ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠣᠶᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠣᠰᠣ ᠪᠠ ᠯᠣᠣᠰ ᠤᠨ ᠰᠢᠳᠦᠯᠭᠡ ︵ᠲᠡᠭᠡᠳᠤ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/11/5
    ᠡᠷᠳᠡᠨ ᠤ ᠬᠦᠮᠦᠰ ᠪᠠᠶᠢᠭᠠᠯᠢ ᠶᠢᠨ ᠠᠯᠢᠪᠠ ᠠᠮᠢᠳᠠᠨ ᠪᠣᠳᠠᠰ ᠪᠦᠬᠦᠨ ᠨᠢ ᠪᠦᠷ ᠠᠮᠢ ᠲᠠᠢ ᠪᠣᠶᠣ ᠡᠵᠡᠳ  ᠰᠠᠬᠢᠭᠤᠰᠣ ᠲᠠᠢ ᠬᠡᠮᠡᠨ ᠦᠵᠡᠵᠦ ᠪᠠᠶᠢᠬᠰᠠᠨ ᠠᠴᠠ ᠪᠠᠶᠢᠭᠠᠯᠢ ᠶᠢᠷᠳᠢᠨᠴᠦ ᠳᠤ ᠲᠦᠭᠡᠮᠡᠯ ᠣᠷᠣᠰᠢᠬᠤ ᠭᠤᠣᠯ  ᠭᠤᠷᠤᠬ᠎ᠠ᠂ ᠨᠠᠭᠤᠷ ᠲᠠᠯᠠᠢ᠂ ᠪᠣᠯᠠᠬ ᠬᠤᠳᠳᠤᠬ ᠵᠡᠷᠭᠡ ᠶᠢ ᠴᠦ ᠠᠮᠢ ᠲᠠᠢ ᠪᠣᠶᠣ ᠡᠵᠡᠳ ᠰᠠᠬᠢᠭᠤᠰᠣ ᠲᠠᠢ ᠬᠡᠮᠡᠨ  ᠦᠵᠡᠵᠦ ᠣᠰᠣ ᠶᠢᠨ ᠰᠢᠳᠦᠯᠭᠡ ᠶᠢᠨ ᠠᠩᠬᠠᠨ ᠤ ᠬᠡᠯᠪᠡᠷᠢ ᠶᠢ ᠪᠣᠢ ᠪᠣᠯᠭᠠᠬᠰᠠᠨ ᠪᠠᠶᠢᠳᠠᠬ᠃ ᠬᠦᠮᠦᠨ  ᠲᠦᠷᠦᠯᠬᠢᠳᠡᠨ ᠤ ᠨᠡᠶᠢᠭᠡᠮ ᠪᠣᠢ ᠪᠣᠯᠵᠦ ᠬᠦᠭᠵᠢᠬᠦ ᠶᠢ ᠲᠠᠭᠠᠯᠳᠣᠨ ᠣᠰᠣ ᠶᠢᠨ ᠰᠢᠳᠦᠯᠭᠡ ᠨᠢ ᠣᠰᠣᠨ ᠤ ᠲᠣᠳᠣᠷᠠᠬᠢ  ᠠᠮᠢᠳᠠᠨ ᠤ ᠰᠢᠳᠦᠯᠭᠡ ᠶᠢᠨ ᠬᠡᠯᠪᠡᠷᠢ ᠪᠠᠷ ᠬᠤᠪᠢᠷᠠᠵᠦ᠂ ᠣᠰᠣ ᠶᠢ ᠯᠣᠣ ᠬᠠᠮᠢᠶᠠᠷᠳᠠᠬ ᠭᠡᠵᠦ ᠦᠵᠡᠬᠦ ᠪᠣᠯᠵᠠᠢ᠃  ᠬᠤᠷᠴᠢᠨ ᠨᠣᠳᠤᠬ ᠨᠢ ᠮᠣᠩᠭᠤᠯ ᠲᠣᠭᠤᠷᠭᠠᠳᠠᠨ ᠤ ᠨᠢᠭᠡᠨ ᠰᠣᠳᠣᠨ ᠠᠶᠢᠮᠠᠬ ᠪᠣᠯᠣᠬᠰᠠᠨ ᠤ ᠬᠤᠪᠢ ᠳᠤ ᠣᠰᠣᠨ ᠤ  ᠡᠵᠡᠳ ᠰᠠᠬᠢᠭᠤᠰᠣ ᠶᠢ ᠮᠦᠨ ᠴᠦ ᠯᠣᠣ ᠬᠡᠮᠡᠨ ᠦᠵᠡᠵᠦ᠂ ᠯᠣᠣ ᠶᠢ ᠬᠤᠷ᠎ᠠ ᠪᠣᠷᠣᠭᠠᠨ᠂ ᠭᠤᠣᠯ ᠭᠤᠷᠤᠬ᠎ᠠ᠂  ᠨᠠᠭᠤᠷ ᠲᠠᠯᠠᠢ᠂ ᠪᠣᠯᠠᠬ ᠱᠠᠩᠳᠠ ᠶᠢ ᠬᠠᠮᠢᠶᠠᠷᠬᠤ ᠯᠣᠣᠰ ᠤᠨ ᠡᠵᠡᠨ ᠬᠡᠮᠡᠵᠦ᠂ ᠯᠣᠣᠰ ᠲᠠᠬᠢᠬᠤ ᠨᠢ ᠬᠡᠷᠡᠭ  ᠲᠡᠭᠡᠷ᠎ᠡ ᠪᠠᠨ ᠣᠰᠣ ᠲᠠᠬᠢᠵᠦ ᠪᠠᠶᠢᠬᠤ ᠲᠠᠢ ᠠᠳᠠᠯᠢᠬᠠᠨ ᠪᠣᠯᠵᠠᠢ᠃             ᠣᠰᠣᠨ ᠤ ᠰᠢᠳᠦᠯᠭᠡ ᠶᠢᠨ ᠡᠭᠦᠰᠦᠯ ᠬᠦᠭᠵᠢᠯ          ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠣᠰᠣ ᠶᠢ ᠠᠯᠢ ᠡᠷᠳᠡᠨ ᠠᠴᠠ ᠠᠮᠢ ᠲᠠᠢ ᠬᠡᠮᠡᠨ ᠦᠵᠡᠵᠦ ᠰᠢᠳᠦᠵᠦ ᠲᠠᠬᠢᠵᠦ  ᠪᠠᠶᠢᠬᠰᠠᠨ ᠲᠣᠬᠠᠢ ᠦᠯᠢᠭᠡᠷ ᠵᠢᠱᠢᠶ᠎ᠡ ᠣᠯᠠᠮᠵᠢᠯᠠᠯᠳᠦ ᠵᠠᠩ ᠦᠢᠯᠡ ᠪᠣᠯᠣᠨ ᠦᠯᠢᠭᠡᠷ᠂ ᠲᠣᠮᠤᠬ᠂ ᠰᠢᠳᠢᠳᠦ  ᠦᠯᠢᠭᠡᠷ ᠵᠡᠷᠭᠡ ᠳᠤ ᠪᠠᠶᠢᠨ ᠲᠠᠬᠢᠨ ᠢᠯᠡᠷᠡᠳᠡᠭ᠃ ᠪᠠᠰᠠ ᠮᠣᠩᠭᠤᠯ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠳᠤ ᠪᠠᠶᠢᠭᠠᠯᠢ  ᠲᠡᠯᠡᠬᠡᠢ ᠨᠢ ᠮᠣᠳᠣ᠂ ᠰᠢᠷᠣᠢ᠂ ᠭᠠᠯ᠂ ᠣᠰᠣ᠂ ᠲᠡᠮᠦᠷ ᠵᠡᠷᠭᠡ ᠶᠢᠨ ᠲᠠᠪᠣᠨ ᠮᠠᠬᠠᠪᠣᠳ ᠢᠶᠠᠷ ᠪᠦᠳᠦᠭᠰᠡᠨ ᠪᠠᠶᠢᠬᠤ  ᠶᠣᠰᠣᠳᠠᠢ ᠭᠡᠵᠦ ᠲᠠᠭᠠᠮᠠᠬᠯᠠᠵᠦ ᠬᠦᠮᠦᠨ ᠤ ᠠᠮᠢ ᠨᠢ ᠵᠠᠪᠠᠯ ᠡᠨᠡ ᠬᠦ ᠲᠠᠪᠣᠨ ᠮᠠᠬᠠᠪᠣᠳ ᠤᠨ ᠨᠢᠭᠡ ᠨᠢ ᠪᠠᠶᠢᠬᠤ  ᠶᠣᠰᠣᠳᠠᠢ ᠭᠡᠬᠦ ᠣᠢᠢᠯᠠᠭᠠᠯᠳᠠ ᠲᠠᠢ ᠪᠣᠯᠵᠦ ᠲᠦᠷᠦᠭᠰᠡᠨ ᠴᠠᠬ ᠬᠤᠭᠤᠴᠠᠭ᠎ᠠ ᠳᠤ ᠦᠨᠳᠦᠰᠦᠯᠡᠨ ︽ᠡᠪᠦᠯ  ᠲᠦᠷᠦᠭᠰᠡᠨ ᠬᠦᠮᠦᠨ ᠪᠦᠬᠦᠨ ᠴᠦᠮ ᠣᠰᠣᠨ ᠠᠮᠢ ᠲᠠᠢ︾ ᠭᠡᠵᠦ ᠦᠵᠡᠬᠦ ᠪᠣᠯᠵᠠᠢ᠃ ᠡᠭᠦᠨ ᠤ ᠲᠣᠬᠠᠢ ᠬᠦᠷᠢᠶ᠎ᠡ  ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠬᠰᠠᠨ ᠪᠠᠭᠰᠢ ᠭᠠᠳᠠᠰᠣ ᠠᠴᠠ ︽ᠲᠦᠪᠡᠳ ᠤᠨ ᠬᠠᠷ᠎ᠠ  ᠵᠢᠷᠣᠬᠠᠢ ᠳᠤ ᠲᠡᠮᠳᠡᠭᠯᠡᠭᠰᠡᠨ ᠢᠶᠠᠷ ︿ᠲᠡᠯᠡᠬᠡᠢ ᠶᠢᠷᠳᠢᠨᠴᠦ ᠠᠨᠣ ᠣᠰᠣᠨ ᠲᠡᠭᠡᠷ᠎ᠡ ᠡᠮᠣᠨᠡᠰᠢ ᠬᠠᠨᠳᠣᠵᠦ ᠬᠡᠪᠳᠡᠭᠰᠡᠨ  ᠶᠠᠰᠣᠳᠦ ᠮᠡᠯᠡᠬᠡᠢ ᠶᠢᠨ ᠨᠢᠷᠣᠭᠤᠨ ᠲᠡᠭᠡᠷ᠎ᠡ ᠲᠣᠬᠳᠠᠵᠦ ᠪᠠᠶᠢᠬᠰᠠᠨ ᠠᠵᠣᠭᠤ᠃ ᠶᠠᠰᠣᠳᠣ ᠮᠡᠯᠡᠬᠡᠢ ᠬᠦᠳᠡᠯᠬᠦ ᠪᠠᠷ  ᠭᠠᠵᠠᠷ ᠬᠦᠳᠡᠯᠬᠦ᠂ ᠠᠭᠤᠯᠠ ᠶᠡᠭᠦᠷᠡᠬᠦ᠂ ᠭᠠᠯᠳᠦ ᠠᠭᠤᠯᠠ ᠲᠡᠯᠪᠡᠷᠡᠬᠦ ᠮᠡᠳᠦ ᠶᠢᠨ ᠪᠠᠶᠢᠭᠠᠯᠢ ᠶᠢᠨ ᠠᠶᠣᠯ ᠭᠠᠮᠰᠢᠬ  ᠡᠭᠦᠰᠴᠦ ᠬᠦᠮᠦᠨ ᠠᠮᠢᠳᠠᠨ ᠳᠤ ᠶᠡᠬᠡᠬᠡᠨ ᠬᠤᠤᠷ ᠨᠦᠯᠦᠭᠡ ᠣᠴᠠᠷᠠᠭᠤᠯᠳᠠᠬ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠬᠤᠵᠢᠮᠳᠠᠵᠦ  ᠢᠷᠡᠭᠡᠳ ᠡᠨᠡ ᠬᠦ ᠶᠠᠰᠣᠳᠣ ᠮᠡᠯᠡᠬᠡᠢ ᠨᠢ ᠭᠠᠵᠢᠭᠤ ᠰᠡᠳᠭᠢᠯ ᠡᠭᠦᠰᠴᠦ ᠵᠣᠬᠰᠣᠯ ᠦᠭᠡᠢ ᠬᠦᠳᠡᠯᠵᠦ ᠬᠦᠮᠦᠨ  ᠠᠮᠢᠳᠠᠳ ᠲᠤ ᠠᠬᠢᠨ ᠲᠠᠬᠢᠨ ᠠᠶᠣᠯ ᠭᠠᠮᠰᠢᠬ ᠣᠴᠠᠷᠠᠭᠤᠯᠣᠭᠠᠳ ᠪᠠᠶᠢᠳᠠᠬ ᠠᠴᠠ ᠮᠠᠨᠽᠣᠰᠢᠷᠢ ᠪᠣᠷᠬᠠᠨ ᠠᠮᠢᠳᠠᠨ  ᠵᠢᠷᠭᠤᠭᠠᠨ ᠵᠦᠢᠯ ᠳᠤ ᠪᠣᠶᠠᠨ ᠦᠢᠯᠡᠳᠬᠦ ᠭᠡᠵᠦ ᠬᠤᠪᠢᠯᠭᠠᠨ ᠨᠣᠮᠣ ᠪᠠᠷ ᠶᠠᠰᠣᠳᠦ ᠮᠡᠯᠡᠬᠡᠢ ᠶᠢ ᠬᠠᠷᠪᠣᠪᠠ᠃  ᠪᠣᠷᠬᠠᠨ ᠤ ᠬᠠᠷᠪᠣᠵᠦ ᠢᠯᠡᠭᠡᠭᠰᠡᠨ ᠬᠤᠪᠢᠯᠭᠠᠨ ᠬᠦᠴᠦᠳᠦ ᠰᠣᠮᠣ ᠨᠢ ᠶᠠᠰᠣᠳᠦ ᠮᠡᠯᠡᠬᠡᠢ ᠶᠢ ᠣᠨᠣᠵᠦ ᠵᠡᠭᠦᠨ  ᠰᠦᠪᠡᠭᠡ ᠪᠠᠷ ᠨᠢ ᠨᠡᠪᠳᠡᠯᠵᠦ ᠭᠠᠷᠬᠤ ᠳᠤ ᠰᠣᠮᠣ ᠶᠢᠨ ᠬᠦᠴᠦᠨ ᠳᠤ ᠶᠠᠰᠣᠳᠦ ᠮᠡᠯᠡᠬᠡᠢ ᠪᠦᠳᠦᠨ ᠨᠢᠭᠡ ᠬᠦᠷᠪᠡᠭᠰᠡᠨ  ᠭᠡᠨ᠎ᠡ᠃ ᠶᠠᠰᠣᠳᠣ ᠮᠡᠯᠡᠬᠡᠢ ᠶᠢᠨ ᠵᠡᠭᠦᠨ ᠰᠣᠭᠤ ᠪᠠᠷ ᠬᠠᠷᠪᠣᠬᠰᠠᠨ ᠵᠡᠪᠡ ᠶᠢᠨ ᠪᠠᠷᠢᠭᠤᠯ ᠤᠨ ᠮᠣᠳᠣ ᠨᠢ ᠪᠣᠯᠳᠦ᠋ᠢᠵᠦ  ᠭᠠᠷᠣᠬᠰᠠᠨ ᠠᠴᠠ ᠲᠡᠯᠡᠬᠡᠢ ᠶᠢᠷᠳᠢᠨᠴᠦ ᠶᠢᠨ ᠵᠡᠭᠦᠨ ᠵᠦᠭ ᠢ ᠮᠣᠳᠣᠨ ᠣᠷᠣᠨ ᠬᠡᠮᠡᠵᠦ᠂ ᠪᠠᠷᠠᠭᠤᠨ ᠰᠣᠭᠤ ᠪᠠᠷ ᠨᠢ  ᠵᠡᠪᠡ ᠶᠢᠨ ᠲᠡᠮᠦᠷ ᠦᠵᠦᠭᠦᠷ ᠨᠢ ᠨᠡᠪᠳᠡᠯᠵᠦ ᠭᠠᠷᠣᠬᠰᠠᠨ ᠠᠴᠠ ᠪᠠᠷᠠᠭᠤᠨ ᠵᠦᠭ ᠢ ᠲᠡᠮᠦᠷ ᠤᠨ ᠣᠷᠣᠨ ᠭᠡᠵᠦ᠂  ᠶᠠᠰᠣᠳᠣ ᠮᠡᠯᠡᠬᠡᠢ ᠶᠢᠨ ᠠᠮᠠᠨ ᠠᠴᠠ ᠭᠠᠯ ᠭᠠᠷᠣᠬᠰᠠᠨ ᠠᠴᠠ ᠡᠮᠦᠨ᠎ᠡ ᠵᠦᠭ ᠢ ᠭᠠᠯ ᠤᠨ ᠣᠷᠣᠨ ᠭᠡᠵᠦ᠂  ᠪᠦᠭᠰᠡᠨ ᠠᠴᠠ ᠨᠢ ᠣᠰᠣ ᠭᠤᠭᠤᠵᠢᠬᠰᠠᠨ ᠠᠴᠠ ᠬᠤᠶᠢᠨ᠎ᠠ ᠵᠦᠭ ᠢ ᠣᠰᠣ ᠶᠢᠨ ᠣᠷᠣᠨ ᠭᠡᠵᠦ᠂ ᠡᠯᠢᠭᠡᠨ ᠳᠤᠨᠢ  ᠰᠢᠷᠣᠢ ᠨᠠᠭᠠᠯᠳᠣᠬᠰᠠᠨ ᠠᠴᠠ ᠲᠣᠮᠳᠠᠬᠢ ᠶᠢ ᠨᠢ ᠰᠢᠷᠣᠢ ᠶᠢᠨ ᠣᠷᠣᠨ ᠭᠡᠵᠦ ᠶᠠᠷᠢᠬᠤ ᠪᠣᠯᠵᠠᠢ﹀ ᠭᠡᠵᠦ ᠲᠡᠮᠳᠡᠭᠯᠡᠵᠦ  ᠪᠠᠶᠢᠳᠠᠬ᠃ ᠪᠠᠰᠠ ᠲᠡᠭᠡᠳᠦ ᠮᠣᠩᠭᠤᠯ ᠤᠨ ᠦᠯᠢᠭᠡᠷ ︿ᠲᠠᠷᠢ ᠲᠣᠯᠣᠭᠠᠢ﹀ ᠳᠤ ︿ᠮᠠᠩᠭᠤᠰ ᠤᠨ ᠠᠮᠢ ᠨᠢ ᠭᠦᠨ  ᠬᠠᠷ᠎ᠠ ᠣᠰᠣᠨ ᠭᠡᠵᠦ ᠦᠬᠦᠯᠡᠨ᠎ᠡ﹀ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠶᠢᠳᠠᠬ᠃ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠨᠢ ᠬᠡᠳᠦ᠋ᠢᠪᠡᠷ  ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠪᠣᠢ ᠪᠣᠯᠣᠬᠰᠠᠨ ᠠᠴᠠ ᠰᠡᠭᠦᠯᠡᠷᠬᠢ ᠨᠡᠯᠢᠶᠡᠳ ᠬᠤᠵᠢᠮ ᠤᠨ ᠣᠴᠢᠷ ᠪᠣᠯᠪᠠᠴᠦ ᠵᠢᠷᠣᠬᠠᠢ ᠶᠢᠨ  ᠣᠬᠠᠭᠠᠨ ᠪᠢᠴᠢᠭᠳᠡᠬᠦ ᠠᠴᠠ ᠡᠮᠦᠨ᠎ᠡ ᠪᠣᠯᠳᠠᠯ᠎ᠠ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠠᠴᠠ ᠪᠠᠶᠢᠭᠠᠯᠢ ᠣᠷᠴᠢᠨ ᠢᠶᠠᠨ ᠬᠡᠷᠬᠢᠨ  ᠲᠠᠨᠢᠵᠦ ᠣᠢᠢᠯᠠᠭᠠᠵᠦ ᠪᠠᠶᠢᠬᠰᠠᠨ ᠲᠣᠬᠠᠢ ᠪᠢᠳᠡ ᠡᠬᠦᠨ ᠠᠴᠠ ᠨᠡᠯᠢᠶᠡᠳ ᠲᠣᠳᠣᠷᠬᠠᠢ ᠣᠢᠢᠯᠠᠭᠠᠨ ᠮᠠᠳᠠᠵᠦ ᠪᠣᠯᠣᠨ᠎ᠠ᠃ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠪᠣᠢ ᠪᠣᠯᠣᠬᠰᠠᠨ ᠠᠴᠠ ᠨᠠᠭᠠᠰᠢᠬᠢ ᠲᠠᠬᠢᠯᠭ᠎ᠠ ᠰᠢᠳᠦᠯᠭᠡ ᠶᠢᠨ ᠲᠣᠳᠣᠷ᠎ᠠ ᠣᠰᠣ ᠶᠢᠨ  ᠰᠢᠳᠦᠯᠭᠡ ᠨᠢ ᠦᠨᠡᠨ ᠳᠡᠭᠡᠨ ᠮᠣᠳᠣᠨ ᠰᠢᠳᠦᠯᠭᠡ ᠠᠴᠠ ᠴᠦ ᠡᠮᠦᠨ᠎ᠡ ᠪᠣᠢ ᠪᠣᠯᠣᠬᠰᠠᠨ ᠪᠠᠯᠠᠷᠯᠢᠬ ᠰᠢᠳᠦᠯᠭᠡ ᠶᠢᠨ  ᠨᠢᠭᠡ ᠬᠡᠯᠪᠡᠷᠢ ᠪᠠᠶᠢᠵᠦ ᠲᠠᠭᠠᠷᠠᠨ᠎ᠠ︾ ᠭᠡᠵᠡᠢ᠃         ᠰᠢᠨᠵᠢᠯᠡᠬᠦ ᠣᠬᠠᠭᠠᠨᠳᠠᠳ ᠠᠴᠠ᠄ ︽ᠬᠦᠮᠦᠨ ᠤ ᠪᠡᠶ᠎ᠡ ᠶᠢᠨ ᠵᠠᠭᠤᠨ ᠤ ᠨᠠᠶᠠ ᠣᠷᠴᠢᠮ ᠢ ᠣᠰᠣ ᠡᠵᠡᠯᠡᠵᠦ᠂  ᠲᠡᠯᠡᠬᠡᠢ ᠶᠢᠨ ᠪᠦᠮᠪᠦᠷᠴᠡᠭ ᠤᠨ ᠵᠠᠭᠤᠨ ᠤ ᠲᠠᠯᠠ ᠣᠷᠴᠢᠮ ᠢ ᠨᠢ ᠣᠰᠣ ᠡᠵᠡᠯᠡᠵᠦ ᠪᠠᠶᠢᠨ᠎ᠠ᠃ ᠠᠩᠬᠠᠨ ᠤ ᠠᠮᠢ ᠨᠢ  ᠣᠰᠣᠨ ᠠᠴᠠ ᠡᠭᠦᠰᠴᠦ ᠪᠣᠢ ᠪᠣᠯᠣᠬᠰᠠᠨ ᠠᠴᠠ ᠣᠰᠣ ᠨᠢ ᠠᠯᠢᠪᠠ ᠠᠮᠢᠳᠠᠨ ᠪᠣᠳᠠᠰ ᠤᠨ ᠡᠬᠢ︾ ᠭᠡᠵᠦ ᠰᠢᠨᠵᠢᠯᠡᠨ  ᠰᠣᠳᠣᠯᠣᠬᠰᠠᠨ ᠠᠴᠠ ᠦᠵᠡᠪᠡᠯ ᠠᠮᠢ ᠨᠠᠰᠣ ᠨᠢ ᠣᠰᠣᠨ ᠠᠴᠠ ᠰᠠᠯᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ ᠪᠢᠳᠡ  ᠲᠣᠳᠣᠷᠬᠠᠢ ᠮᠡᠳᠡᠬᠦ ᠪᠣᠯᠵᠠᠢ᠃ ᠪᠠᠰᠠ ᠵᠠᠷᠢᠮ ᠡᠷᠳᠡᠮᠳᠡᠳ ᠠᠴᠠ ︽ᠣᠰᠣ ᠨᠢ ᠠᠮᠢ ᠲᠠᠢ ᠮᠦᠷᠳᠡᠭᠡᠨ ᠬᠦᠮᠦᠨ ᠤ  ᠦᠭᠡ ᠶᠠᠷᠢᠶ᠎ᠠ ᠵᠡᠷᠭᠡ ᠶᠢᠨ ᠰᠢᠯᠳᠠᠭᠠᠨ ᠠᠴᠠ ᠪᠣᠯᠵᠦ ᠰᠢᠨᠵᠢ ᠴᠢᠨᠠᠷ ᠢᠶᠠᠨ ᠬᠤᠪᠢᠷᠠᠭᠤᠯᠵᠦ ᠴᠢᠳᠠᠳᠠᠭ ᠰᠢᠳᠢ ᠶᠢᠨ  ᠬᠦᠴᠦᠨ ᠲᠠᠢ︾ ᠭᠡᠵᠦ ᠶᠠᠷᠢᠵᠦ ᠦᠡᠭᠭᠡᠷᠡᠪᠠ᠃          ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠪᠣᠢ ᠪᠣᠯᠣᠬᠰᠠᠨ ᠤ ᠲᠠᠷᠠᠭ᠎ᠠ ᠣᠢ ᠣᠬᠠᠭᠠᠨ ᠨᠢ ᠬᠦᠭᠵᠢᠯᠳᠡ ᠪᠠᠨ ᠣᠯᠬᠤ ᠲᠠᠢ  ᠵᠡᠷᠭᠡ ᠣᠰᠣᠨ ᠤ ᠦᠢᠯᠡᠳᠦᠯ ᠬᠡᠷᠡᠭᠴᠡᠭᠡ ᠶᠢ ᠣᠯᠠᠮ ᠢᠶᠠᠷ ᠲᠠᠨᠢᠵᠦ ᠣᠰᠣ ᠶᠢ ᠶᠠᠮᠠᠷ ᠨᠢᠭᠡᠨ ᠰᠢᠳᠢ ᠶᠢᠨ ᠬᠦᠴᠦᠨ ᠤ  ᠪᠡᠯᠭᠡ ᠲᠡᠮᠳᠡᠭ ᠪᠣᠯᠭᠠᠵᠦ ᠰᠢᠳᠦᠨ ᠪᠢᠰᠢᠷᠡᠵᠦ ᠡᠬᠢᠯᠡᠭᠰᠡᠨ ᠪᠠᠶᠢᠵᠦ ᠲᠠᠭᠠᠷᠠᠨ᠎ᠠ᠃ ᠡᠭᠦᠨ ᠤ ᠲᠣᠬᠠᠢ ᠪᠢᠳᠡ ᠭᠤᠷᠪᠠᠨ  ᠲᠠᠯ᠎ᠠ ᠠᠴᠠ ᠲᠠᠭᠠᠮᠠᠬᠯᠠᠶ᠎ᠠ᠃          ᠡᠩ ᠲᠡᠷᠢᠭᠦᠨ ᠳᠤ᠂ ᠲᠡᠦᠬᠡ ᠶᠢᠨ ᠮᠠᠯᠳᠠᠮᠠᠯ ᠵᠢᠴᠢ ᠡᠷᠳᠡᠮᠳᠡᠳ ᠤᠨ ᠰᠣᠳᠣᠯᠭᠠᠨ ᠢ ᠦᠨᠳᠦᠰᠦᠯᠡᠪᠡᠯ ᠬᠠᠮᠤᠬ  ᠠᠩᠬᠠᠨ ᠤ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠰᠣᠶᠣᠯ ᠨᠢ ᠪᠦᠷ ᠲᠠᠯᠠᠢ ᠲᠠᠭᠠᠦ ᠣᠷᠣᠨ ᠪᠣᠶᠣ ᠭᠤᠣᠯ ᠮᠦᠷᠡᠨ ᠤ ᠰᠠᠪᠠ  ᠭᠠᠵᠠᠷ ᠢᠶᠠᠷ ᠡᠭᠦᠰᠦᠭᠰᠡᠨ ᠭᠡᠳᠡᠭ ᠪᠠᠷᠢᠮᠳᠠ ᠪᠠᠶᠢᠨ᠎ᠠ᠃ ᠵᠢᠱᠢᠶᠡᠯᠡᠪᠡᠯ᠄ ᠬᠤᠷᠴᠢᠨ ᠨᠣᠳᠤᠬ ᠨᠢ ᠲᠣᠮᠳᠠᠳᠦ ᠶᠢᠨ  ᠪᠣᠯᠪᠠᠰᠣᠨ ᠤ ᠭᠤᠷᠪᠠᠨ ᠡᠬᠢ ᠡᠭᠦᠰᠦᠯ ᠤᠨ ᠨᠢᠭᠡ ᠪᠣᠯᠬᠤ ︽ᠪᠠᠷᠠᠭᠤᠨ ᠯᠢᠶᠣᠣ ᠾᠧ ᠭᠤᠣᠯ ᠤᠨ ᠪᠣᠯᠪᠠᠰᠣᠨ︾ ᠤ  ᠭᠤᠣᠯ ᠣᠷᠣᠨ ᠭᠡᠳᠡᠭ᠃ ᠡᠭᠦᠨ ᠠᠴᠠ ᠪᠢᠳᠡ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠬᠢᠭᠡᠳ ᠠᠮᠢᠳᠦ ᠪᠣᠳᠠᠰ ᠨᠢ ᠣᠰᠣᠨ ᠠᠴᠠ  ᠡᠭᠦᠰᠦᠭᠰᠡᠨ ᠮᠦᠷᠳᠡᠭᠡᠨ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠪᠣᠯᠪᠠᠰᠣᠨ ᠨᠢ ᠣᠰᠣᠨ ᠠᠴᠠ ᠢᠮᠠᠬᠤ ᠶᠢᠨ ᠲᠡᠳᠦᠢ ᠴᠦ  ᠰᠠᠯᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ ᠮᠡᠳᠡᠵᠦ ᠪᠣᠯᠣᠨ᠎ᠠ᠃ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠳᠤ ᠠᠪᠴᠦ ᠬᠡᠯᠡᠪᠡᠯ ᠣᠰᠣᠨ ᠤ  ᠲᠣᠬᠠᠢ ᠣᠢᠢᠯᠠᠭᠠᠯᠳᠠ ᠨᠢ ᠬᠠᠮᠤᠬ ᠠᠩᠬᠠᠨ ᠤ ᠣᠢᠢᠯᠠᠭᠠᠯᠳᠠ ᠶᠢᠨ ᠬᠢᠨ ᠨᠢᠭᠡ ᠨᠢ ᠪᠠᠶᠢᠵᠦ ᠣᠰᠣ ᠶᠢ ᠰᠢᠳᠢ ᠶᠢᠨ  ᠬᠦᠴᠦᠨ ᠲᠠᠢ ᠭᠡᠵᠦ ᠦᠵᠡᠬᠦ ᠨᠢ ᠠᠶᠠᠨᠳᠠᠭᠠᠨ ᠤ ᠣᠴᠢᠷ ᠪᠢᠯᠡ᠃          ᠬᠤᠶᠠᠷ ᠲᠤ᠂ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠬᠦᠴᠦᠨ ᠬᠦᠭᠵᠢᠯᠳᠡ ᠪᠠᠨ ᠣᠯᠤᠭ᠎ᠠ ᠦᠭᠡᠢ ᠪᠠᠶᠢᠬᠰᠠᠨ ᠪᠠᠯᠠᠷ  ᠡᠷᠳᠡᠨ ᠤ ᠬᠦᠮᠦᠰ ᠭᠤᠣᠯ ᠮᠦᠷᠡᠨ ᠤ ᠬᠦᠪᠡᠭᠡ ᠲᠠᠭᠠᠦ ᠣᠰᠣ ᠶᠢ ᠪᠠᠷᠠᠳᠠᠨ ᠰᠠᠭᠤᠵᠦ᠂ ᠣᠰᠣᠨ ᠤ ᠡᠬᠢ ᠪᠠᠶᠠᠯᠢᠬ  ᠪᠣᠯᠬᠤ ᠵᠢᠭᠠᠰᠣ᠂ ᠵᠢᠷᠠᠭᠠᠬᠠᠢ᠂ ᠰᠠᠮ ᠬᠤᠷᠣᠬᠠᠢ ᠁ ᠵᠡᠷᠭᠡ ᠪᠠᠷ ᠬᠤᠭᠤᠯᠠ ᠪᠣᠯᠭᠠᠵᠦ ᠠᠮᠢᠳᠣᠷᠠᠯ ᠢᠶᠠᠨ  ᠦᠷᠭᠦᠯᠵᠢᠯᠡᠭᠦᠯᠳᠡᠭ ᠠᠴᠠ ᠭᠠᠳᠠᠨ᠎ᠠ᠂ ᠬᠠᠭᠤᠷᠠᠢ ᠶᠢᠨ ᠲᠣᠬᠰᠢᠨ ᠠᠷᠢᠶᠠᠳᠠᠨ ᠤ ᠠᠶᠣᠯ ᠢ ᠣᠰᠣᠨ ᠳᠤ ᠦᠰᠦᠷᠦᠨ  ᠣᠷᠣᠵᠦ ᠲᠠᠯᠳᠠᠯᠠᠳᠠᠭ ᠠᠴᠠ ᠡᠯᠪᠡᠭ ᠪᠠᠶᠠᠯᠢᠬ ᠢᠳᠡᠭᠡᠨ ᠬᠠᠨᠭ᠍ᠭᠠᠵᠦ ᠠᠶᠣᠯ ᠵᠣᠪᠠᠯᠠᠩ ᠠᠴᠠ ᠵᠠᠶᠢᠯᠠᠭᠤᠯᠳᠠᠬ  ᠣᠰᠣ ᠶᠢ ᠶᠠᠮᠠᠷ ᠨᠢᠭᠡᠨ ᠬᠤᠪᠢᠯᠭᠠᠨ ᠬᠦᠴᠦᠨ ᠠᠴᠠ ᠵᠠᠬᠢᠷᠴᠦ ᠪᠠᠶᠢᠨ᠎ᠠ ᠭᠡᠬᠦ ᠰᠡᠳᠭᠢᠭᠳᠡᠯ ᠪᠣᠢ ᠪᠣᠯᠵᠦ ᠣᠰᠣ ᠶᠢ  ᠲᠠᠬᠢᠵᠦ ᠰᠢᠳᠦᠬᠦ ᠨᠢ ᠠᠶᠠᠨᠳᠠᠭᠠᠨ ᠤ ᠣᠴᠢᠷ ᠪᠣᠯᠣᠨ᠎ᠠ᠃            ᠭᠤᠷᠪᠠ ᠳᠤ᠂ ᠪᠠᠯᠠᠷ ᠡᠷᠳᠡᠨ ᠤ ᠨᠡᠶᠢᠭᠡᠮ ᠳᠤ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠬᠦᠴᠦᠨ ᠤ ᠲᠦᠪᠰᠢᠨ ᠲᠦᠢᠯ ᠤᠨ  ᠲᠣᠷᠣᠢ ᠪᠠᠭᠤᠷᠠᠢ᠂ ᠬᠦᠮᠦᠰ ᠤᠨ ᠲᠠᠨᠢᠯᠳᠠ ᠨᠢᠯᠬᠠᠰᠠᠬ ᠪᠠᠯᠠᠷ᠂ ᠮᠡᠳᠡᠴᠡ ᠮᠡᠳᠡᠯᠭᠡ ᠲᠣᠩ ᠢᠪᠴᠣᠣ ᠮᠡᠬᠦᠰ᠂  ᠪᠠᠶᠢᠭᠠᠯᠢ ᠶᠢᠨ ᠵᠢᠮ᠎ᠡ ᠶᠣᠰᠣ ᠶᠢ ᠲᠠᠨᠢᠵᠦ ᠲᠡᠶᠢᠯᠦᠭᠡᠳᠦᠢ᠂ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠪᠠᠶᠢᠭᠠᠯᠢ ᠶᠢ ᠡᠷᠬᠡᠰᠢᠶᠡᠨ  ᠵᠠᠬᠢᠷᠴᠦ ᠴᠢᠳᠠᠭᠠᠳᠣᠢ ᠪᠠᠶᠢᠬᠰᠠᠨ ᠪᠣᠯᠬᠤᠷ ᠣᠰᠣᠨ ᠠᠴᠠ ᠡᠭᠦᠰᠦᠭᠰᠡᠨ ᠦᠶᠡᠷ ᠣᠰᠣᠳᠣᠯ᠂ ᠭᠠᠨᠭ᠌ ᠬᠠᠭᠰᠠᠷᠠᠭᠠᠨ ᠤ  ᠭᠠᠮᠰᠢᠬ᠂ ᠪᠣᠷᠣᠭᠠᠨ ᠬᠤᠷ᠎ᠠ ᠁ ᠵᠡᠷᠭᠡ ᠶᠢ ᠶᠠᠮᠠᠷ ᠨᠢᠭᠡᠨ ᠲᠠᠯᠳᠠ ᠶᠢᠨ ᠬᠦᠴᠦᠨ ᠵᠠᠬᠢᠷᠣᠨ ᠡᠵᠡᠮᠳᠡᠵᠦ  ᠪᠠᠶᠢᠬᠤ ᠪᠠᠷ ᠣᠢᠢᠯᠠᠭᠠᠨ ᠶᠢᠷᠳᠢᠨᠴᠦ ᠶᠢᠨ ᠲᠦᠮᠡᠨ ᠪᠣᠳᠠᠰ ᠲᠤ ᠡᠵᠡᠳ ᠣᠡᠭᠭᠤᠳ ᠲᠠᠢ ᠭᠡᠵᠦ ᠦᠵᠡᠬᠦ ᠪᠣᠯᠵᠦ  ᠣᠰᠣ ᠶᠢ ᠲᠠᠬᠢᠵᠦ ᠰᠢᠳᠦᠬᠦ ᠨᠢ ᠠᠶᠠᠨᠳᠠᠭᠠᠨ ᠤ ᠣᠴᠢᠷ ᠪᠣᠯᠣᠨ᠎ᠠ᠃          ᠡᠷᠳᠡᠮᠳᠡᠳ ᠠᠴᠠ ᠮᠣᠩᠭᠤᠯᠴᠣᠳ ᠤᠨ ᠲᠣᠮᠳᠠ ᠣᠯᠠᠮᠵᠢᠯᠠᠬᠳᠠᠵᠦ ᠢᠷᠡᠭᠰᠡᠨ ᠰᠢᠳᠢᠳᠦ ᠦᠯᠢᠭᠡᠷ᠂ ᠲᠣᠮᠤᠬ  ᠶᠠᠷᠢᠶ᠎ᠠ ᠵᠡᠷᠭᠡ ᠶᠢ ᠪᠠᠯᠠᠷ ᠡᠷᠳᠡᠨ ᠤ ᠦᠶ᠎ᠡ ᠳᠤ ᠪᠣᠢ ᠪᠣᠯᠣᠬᠰᠠᠨ ᠭᠡᠵᠦ ᠦᠵᠡᠪᠡ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠰᠢᠳᠢᠳᠦ  ᠦᠯᠢᠭᠡᠷ ᠢ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠬᠦᠭᠵᠢᠯ ᠤᠨ ᠱᠠᠳᠣᠨ ᠤ ᠪᠠᠯᠠᠷ ᠡᠷᠳᠡᠨ ᠤ ᠨᠡᠶᠢᠭᠡᠮ ᠳᠤ ᠡᠭᠦᠰᠦᠨ ᠪᠣᠢ  ᠪᠣᠯᠣᠬᠰᠠᠨ ᠰᠣᠶᠣᠯ ᠣᠷᠠᠯᠢᠬ ᠤᠨ ᠪᠦᠳᠦᠭᠡᠯ ᠮᠦᠨ ᠭᠡᠵᠦ ᠰᠠᠨᠠᠯ ᠨᠢᠭᠡᠳᠡᠢ ᠦᠵᠡᠵᠦ᠂ ᠰᠢᠳᠢᠳᠦ ᠦᠯᠢᠭᠡᠷ ᠢ ᠪᠠᠯᠠᠷ  ᠡᠷᠳᠡᠨ ᠤ ᠨᠡᠶᠢᠭᠡᠮ ᠤᠨ ᠵᠡᠷᠯᠢᠭ ᠦᠶ᠎ᠡ ᠶᠢᠨ ᠲᠣᠣᠷᠠᠳᠦ ᠱᠠᠳᠣᠨ ᠳᠤ ᠡᠭᠦᠰᠦᠭᠰᠡᠨ ᠭᠡᠵᠦ ᠦᠵᠡᠳᠡᠭ ᠨᠢ ᠮᠣᠷᠭᠠᠨ᠂  ᠮᠠᠷᠺᠰ᠂ ᠡᠩᠭᠧᠯᠰ ᠨᠠᠷ ᠤᠨ ᠲᠣᠷᠠᠳᠣᠯᠳᠠ ᠶᠢ ᠦᠨᠳᠦᠰᠦᠯᠡᠭᠰᠡᠨ ᠶᠣᠮ ᠭᠡᠵᠦ ︽ᠮᠣᠩᠭᠤᠯ ᠣᠷᠠᠨ ᠵᠣᠬᠢᠶᠠᠯ ᠤᠨ  ᠲᠡᠦᠬᠡ︾ ᠭᠡᠳᠡᠭ ᠨᠣᠮ ᠳᠤ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠵᠦ ᠪᠠᠶᠢᠭ᠎ᠠ ᠶᠣᠮ᠃ ᠡᠭᠦᠨ ᠠᠴᠠ ᠪᠢᠳᠡ ᠣᠰᠣ ᠶᠢᠨ ᠲᠠᠬᠢᠯᠭ᠎ᠠ  ᠰᠢᠳᠦᠯᠭᠡ ᠨᠢ ᠰᠢᠳᠢᠳᠦ ᠦᠯᠢᠭᠡᠷ ᠪᠣᠢ ᠪᠣᠯᠬᠤ ᠠᠴᠠ ᠡᠮᠦᠨ᠎ᠡ ᠲᠣᠬᠠᠢᠢᠯᠠᠪᠠᠯ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠣᠢ  ᠣᠬᠠᠭᠠᠨ ᠨᠢ ᠬᠦᠭᠵᠢᠯᠳᠡ ᠪᠠᠨ ᠣᠯᠬᠤ ᠲᠠᠢ ᠵᠡᠷᠭᠡ ᠯᠡ ᠡᠬᠢᠯᠡᠵᠦ ᠪᠣᠢ ᠪᠣᠯᠣᠬᠰᠠᠨ ᠭᠡᠳᠡᠭ ᠢ ᠮᠡᠳᠡᠵᠦ ᠪᠣᠯᠣᠨ᠎ᠠ᠃          ᠲᠡᠦᠬᠡᠨ ᠠᠴᠠ ᠠᠪᠣᠭᠠᠳ ᠮᠣᠩᠭᠤᠯᠴᠣᠳ ᠨᠢ ᠣᠰᠣ ᠶᠢ ᠡᠬᠡ ᠶᠢᠨ ᠰᠦ ᠲᠠᠢ ᠪᠠᠨ ᠵᠦᠢᠷᠯᠡᠵᠦ ᠴᠡᠪᠡᠷ  ᠲᠣᠩᠭᠠᠯᠠᠬ ᠪᠠᠶᠢᠯᠭᠠᠬᠤ ᠶᠢ ᠡᠷᠬᠢᠮ ᠪᠣᠯᠭᠠᠵᠦ ᠦᠵᠡᠭᠰᠡᠭᠡᠷ ᠢᠷᠡᠪᠡ᠃ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︾  ᠵᠡᠷᠭᠡ ᠶᠢᠨ ᠲᠡᠦᠬᠡ ᠶᠢᠨ ᠪᠠᠷᠢᠮᠳᠠ ᠶᠢ ᠦᠨᠳᠦᠰᠦᠯᠡᠪᠡᠯ᠂ ᠠᠷᠪᠠᠨ ᠭᠤᠷᠪᠠᠳᠣᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠡ ᠪᠠᠷ  ᠶᠡᠭᠡ ᠮᠣᠩᠭᠤᠯ ᠣᠯᠣᠰ ᠤᠨ ᠡᠭᠦᠰᠭᠡᠨ ᠪᠠᠶᠢᠭᠤᠯᠣᠬᠴᠢ ᠪᠣᠬᠳᠠ ᠡᠵᠡᠨ ᠴᠢᠩᠬᠢᠰ ᠬᠠᠭᠠᠨ ᠠᠴᠠ ᠣᠯᠣᠰ ᠤᠨ ᠬᠠᠦᠯᠢ  ᠴᠠᠭᠠᠵᠠ ᠳᠠᠭᠠᠨ᠄ ︽ᠣᠷᠣᠰᠬᠠᠯ ᠣᠰᠣᠨ ᠳᠤ ᠬᠤᠪᠴᠠᠰᠣ ᠣᠬᠢᠶᠠᠵᠦ ᠪᠣᠯᠬᠤ ᠦᠭᠡᠢ᠂ ᠬᠡᠷᠪᠡ ᠣᠷᠣᠰᠬᠠᠯ  ᠣᠰᠣᠨ ᠳᠤ ᠬᠤᠪᠴᠠᠰᠣ ᠣᠬᠢᠶᠠᠭᠠᠳ ᠮᠦᠡᠭᠬᠡ ᠲᠡᠭᠷᠢ ᠶᠢ ᠬᠢᠯᠢᠩᠨᠡᠭᠦᠯᠪᠡᠯ ᠲᠡᠭᠦᠨ ᠢ ᠠᠯᠠᠨ᠎ᠠ︾ ᠭᠡᠵᠦ  ᠲᠣᠬᠳᠠᠭᠠᠬᠰᠠᠨ ᠪᠠᠶᠢᠳᠠᠬ᠃ ᠡᠭᠦᠨ ᠠᠴᠠ ᠪᠢᠳᠡ ᠮᠣᠩᠭᠤᠯᠴᠣᠳ ᠨᠢ ᠡᠷᠳᠡ ᠲᠡᠭᠡᠳᠦ ᠠᠴᠠ ᠪᠠᠨ ᠠᠪᠣᠭᠠᠳ  ᠣᠰᠣ ᠶᠢ ᠮᠦᠡᠭᠬᠡ ᠲᠡᠭᠷᠢ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ᠂ ᠡᠵᠡᠳ ᠰᠠᠬᠢᠭᠤᠰᠣ ᠲᠠᠢ ᠬᠡᠮᠡᠨ ᠰᠢᠳᠢᠴᠢᠯᠡᠨ ᠦᠵᠡᠭᠰᠡᠭᠡᠷ  ᠢᠷᠡᠪᠡ ᠭᠡᠳᠡᠭ ᠢ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠣᠯᠣᠨ᠎ᠠ᠃             ᠣᠰᠣᠨ ᠤ ᠰᠢᠳᠦᠯᠭᠡ ᠶᠢᠨ ᠬᠡᠯᠪᠡᠷᠢ ᠪᠠ ᠬᠤᠪᠢᠷᠠᠯᠳᠠ          ᠮᠣᠩᠭᠤᠯᠴᠣᠳ ᠤᠨ ᠲᠣᠮᠳᠠ ᠣᠯᠠᠮᠵᠢᠯᠠᠬᠳᠠᠬᠰᠠᠨ ᠰᠢᠳᠢᠳᠦ ᠦᠯᠢᠭᠡᠷ ᠪᠣᠯᠣᠨ ᠲᠣᠮᠤᠬ ᠦᠯᠢᠭᠡᠷ᠂  ᠣᠯᠠᠮᠵᠢᠯᠠᠯ ᠦᠯᠢᠭᠡᠷ ᠁ ᠵᠡᠷᠭᠡ ᠳᠤ ᠣᠰᠣ ᠶᠢ ᠰᠢᠳᠢᠴᠢᠯᠡᠵᠦ ᠣᠰᠣ ᠶᠢ ᠲᠠᠬᠢᠵᠦ ᠰᠢᠳᠦᠵᠦ ᠪᠠᠶᠢᠬᠰᠠᠨ ᠲᠣᠬᠠᠢ  ᠣᠯᠠᠨᠳᠠ ᠲᠣᠷᠠᠳᠣᠬᠳᠠᠳᠠᠬ ᠶᠣᠮ᠃ ᠡᠭᠦᠨ ᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠰᠢᠳᠢᠳᠦ ᠦᠯᠢᠭᠡᠷ ᠪᠣᠯᠣᠨ ᠲᠣᠮᠤᠬ  ᠦᠯᠢᠭᠡᠷ ᠵᠡᠷᠭᠡ ᠠᠴᠠ ᠪᠢᠳᠡ ᠡᠷᠳᠡ ᠴᠠᠬ ᠲᠤ ᠣᠰᠣ ᠶᠢ ᠲᠣᠬᠳᠠᠮᠠᠯ ᠬᠤᠭᠤᠴᠠᠭ᠎ᠠ ᠲᠠᠢ ᠪᠠᠷ ᠠᠮᠢᠳᠦ ᠬᠦᠮᠦᠨ ᠢᠶᠠᠷ  ᠠᠮᠢᠯᠠᠨ ᠲᠠᠬᠢᠳᠠᠬ ᠪᠠᠶᠢᠬᠰᠠᠨ ᠢ ᠮᠡᠳᠡᠵᠦ ᠪᠣᠯᠣᠨ᠎ᠠ᠃ ᠵᠢᠱᠢᠶᠡᠯᠡᠪᠡᠯ᠄ ︿ᠭᠠᠯ ᠣᠯᠠᠭᠠᠨ ᠬᠠᠭᠠᠨ﹀ ᠭᠡᠬᠦ  ᠦᠯᠢᠭᠡᠷ ᠲᠤ ᠵᠢᠯ ᠪᠦᠷᠢ ᠨᠠᠢᠮᠠᠨ ᠨᠠᠰᠣᠳᠠᠢ ᠬᠡᠦᠬᠡᠳ ᠢᠶᠠᠷ ᠲᠠᠯᠠᠢ ᠲᠠᠬᠢᠳᠠᠬ ᠭᠠᠯ ᠣᠯᠠᠭᠠᠨ ᠬᠠᠭᠠᠨ ᠤ ᠲᠣᠬᠠᠢ  ᠦᠭᠦᠯᠡᠳᠡᠭ᠃ ︿ᠪᠣᠶᠠᠨᠳᠦ ᠬᠦᠦ ᠢᠷᠦᠭᠡᠯᠳᠦ ᠬᠦᠦ﹀ ᠭᠡᠬᠦ ᠦᠯᠢᠭᠡᠷ ᠲᠤ ᠬᠠᠭᠠᠨ ᠵᠢᠯ ᠪᠦᠷᠢ ᠪᠠᠷᠰ ᠵᠢᠯ ᠲᠠᠢ  ᠬᠡᠦᠬᠡᠳ ᠢᠶᠠᠷ ᠲᠠᠯᠠᠢ ᠲᠠᠬᠢᠳᠠᠬ ᠭᠡᠵᠦ ᠦᠭᠦᠯᠡᠪᠡ᠃ ᠡᠨᠡ ᠦᠯᠢᠭᠡᠷ ᠲᠤ ᠬᠦᠮᠦᠨ ᠢ ᠠᠯᠠᠵᠦ ᠲᠠᠯᠠᠢ ᠨᠠᠭᠤᠷ ᠢ  ᠠᠮᠢᠯᠠᠳᠠᠬ ᠵᠠᠩ ᠦᠢᠯᠡ ᠶᠢ ᠨᠡᠯᠢᠶᠡᠳ ᠪᠣᠳᠠᠳᠠᠢ ᠲᠦᠷᠰᠦᠯᠡᠭᠰᠡᠨ ᠨᠢ ᠰᠣᠨᠢᠷᠬᠠᠯᠳᠠᠢ᠃ ᠲᠣᠬᠠᠢᠢᠯᠠᠪᠠᠯ ︿ᠪᠠᠷᠰ  ᠵᠢᠯ ᠲᠠᠢ ᠬᠡᠦᠬᠡᠳ ᠢ ᠠᠯᠠᠵᠦ᠂ ᠡᠪᠴᠢᠭᠦᠦ ᠶᠢ ᠨᠢ ᠬᠠᠳᠠᠭᠠᠳ ᠴᠡᠭᠡᠵᠢᠨ ᠤ ᠬᠦᠨᠳᠡᠢ ᠳᠤᠨᠢ ᠶᠢᠰᠦᠨ ᠡᠷᠳᠡᠨᠢ ᠬᠢᠵᠦ᠂  ᠲᠦᠷᠪᠡᠨ ᠮᠦᠴᠢ ᠠᠴᠠ ᠨᠢ ᠬᠠᠳᠠᠬ ᠶᠠᠨᠳᠠᠷ ᠵᠡᠭᠦᠯᠭᠡᠭᠡᠳ ᠲᠠᠯᠠᠢ ᠳᠤ ᠬᠠᠶᠠᠳᠠᠬ﹀ ᠭᠡᠵᠦ ᠪᠠᠶᠢᠨ᠎ᠠ᠃ ᠪᠠᠰᠠ ᠬᠠᠳᠣᠨ  ᠭᠤᠣᠯ ᠳᠤ ᠬᠡᠦᠬᠡᠨ ᠣᠨᠠᠵᠦ ᠦᠬᠦᠭᠰᠡᠨ ᠠᠴᠠ ᠲᠡᠭᠡᠵᠦ ᠨᠡᠷᠡᠯᠡᠯ᠎ᠡ ᠭᠡᠬᠦ ᠪᠣᠶᠣ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠬᠡᠦᠬᠡᠨ  