ ᠮᠣᠳᠣᠨ ᠤ ᠣᠷᠣᠢ ᠳᠤᠨᠢ ᠵᠤᠭ᠎ᠠ  ᠵᠣᠵᠠᠭᠠᠨ ᠰᠠᠭᠤᠬᠰᠠᠨ ᠪᠣᠯ ᠠᠶᠢᠯ ᠠᠴᠠ ᠠᠷᠪᠠᠨ ᠲᠠᠪᠣᠨ ᠭᠠᠵᠠᠷ ᠠᠴᠠ ᠭᠤᠴᠢᠨ ᠭᠠᠵᠠᠷ ᠵᠠᠢ ᠳᠤ ᠪᠠᠶᠢᠭ᠎ᠠ ᠠᠶᠢᠯ ᠲᠣᠰᠬᠤᠨ ᠢᠶᠠᠷ ᠪᠣᠷᠣᠭᠠᠨ ᠬᠤᠷ᠎ᠠ ᠡᠯᠪᠡᠭ ᠰᠢᠭ᠂ ᠵᠣᠨ ᠤ ᠡᠬᠢᠨ ᠰᠠᠷ᠎ᠠ ᠪᠠᠷ ᠭᠠᠨᠭ᠍ᠳᠠᠵᠦ ᠨᠠᠮᠣᠷ ᠣᠢᠢᠷᠠᠳᠬᠤ ᠪᠠᠷ ᠪᠣᠷᠣᠭᠠᠨ ᠬᠤᠷ᠎ᠠ ᠡᠯᠪᠡᠭ᠃ ᠮᠣᠳᠣᠨ ᠤ ᠲᠣᠣᠷᠠᠬᠢ ᠰᠠᠯᠠᠭ᠎ᠠ ᠨᠠᠮᠠᠭ᠎ᠠ ᠶᠢᠨ ᠵᠤᠭ᠎ᠠ ᠨᠢ ᠵᠣᠵᠠᠭᠠᠨ ᠪᠣᠯ ᠵᠣᠨ ᠤ ᠡᠬᠢᠨ ᠰᠠᠷ᠎ᠠ ᠪᠠᠷ ᠪᠣᠷᠣᠭᠠᠨ ᠲᠠᠢ᠂ ᠵᠣᠨ ᠤ ᠭᠤᠣᠯ ᠬᠠᠯᠠᠭᠤᠨ ᠳᠤ ᠭᠠᠨᠭ᠌ ᠪᠣᠯᠣᠨ᠎ᠠ᠃ ᠵᠤᠭ᠎ᠠ ᠵᠢᠭᠳᠡ ᠪᠠᠷ ᠵᠣᠵᠠᠭᠠᠨ ᠰᠠᠭᠤᠪᠠᠯ ᠬᠤᠷ᠎ᠠ ᠪᠣᠷᠣᠭᠠᠨ ᠲᠡᠭᠰᠢ ᠵᠢᠯ ᠪᠣᠯᠣᠨ᠎ᠠ᠃ ᠵᠤᠭ᠎ᠠ ᠪᠦᠬᠦᠨ ᠢᠶᠠᠷ ᠢᠶᠠᠨ ᠰᠡᠶᠢᠷᠡᠭ ᠪᠠᠶᠢᠪᠠᠯ ᠵᠣᠨ ᠤ ᠣᠯᠠᠷᠢᠯ ᠳᠤ ᠬᠤᠷ᠎ᠠ ᠪᠣᠷᠣᠭᠠᠨ ᠴᠦᠬᠡᠨ᠂ ᠡᠪᠦᠯ ᠤᠨ ᠣᠯᠠᠷᠢᠯ ᠳᠤ ᠴᠠᠰᠣ ᠵᠣᠳ ᠡᠯᠪᠡᠭ ᠵᠢᠯ ᠪᠣᠯᠣᠨ᠎ᠠ᠃              ᠵᠣᠨ ᠤ ᠣᠯᠠᠷᠢᠯ ᠳᠤ ᠱᠠᠩᠰᠢ ᠶᠢᠨ ᠮᠣᠳᠣ ᠶᠢ ᠰᠢᠨᠵᠢᠬᠦ ᠠᠷᠭ᠎ᠠ᠃ ᠱᠠᠩᠰᠢ ᠶᠢᠨ ᠮᠣᠳᠣ ᠪᠣᠳᠠᠯᠠᠵᠦ ᠨᠠᠪᠴᠢᠯᠠᠬᠤ ᠦᠶᠡᠰ ᠵᠡᠭᠦᠨ ᠬᠤᠶᠢᠳᠦ ᠵᠦᠭ ᠤᠨ ᠰᠠᠯᠠᠭᠠᠨ ᠳᠠᠬᠢ ᠨᠠᠪᠴᠢ ᠨᠢ ᠡᠷᠳᠡ ᠢᠯᠡᠭᠦᠦ ᠬᠦᠬᠡᠷᠡᠭᠰᠡᠨ  ᠪᠠᠶᠢᠪᠠᠯ ᠵᠣᠨ ᠤ ᠲᠣᠮᠳᠠ ᠰᠠᠷ᠎ᠠ ᠪᠠᠷ ᠪᠠᠷᠠᠭᠤᠨ ᠡᠮᠦᠨ᠎ᠡ ᠵᠦᠭ ᠠᠴᠠ ᠰᠠᠯᠬᠢ ᠡᠯᠪᠡᠭ ᠪᠣᠯᠵᠦ ᠭᠠᠨᠭ᠌ ᠪᠣᠯᠬᠤ ᠠᠶᠣᠯᠳᠠᠢ᠂ ᠡᠷᠭᠢᠬᠦ ᠵᠢᠯ ᠤᠨ ᠬᠠᠪᠣᠷ ᠡᠪᠡᠳᠴᠢᠨ ᠬᠢᠵᠢᠭ ᠲᠡᠯᠭᠡᠷᠡᠨ᠎ᠡ᠃ ᠪᠠᠷᠠᠭᠤᠨ ᠬᠤᠶᠢᠳᠦ ᠵᠦᠭ ᠲᠤ ᠡᠷᠳᠡ  ᠬᠦᠬᠡᠷᠡᠭᠰᠡᠨ ᠪᠠᠶᠢᠪᠠᠯ ᠨᠠᠮᠣᠷ ᠰᠠᠯᠬᠢ ᠢᠯᠡᠭᠦᠦ᠂ ᠬᠤᠶᠢᠳᠦ ᠵᠦᠭ ᠲᠤ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠭᠠᠨᠭ᠌ ᠪᠣᠯᠣᠨ᠎ᠠ᠂  ᠪᠠᠷᠠᠭᠤᠨ ᠲᠠᠯ᠎ᠠ ᠨᠢ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠬᠢᠷᠠᠭᠤ ᠡᠷᠳᠡ ᠣᠨᠠᠨ᠎ᠠ᠃ ᠪᠠᠷᠠᠭᠤᠨ ᠡᠮᠦᠨ᠎ᠡ ᠵᠦᠭ ᠲᠤ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠨᠠᠮᠣᠷ ᠲᠤ ᠪᠣᠷᠣᠭᠠᠨ ᠡᠯᠪᠡᠭ ᠪᠣᠯᠣᠨ᠎ᠠ᠂ ᠡᠮᠦᠨ᠎ᠡ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠬᠤᠷ᠎ᠠ ᠡᠯᠪᠡᠭ ᠦᠶᠡᠷ ᠣᠰᠣᠳᠣᠯ ᠤᠨ ᠭᠠᠮᠰᠢᠬ ᠪᠣᠯᠵᠦ ᠮᠡᠳᠡᠨ᠎ᠡ᠃ ᠵᠡᠭᠦᠨ ᠡᠮᠦᠨ᠎ᠠ ᠬᠦᠬᠡᠷᠡᠭᠰᠡᠨ ᠪᠣᠯ ᠪᠦᠷᠬᠦᠭ ᠡᠳᠦᠷ ᠠᠷᠪᠢᠨ᠂ ᠪᠣᠷᠣᠭᠠᠨ ᠲᠠᠢ ᠡᠳᠦᠷ ᠴᠦᠬᠡᠨ ᠪᠣᠯᠬᠤᠷ ᠭᠤᠸᠠ ᠶᠢᠨ ᠲᠠᠷᠢᠶᠠᠨ ᠳᠤ ᠮᠠᠭᠤ᠂ ᠵᠡᠭᠦᠨ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠣᠷᠣᠢ ᠶᠢᠨ ᠲᠠᠷᠢᠶ᠎ᠠ ᠳᠤ ᠰᠠᠶᠢᠨ᠃ ᠬᠦᠬᠡᠷᠡᠭᠰᠡᠨ ᠨᠢ ᠪᠣᠰᠣᠳ ᠮᠣᠳᠣᠨ ᠠᠴᠠ ᠬᠤᠯᠠ ᠣᠷᠣᠢ ᠪᠣᠯ ᠲᠠᠷᠠᠭ᠎ᠠ ᠡᠪᠦᠯ ᠲᠡᠰᠭᠢᠮ᠎ᠡ ᠬᠦᠢᠳᠡᠨ᠂ ᠡᠪᠦᠯ ᠤᠨ ᠣᠯᠠᠷᠢᠯ ᠳᠤ ᠨᠠᠰᠣᠳᠠᠢ ᠨᠢᠯᠬᠠᠰ ᠡᠪᠡᠳᠴᠢᠯᠡᠬᠦ ᠬᠦᠮᠦᠨ ᠣᠯᠠᠨ᠃ ᠣᠷᠣᠢ ᠨᠢ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠡᠷᠳᠡ ᠶᠢᠨ ᠲᠠᠷᠢᠶ᠎ᠠ ᠳᠤ ᠰᠠᠶᠢᠨ᠂ ᠲᠣᠣᠷᠠᠬᠢ ᠰᠠᠯᠠᠭ᠎ᠠ ᠨᠢ ᠡᠷᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ  ᠪᠣᠷᠴᠠᠬ ᠡᠯᠪᠡᠭ ᠬᠤᠷᠢᠶᠠᠨ᠎ᠠ᠃ ᠪᠦᠬᠦᠳᠡᠭᠡᠷ ᠢᠶᠠᠨ ᠵᠢᠭᠳᠡ ᠬᠦᠬᠡᠷᠡᠭᠰᠡᠨ ᠪᠣᠯ ᠬᠤᠷ᠎ᠠ ᠪᠣᠷᠣᠭᠠᠨ ᠲᠡᠭᠰᠢ ᠵᠢᠯ ᠪᠣᠯᠣᠨ᠎ᠠ  ᠭᠡᠳᠡᠭ᠃              ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ᠂ ᠬᠤᠷᠴᠢᠨ ᠤ ᠵᠠᠷᠢᠮ ᠪᠦᠭᠡ ᠨᠠᠷ ᠠᠴᠠ ᠬᠡᠭᠡᠷ᠎ᠡ ᠭᠠᠳᠠᠨ᠎ᠠ ᠣᠨ ᠵᠢᠯ ᠣᠳᠠᠳᠠᠯ᠎ᠠ ᠬᠤᠷ᠎ᠠ ᠣᠷᠭᠤᠬᠰᠠᠨ ᠮᠣᠳᠣ ᠶᠢ ᠱᠠᠩᠰᠢ ᠬᠡᠮᠡᠨ ᠰᠢᠳᠦᠵᠦ᠂ ᠰᠠᠬᠢᠭᠤᠰᠣ ᠪᠣᠯᠭᠠᠨ ᠬᠡᠷᠡᠭᠯᠡᠳᠡᠭ ᠶᠣᠮ ᠭᠡᠨ᠎ᠡ᠃  ᠰᠢᠨᠵᠢᠯᠡᠬᠦ ᠣᠬᠠᠭᠠᠨ ᠬᠠᠷᠠᠬᠠᠨ ᠴᠡᠴᠡᠭᠯᠡᠨ ᠬᠦᠭᠵᠢᠭᠡ ᠦᠭᠡᠢ ᠪᠠᠶᠢᠬᠰᠠᠨ ᠡᠷᠳᠡ ᠴᠠᠬ ᠲᠤ ᠪᠦᠭᠡ ᠨᠠᠷ ᠠᠴᠠ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠰᠠᠬᠢᠭᠤᠰᠣ ᠶᠢ ᠪᠡᠶ᠎ᠡ ᠳᠡᠭᠡᠨ ᠣᠷᠣᠰᠢᠭᠤᠯᠣᠬᠰᠠᠨ ᠤ ᠲᠠᠷᠠᠭ᠎ᠠ ᠦᠡᠭᠭᠡᠷᠡᠭᠰᠡᠨ ᠢᠷᠡᠭᠡᠳᠦᠢ ᠶᠢ ᠰᠢᠠᠵᠢᠯᠡᠵᠦ ᠦᠵᠡᠯᠭᠡ ᠲᠦᠯᠭᠡ ᠠᠶᠢᠯᠠᠳᠣᠨ ᠮᠡᠷᠭᠡᠯᠡᠵᠦ ᠴᠢᠳᠠᠳᠠᠬ ᠶᠣᠮ ᠭᠡᠨ᠎ᠡ᠃ ᠪᠠᠰᠠ ᠬᠤᠷᠣᠭᠤ ᠪᠠᠨ ᠬᠠᠵᠠᠵᠦ᠂ ᠭᠡᠳᠡᠰᠦ ᠪᠠᠨ ᠵᠢᠳᠠᠯᠠᠨ ᠴᠢᠰᠣ ᠭᠠᠷᠭᠠᠭᠠᠳ ᠪᠣᠰᠣᠳ ᠲᠤ ᠵᠠᠶ᠋ᠢᠬ ᠲᠠᠷᠨᠢ ᠪᠢᠴᠢᠵᠦ ᠦᠭᠭᠦᠭᠡᠳ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠢ ᠨᠢ ᠵᠠᠰᠠᠳᠠᠬ ᠪᠠᠶᠢᠪᠠ᠃ ᠡᠭᠦᠨ ᠤ ᠲᠣᠬᠠᠢ ᠬᠦᠷᠢᠶ᠎ᠡ ᠬᠤᠰᠢᠭᠤ ᠨᠣᠳᠤᠬ ᠲᠠᠢ ᠬᠠᠰᠪᠠᠶᠠᠷ ᠪᠦᠬᠡ ᠠᠴᠠ ᠄ ︽ᠪᠦᠭᠡ ᠨᠠᠷ ᠤᠨ ᠲᠣᠮᠳᠠ ᠵᠢᠳᠠ ᠰᠢᠩᠭᠡᠬᠦ ᠭᠡᠳᠡᠭ ᠨᠢᠭᠡᠨ ᠨᠢᠭᠤᠴᠠ ᠣᠪᠠᠳᠢᠰ ᠪᠠᠶᠢᠳᠠᠬ᠃ ᠡᠨᠡ ᠨᠢ ᠲᠣᠬᠰᠢᠨ ᠠᠳᠠ ᠴᠢᠳᠭᠦᠷ ᠢ ᠨᠣᠮᠣᠬᠠᠳᠬᠠᠬᠤ᠂ ᠬᠦᠨᠳᠦ ᠡᠪᠡᠳᠴᠢᠳᠡᠨ ᠢ ᠪᠦᠭᠡᠯᠡᠨ ᠵᠠᠰᠠᠬᠤ ᠳᠤ ᠬᠡᠷᠡᠭᠯᠡᠳᠡᠭ ᠡᠷᠳᠡᠮ ᠪᠣᠯᠣᠨ᠎ᠠ᠃ ᠡᠭᠦᠨ ᠢ ᠡᠷᠳᠡᠮ ᠴᠢᠳᠠᠯ ᠪᠦᠷᠢᠳᠦᠭᠰᠡᠨ ᠮᠣᠳᠣᠨ ᠰᠢᠳᠦᠯᠭᠡ ᠲᠠᠢ ᠪᠦᠬᠡ ᠨᠠᠷ ᠰᠠᠶ᠋ᠢ ᠬᠦᠢᠴᠠᠳᠬᠡᠵᠤ ᠴᠢᠳᠠᠳᠠᠬ ᠠᠴᠠ ᠪᠢᠰᠢ ᠬᠢᠷᠢ ᠪᠠᠷᠤᠬ ᠤᠨ ᠪᠦᠭᠡ ᠨᠠᠷ ᠬᠢᠵᠦ ᠴᠢᠳᠠᠳᠠᠬ ᠦᠭᠡᠢ ᠶᠣᠮ᠃ ᠡᠷᠳᠡᠮ ᠴᠢᠳᠠᠯ ᠬᠦᠢᠴᠡᠬᠦ ᠦᠬᠡᠢ ᠪᠦᠭᠡ ᠨᠠᠷ ᠰᠢᠩᠬᠡᠬᠡᠪᠠᠯ ᠠᠮᠢ ᠪᠠᠨ ᠴᠦ ᠠᠯᠳᠠᠬᠤ ᠠᠶᠣᠯ ᠲᠠᠢ᠃ ᠱᠠᠩᠰᠢ ᠶᠢᠨ ᠮᠣᠳᠣᠨ ᠤ ᠰᠢᠳᠦᠯᠭᠡ ᠲᠠᠢ ᠪᠦᠭᠡ ᠨᠢ ᠪᠦᠭᠡᠯᠡᠭᠡᠳ ᠰᠢᠳᠦᠭᠡᠨ ᠢᠶᠠᠨ ᠵᠠᠯᠠᠬᠰᠠᠨ ᠤ ᠲᠠᠷᠠᠭ᠎ᠠ ᠭᠡᠳᠡᠰᠦ ᠪᠠᠨ ᠵᠢᠳᠠᠯᠠᠨ ᠴᠢᠰᠣ ᠭᠠᠷᠭᠠᠭᠠᠳ ᠵᠠᠶ᠋ᠢᠬ ᠲᠠᠷᠨᠢ ᠪᠢᠴᠢᠳᠡᠭ ᠪᠣᠯᠪᠠᠴᠦ ᠭᠡᠳᠡᠰᠦ ᠨᠢ ᠣᠬᠳᠣᠬᠠᠨ ᠴᠦ ᠰᠢᠷᠬ᠎ᠠ ᠰᠣᠷᠪᠢ ᠣᠯᠳᠠᠬ ᠦᠭᠡᠢ᠂ ᠬᠠᠷᠢᠨ ᠰᠢᠳᠦᠵᠦ ᠪᠠᠶᠢᠬᠰᠠᠨ ᠱᠠᠩᠰᠢ ᠶᠢᠨ ᠮᠣᠳᠣ ᠨᠢ ᠰᠢᠷᠬᠠᠳᠣᠵᠦ ᠭᠠᠳᠠᠷ ᠵᠣᠵᠠᠭᠠᠨ ᠬᠠᠯᠢᠰᠣ ᠨᠢ ᠬᠡᠭᠵᠡᠷᠡᠵᠦ ᠮᠣᠳᠣᠨ ᠠᠴᠠ ᠰᠢᠭᠦᠰᠦ ᠨᠢ ᠴᠢᠰᠣ ᠰᠢᠬ ᠨᠡᠪᠴᠢᠨ ᠭᠤᠭᠤᠵᠢᠳᠠᠬ ᠶᠣᠮ︾ ᠭᠡᠵᠦ ᠬᠠᠭᠤᠴᠢᠯᠠᠬᠰᠠᠨ ᠭᠡᠳᠡᠭ᠃           ᠪᠦᠬᠡ ᠶᠢᠨ ᠱᠠᠰᠢᠨ ᠤ ᠱᠠᠩᠰᠢ ᠶᠢᠨ ᠰᠠᠬᠢᠭᠤᠰᠣ ᠣᠷᠣᠰᠢᠭᠤᠯᠬᠤ ᠡᠷᠳᠡᠮ ᠭᠡᠰᠡᠨ ᠴᠦ ᠲᠡᠷᠡ᠂ ᠱᠠᠩᠰᠢ ᠶᠢᠨ  ᠮᠣᠳᠣ ᠪᠠᠷ ᠵᠢᠯ ᠤᠨ ᠦᠡᠭᠭᠡ ᠶᠢ ᠰᠢᠨᠵᠢᠯᠡᠬᠦ ᠠᠷᠭ᠎ᠠ ᠭᠡᠰᠡᠨ ᠴᠦ ᠲᠡᠷᠡ᠂ ᠪᠦᠷ ᠯᠡ ᠰᠢᠨᠵᠢᠯᠡᠬᠦ ᠣᠬᠠᠭᠠᠨ ᠤ ᠪᠣᠳᠠᠳᠠᠢ ᠪᠠᠷᠢᠮᠳᠠ ᠴᠦᠬᠡᠨ᠂ ᠵᠦᠪ ᠣᠨᠣᠪᠴᠢᠳᠠᠢ ᠭᠡᠵᠦ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠪᠣᠯᠬᠤᠷ ᠪᠢᠳᠡ ᠡᠨᠡ ᠪᠦᠬᠦᠨ ᠢ ᠦᠬᠦᠨ ᠢᠳᠡᠭᠡᠵᠦ ᠦᠨᠡᠮᠰᠢᠵᠦ ᠪᠣᠯᠬᠤ ᠦᠭᠡᠢ ᠶᠣᠮ᠃ ᠭᠡᠪᠡᠴᠦ ᠡᠳᠡᠭᠡᠷ ᠱᠠᠰᠢᠨ ᠰᠣᠷᠳᠠᠬᠤᠨ ᠤ  ᠰᠢᠳᠦᠯᠭᠡ ᠲᠠᠬᠢᠯᠭ᠎ᠠ ᠵᠢᠴᠢ ᠠᠷᠠᠳ ᠤᠨ ᠲᠣᠮᠳᠠᠬᠢ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠵᠡᠷᠭᠡ ᠨᠢ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠦᠶ᠎ᠡ ᠤᠯᠠᠷᠢᠠ ᠠᠮᠢᠳᠣᠷᠠᠨ ᠣᠷᠣᠰᠢᠬᠤ ᠳᠠᠭᠠᠨ ᠬᠤᠷᠠᠮᠳᠤᠭᠤᠯᠵᠦ᠂ ᠠᠮᠢᠳᠣᠷᠠᠯ ᠤᠨ ᠲᠣᠮᠳᠠ ᠠᠴᠠ ᠪᠠᠨ ᠰᠡᠷᠡᠵᠦ ᠮᠡᠳᠡᠭᠰᠡᠨ᠂ ᠴᠢᠨᠠᠬᠰᠢᠯᠠᠭᠠᠳ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠪᠠᠶᠢᠭᠠᠯᠢ ᠪᠠᠨ ᠲᠠᠨᠢᠬᠤ ᠪᠠᠷ ᠴᠢᠷᠮᠠᠶᠢᠬᠰᠠᠨ ᠲᠦᠭᠦᠮᠬᠡᠨ ᠠᠷᠭ᠎ᠠ ᠬᠡᠯᠪᠡᠷᠢ᠂ ᠪᠠᠶᠢᠭᠠᠯᠢ ᠲᠠᠢ ᠪᠠᠨ ᠣᠶᠠᠯᠳᠣᠬᠤ ᠪᠠᠷ ᠴᠢᠷᠮᠠᠶᠢᠬᠰᠠᠨ ᠵᠠᠩ ᠦᠢᠯᠡ ᠭᠡᠳᠡᠭ ᠢ ᠪᠢᠳᠡ ᠣᠢᠢᠯᠠᠭᠠᠬᠤ  ᠬᠡᠷᠡᠭᠳᠡᠢ᠃          ᠬᠤᠷᠴᠢᠨᠴᠣᠳ ᠤᠨ ᠱᠠᠩᠰᠢ ᠶᠢᠨ ᠰᠢᠳᠦᠯᠭᠡ ᠳᠤ ᠠᠶᠢᠯ ᠲᠣᠰᠬᠤᠨ ᠤ ᠬᠤᠭᠤᠷᠣᠨᠳᠣᠬᠢ ᠶᠣᠰᠣ ᠵᠠᠩᠰᠢᠯ ᠨᠢ ᠵᠠᠷᠢᠮ ᠲᠠᠯ᠎ᠠ ᠪᠠᠷ ᠠᠳᠠᠯᠢ ᠦᠭᠡᠢ ᠪᠣᠶᠣ ᠪᠠᠭᠠᠬᠠᠨ ᠵᠦᠷᠢᠶᠡᠲᠠᠢ ᠰᠢᠭ ᠪᠣᠯᠪᠠᠴᠦ ᠶᠡᠷᠦᠩᠬᠡᠢ ᠳᠡᠭᠡᠨ ᠨᠡᠯᠢᠶᠡᠳ  ᠠᠳᠠᠯᠢᠪᠳᠣᠷ ᠶᠣᠮ᠃ ᠡᠨᠡ ᠬᠦ ᠲᠠᠬᠢᠯᠭ᠎ᠠ ᠶᠢᠨ ᠶᠣᠰᠣ ᠨᠢ ᠬᠡᠳᠦ᠋ᠢᠪᠡᠷ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠡ ᠪᠠᠷ ᠲᠦᠢᠯ ᠤᠨ ᠪᠠᠭ᠎ᠠ᠂  ᠨᠣᠳᠤᠬ ᠣᠰᠣᠨ ᠤ ᠰᠢᠳᠦᠯᠭᠡ ᠲᠡᠳᠦᠢ ᠪᠣᠯᠪᠠᠴᠦ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠵᠠᠩ ᠦᠢᠯᠡ᠂ ᠰᠣᠶᠣᠯ ᠲᠡᠦᠬᠡ᠂  ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ᠂ ᠱᠠᠰᠢᠨ ᠤ ᠣᠬᠠᠭᠠᠨ ᠵᠡᠷᠭᠡ ᠶᠢ ᠬᠠᠮᠣᠷᠣᠬᠰᠠᠨ ᠰᠣᠶᠣᠯ ᠤᠨ ᠭᠡᠷᠡᠯᠳᠦ ᠲᠠᠯᠠᠰᠳᠦ ᠪᠣᠯᠬᠤᠷ  ᠪᠢᠳᠡ ᠨᠡᠩ ᠴᠢᠨᠠᠬᠰᠢᠳᠠ ᠰᠢᠨᠵᠢᠯᠡᠨ ᠰᠣᠳᠣᠯᠬᠤ ᠴᠢᠬᠤᠯᠠᠳᠠᠢ᠃  
  
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠬᠤᠲᠠ ᠶᠢᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠤᠨ ᠤ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠦᠷᠢᠶ᠎ᠡ ᠬᠤᠰᠢᠭᠤ
ᠡᠬᠢ ᠶᠦᠭᠡᠨ ᠪᠠᠳᠠᠷᠠᠭᠤᠯᠤᠭᠴᠢ ᠬᠡᠶᠢᠳ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号