ᠭᠤᠣᠯ ᠤᠨ ᠲᠡᠭᠡᠭᠦᠷ ᠰᠠᠬᠰᠣ ᠲᠣᠬᠤᠢᠢᠯᠠᠬᠰᠠᠨ ᠬᠡᠦᠬᠡᠨ ᠬᠦᠮᠦᠨ ᠨᠠᠭᠠᠰᠢ ᠴᠠᠭᠠᠰᠢ ᠵᠣᠷᠴᠢᠨ ᠶᠠᠪᠣᠳᠠᠬ ᠁ ᠭᠡᠬᠦ  ᠮᠡᠳᠦ ᠣᠯᠠᠮᠵᠢᠯᠠᠯ ᠶᠠᠷᠢᠶ᠎ᠠ ᠣᠳᠣ ᠳᠤ ᠲᠣᠯᠳᠠᠯ᠎ᠠ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶᠢᠨ᠎ᠠ︾ ᠭᠡᠵᠡᠢ᠃ ᠣᠷᠴᠢᠨ ᠦᠶ᠎ᠡ ᠶᠢᠨ  ᠲᠡᠦᠬᠡᠨ ᠳᠤ ᠠᠮᠢᠳᠦ ᠬᠦᠮᠦᠨ ᠢ ᠣᠰᠣᠨ ᠳᠤ ᠣᠷᠬᠢᠬᠤ ᠲᠣᠬᠠᠢ ᠵᠠᠩᠰᠢᠯ ᠪᠠᠶᠢᠬᠤ ᠦᠭᠡᠢ ᠪᠣᠯᠣᠬᠰᠠᠨ ᠪᠣᠯᠪᠠᠴᠦ  ᠦᠬᠦᠭᠰᠡᠳ ᠢ ᠣᠰᠣᠨ ᠳᠤ ᠣᠷᠣᠰᠢᠭᠤᠯᠬᠤ ᠵᠠᠩᠰᠢᠯ ᠣᠳᠣ ᠳᠤ ᠲᠣᠯᠳᠠᠯ᠎ᠠ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃  ᠬᠤᠷᠴᠢᠨ ᠤ ᠵᠠᠷᠢᠮ ᠭᠠᠵᠠᠷ ᠣᠷᠣᠨ ᠳᠤ ᠨᠠᠰᠣᠨ ᠲᠣᠮᠳᠠ ᠪᠠᠨ ᠨᠦᠭᠴᠢᠭᠰᠡᠳ᠂ ᠵᠣᠯ ᠪᠣᠰᠣ ᠪᠠᠷ ᠨᠦᠭᠴᠢᠭᠰᠡᠳ᠂  ᠰᠣᠯᠢᠶ᠎ᠠ ᠡᠪᠡᠳᠴᠢᠨ ᠠᠴᠠ ᠪᠣᠯᠵᠦ ᠨᠦᠭᠴᠢᠭᠰᠡᠨ ᠁ ᠵᠡᠷᠭᠡ ᠶᠢ ᠰᠢᠳᠠᠭᠠᠵᠦ ᠲᠡᠭᠳᠡᠭᠡᠭᠰᠡᠨ ᠴᠢᠨᠳᠠᠷ ᠢ ᠨᠢ  ᠬᠠᠶᠢᠷᠴᠠᠬ ᠲᠤ ᠬᠢᠵᠦ ᠣᠰᠣᠨ ᠳᠤ ᠣᠷᠣᠰᠬᠠᠵᠦ ᠶᠠᠪᠣᠭᠤᠯᠬᠤ ᠭᠡᠳᠡᠭ ᠣᠷᠣᠰᠢᠭᠤᠯᠭ᠎ᠠ ᠶᠢᠨ ᠠᠷᠭ᠎ᠠ ᠪᠠᠶᠢᠳᠠᠬ᠃  ᠢᠡᠭᠭᠢᠵᠦ ᠣᠷᠣᠰᠢᠭᠤᠯᠣᠬᠰᠠᠨ ᠬᠦᠮᠦᠨ ᠤ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠨᠢ ᠴᠢᠨᠳᠠᠷ ᠢᠶᠠᠨ ᠲᠠᠭᠠᠵᠦ ᠣᠰᠣᠨ ᠳᠤ  ᠷᠠᠰᠢᠶᠠᠯᠠᠬᠳᠠᠭᠠᠳ ᠣᠷᠣᠰᠴᠦ ᠶᠠᠪᠣᠳᠠᠬ ᠠᠴᠠ ᠰᠠᠳᠣᠨ ᠲᠦᠷᠦᠯ ᠤᠨ ᠬᠦᠮᠦᠰ ᠲᠤᠨᠢ ᠡᠶᠢᠮᠦᠷᠬᠦᠤ ᠡᠪᠡᠳᠴᠢᠨ  ᠲᠠᠬᠢᠵᠦ ᠢᠯᠡᠷᠡᠬᠦ ᠦᠭᠡᠢ ᠭᠡᠳᠡᠭ ᠶᠣᠰᠣ ᠵᠠᠩᠰᠢᠯ ᠪᠠᠶᠢᠳᠠᠬ ᠶᠣᠮ᠃ ᠲᠡᠶᠢᠨ ᠬᠦ ᠡᠷᠳᠡ ᠴᠠᠬ ᠲᠤ ᠣᠰᠣ ᠶᠢ  ᠠᠮᠢᠯᠠᠬᠤ ᠳᠤ ᠴᠢᠰᠣ᠂ ᠰᠦ ᠵᠡᠷᠭᠡ ᠶᠢ ᠲᠣᠰᠣᠭᠠᠵᠦ ᠰᠠᠴᠣᠬᠤ ᠬᠡᠯᠪᠡᠷᠢ ᠯᠠᠪᠳᠠᠢ ᠪᠠᠶᠢᠬᠰᠠᠨ ᠪᠦᠭᠡᠳ  ᠬᠦᠮᠦᠨᠴᠢᠯᠡᠭᠰᠡᠨ ᠰᠢᠳᠦᠭᠡᠨ ᠠᠴᠠ ᠵᠢᠪᠡᠭᠦᠴᠡᠬᠦ ᠪᠣᠯᠬᠤ ᠶᠢ ᠲᠠᠭᠠᠯᠳᠣᠨ ᠴᠡᠭᠡᠷᠯᠡᠭᠳᠡᠬᠦ ᠪᠣᠯᠵᠠᠢ᠃          ᠣᠷᠴᠢᠨ ᠦᠶ᠎ᠡ ᠳᠤ ᠮᠣᠩᠭᠤᠯᠴᠣᠳ ᠣᠰᠣ ᠶᠢ ᠣᠪᠣᠭ᠎ᠠ ᠪᠣᠰᠬᠠᠨ ᠲᠠᠬᠢᠬᠤ ᠪᠣᠯᠵᠠᠢ᠃ ᠡᠭᠦᠨ ᠤ ᠲᠣᠬᠠᠢ  ᠭᠠᠳᠠᠰᠣ ᠠᠴᠠ ︽ᠮᠣᠩᠭᠤᠯ ᠣᠷᠣᠨ ᠤ ᠠᠶᠢᠮᠠᠬ ᠶᠠᠰᠣᠳᠠᠨ ᠨᠤᠭᠤᠳ ᠤᠨ ᠬᠤᠭᠤᠷᠣᠨᠳᠣᠬᠢ ᠣᠰᠣ ᠲᠠᠬᠢᠬᠤ ᠬᠡᠯᠪᠡᠷᠢ  ᠪᠠ ᠵᠠᠩ ᠵᠠᠩᠰᠢᠯ ᠨᠢ ᠵᠣᠬᠢᠬᠤ ᠵᠦᠷᠢᠶᠡᠠᠲᠠᠢ ᠮᠦᠷᠳᠡᠭᠡᠨ ᠦᠪᠡᠷ ᠦᠪᠡᠷ ᠤᠨ ᠢᠶᠠᠨ ᠣᠨᠴᠠᠯᠢᠬ ᠲᠠᠢ ᠪᠠᠶᠢᠳᠠᠬ᠃  ᠵᠢᠱᠢᠶᠡᠯᠡᠪᠡᠯ᠂ ᠵᠠᠷᠢᠮ ᠭᠠᠵᠠᠷ ᠲᠤ ᠣᠪᠣᠭ᠎ᠠ ᠪᠣᠰᠬᠠᠨ ᠣᠰᠣ ᠲᠠᠬᠢᠬᠤ ᠳᠤ ᠵᠠᠷᠢᠮ ᠭᠠᠵᠠᠷ ᠲᠤᠨᠢ ᠰᠦᠮ᠎ᠡ ᠪᠣᠰᠬᠠᠨ  ᠣᠰᠣ ᠲᠠᠬᠢᠳᠠᠬ ᠶᠣᠮ᠃ ᠣᠪᠣᠭ᠎ᠠ ᠪᠣᠰᠬᠠᠨ ᠲᠠᠬᠢᠬᠤ ᠳᠤ ᠪᠣᠯᠠᠬ ᠤᠨ ᠬᠠᠵᠠᠭᠤ ᠳᠤ ᠪᠣᠰᠬᠠᠬᠰᠠᠨ ᠣᠪᠣᠭ᠎ᠠ ᠶᠢ ︿ ᠪᠣᠯᠠᠬ ᠤᠨ ᠣᠪᠣᠭ᠎ᠠ﹀ ᠭᠡᠵᠦ᠂ ᠷᠠᠰᠢᠶᠠᠨ ᠤ ᠲᠡᠷᠭᠡᠳᠡ ᠪᠣᠰᠬᠠᠬᠰᠠᠨ ᠣᠪᠣᠭ᠎ᠠ ᠶᠢ ︿ᠷᠠᠰᠢᠶᠠᠨ ᠣᠪᠣᠭ᠎ᠠ﹀᠂  ᠭᠤᠣᠯ ᠤᠨ ᠬᠦᠪᠡᠭᠡᠨ ᠳᠤ ᠪᠣᠰᠬᠠᠬᠰᠠᠨ ᠢ ᠨᠢ ︿ᠭᠤᠣᠯ ᠤᠨ ᠣᠪᠣᠭ᠎ᠠ﹀᠂ ᠨᠠᠭᠤᠷ ᠤᠨ ᠬᠦᠪᠡᠭᠡᠨ ᠳᠤ  ᠪᠣᠰᠬᠠᠬᠰᠠᠨ ᠢ ᠨᠢ ︿ᠨᠠᠭᠤᠷ ᠤᠨ ᠣᠪᠣᠭ᠎ᠠ﹀ ᠁ ᠭᠡᠬᠦ ᠮᠡᠳᠦ ᠪᠠᠷ ᠣᠰᠣ ᠲᠠᠢ ᠬᠠᠮᠢᠶᠠᠳᠠᠬᠰᠠᠨ ᠣᠪᠣᠭ᠎ᠠ ᠲᠣᠩ  ᠣᠯᠠᠨ ᠪᠠᠶᠢᠳᠠᠬ᠃ ᠡᠷᠳᠡ ᠳᠤ ᠣᠰᠣᠨ ᠤ ᠣᠪᠣᠭ᠎ᠠ ᠶᠢ ᠪᠣᠰᠬᠠᠬᠤ ᠳᠤ ᠠᠮᠢ ᠪᠠᠷ ᠱᠠᠩ ᠲᠠᠷᠣᠵᠦ ᠪᠣᠰᠬᠠᠵᠦ  ᠪᠠᠶᠢᠬᠰᠠᠨ ᠲᠣᠬᠠᠢ ᠵᠠᠷᠢᠮ ᠨᠣᠮ ᠪᠢᠴᠢᠭ ᠲᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠨ᠎ᠠ᠃ ᠬᠠᠨᠭ᠍ᠭᠢᠨ ᠤ ᠬᠠᠷ᠎ᠠ ᠮᠠᠩᠨᠠᠢ ᠨᠠᠭᠤᠷ ᠤᠨ  ᠬᠤᠶᠢᠳᠦ ᠣᠷᠣᠢ ᠳᠤ ᠪᠢᠳᠡᠭᠦᠦ ᠬᠠᠷ᠎ᠠ ᠬᠠᠯᠳᠠᠷ ᠬᠦᠮᠦᠨ ᠢ ᠠᠮᠢᠳᠦ ᠪᠠᠷ ᠨᠢ ᠪᠣᠯᠠᠵᠦ ᠠᠯᠳᠠᠨ ᠣᠪᠣᠭ᠎ᠠ ᠪᠣᠰᠬᠠᠯ᠎ᠠ  ᠭᠡᠳᠡᠭ᠃ ᠬᠤᠵᠢᠮ ᠨᠢ ᠣᠰᠣᠨ ᠤ ᠬᠠᠵᠠᠭᠤ ᠳᠤ ᠰᠦᠮ᠎ᠡ ᠪᠣᠰᠬᠠᠵᠦ ᠲᠠᠬᠢᠬᠤ ᠨᠢ ᠬᠤᠷᠴᠢᠨ ᠳᠤ ᠵᠦᠡᠭᠳᠡᠭᠡᠨ  ᠬᠠᠷᠠᠬᠳᠠᠳᠠᠬ ᠪᠤᠯᠪᠠ᠃ ᠡᠨᠡ ᠨᠢ ᠦᠨᠡᠨ ᠳᠡᠭᠡᠨ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠮᠣᠩᠭᠤᠯ ᠣᠷᠣᠨ ᠳᠤ  ᠣᠯᠠᠮᠵᠢᠯᠠᠬᠳᠠᠬᠰᠠᠨ ᠠᠴᠠ ᠰᠡᠬᠦᠯᠡᠷᠬᠢ ᠣᠴᠢᠷ ᠪᠣᠯᠵᠠᠢ᠃ ᠬᠤᠷᠴᠢᠨᠴᠣᠳ ᠡᠭᠦᠨ ᠢᠶᠠᠨ ᠯᠣᠣᠰ ᠤᠨ ᠰᠦᠮ᠎ᠡ ᠭᠡᠵᠦ  ᠶᠠᠷᠢᠳᠠᠬ ᠶᠣᠮ︾ ᠭᠡᠵᠡᠢ᠃ ᠠᠷᠪᠠᠨ ᠵᠢᠷᠭᠤᠳᠣᠭᠠᠷ ᠵᠠᠭᠤᠨ ᠤ ᠲᠣᠮᠳᠠᠴᠢ ᠪᠠᠷ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠨᠢ ᠮᠣᠩᠭᠤᠯ  ᠣᠷᠣᠨ ᠢᠶᠠᠷ ᠨᠡᠶᠢᠳᠡᠮ ᠲᠡᠯᠭᠡᠷᠡᠭᠰᠡᠨ ᠠᠴᠠ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ︽ᠠᠮᠢ ᠦᠯᠦ ᠲᠠᠰᠣᠯᠬᠤ︾ ᠭᠡᠬᠦ ᠨᠣᠮᠯᠠᠯ ᠢᠶᠠᠷ  ᠮᠣᠩᠭᠤᠯ ᠤᠨ ᠠᠷᠠᠳ ᠲᠦᠮᠡᠨ ᠤ ᠪᠦᠭᠡ ᠮᠦᠷᠭᠦᠯ ᠤᠨ ᠵᠠᠷᠢᠮ ᠵᠠᠩ ᠦᠢᠯᠡ᠂ ᠬᠠᠷᠬᠢᠰ ᠬᠤᠴᠣᠷᠣᠩᠭᠤᠢ  ᠬᠤᠶᠢᠯᠭ᠎ᠠ ᠶᠢᠨ ᠶᠣᠰᠣ᠂ ᠠᠮᠢᠳᠦ ᠬᠦᠮᠦᠨ ᠪᠠ ᠠᠳᠣᠭᠤᠰᠣ ᠮᠠᠯ ᠢᠶᠠᠷ ᠣᠰᠣ᠂ ᠭᠤᠣᠯ ᠮᠦᠷᠡᠨ ᠤ ᠠᠮᠢᠯᠠᠭ᠎ᠠ  ᠲᠠᠬᠢᠯᠭ᠎ᠠ᠂ ᠣᠪᠣᠭ᠎ᠠ ᠭᠠᠯ ᠵᠡᠷᠭᠡ ᠶᠢᠨ ᠠᠮᠢᠯᠠᠭ᠎ᠠ ᠲᠠᠬᠢᠯᠭ᠎ᠠ ᠶᠢᠨ ᠬᠠᠭᠤᠴᠢᠨ ᠵᠠᠩ ᠦᠢᠯᠡ ᠶᠢ ᠵᠠᠰᠠᠨ  ᠦᠭᠡᠷᠡᠴᠢᠯᠡᠵᠦ᠂ ᠣᠯᠠᠮᠵᠢᠯᠠᠯ ᠵᠠᠩ ᠦᠢᠯᠡ ᠶᠢᠨ ᠵᠠᠷᠢᠮ ᠵᠦᠢᠯ ᠢ ᠵᠠᠯᠭᠠᠮᠵᠢᠯᠠᠨ ᠲᠡᠭᠦᠨ ᠳᠤ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ  ᠰᠢᠨ᠎ᠡ ᠠᠭᠤᠯᠭ᠎ᠠ ᠶᠢ ᠰᠢᠩᠭᠡᠭᠡᠨ ᠣᠷᠣᠭᠤᠯᠵᠦ᠂ ᠣᠰᠣ ᠲᠠᠬᠢᠬᠤ᠂ ᠣᠪᠣᠭ᠎ᠠ ᠲᠠᠬᠢᠬᠤ᠂ ᠱᠠᠩᠰᠢ ᠲᠠᠬᠢᠬᠤ᠂ ᠯᠣᠣᠰ  ᠲᠠᠬᠢᠬᠤ ᠵᠡᠷᠭᠡ ᠳᠤ ᠯᠠᠮᠠ ᠨᠠᠷ ᠠᠴᠠ ᠨᠣᠮ ᠲᠠᠷᠨᠢ ᠣᠡᠭᠰᠢᠵᠦ ᠲᠠᠬᠢᠯ ᠪᠠᠯᠢᠩ ᠡᠷᠭᠦᠬᠦ᠂ ᠪᠣᠮ ᠲᠠᠷᠣᠬᠤ ᠵᠡᠷᠭᠡ ᠪᠠᠷ  ᠦᠭᠡᠷᠡᠴᠢᠯᠡᠪᠡ᠃          ᠲᠡᠭᠡᠷᠡᠬᠢ ᠰᠣᠷᠪᠣᠯᠵᠢᠯᠠᠭ᠎ᠠ ᠠᠴᠠ ᠦᠵᠡᠪᠡᠯ᠂ ᠣᠰᠣᠨ ᠤ ᠰᠢᠳᠦᠯᠭᠡ ᠨᠢ ᠬᠤᠵᠢᠮᠳᠠᠵᠦ ᠢᠷᠡᠭᠡᠳ ᠣᠰᠣᠨ ᠤ  ᠰᠢᠳᠦᠯᠭᠡ᠂ ᠣᠪᠣᠭ᠎ᠠ ᠰᠢᠳᠦᠯᠭᠡ᠂ ᠯᠣᠣᠰ ᠤᠨ ᠰᠢᠳᠦᠯᠭᠡ ᠶᠢᠨ ᠬᠡᠯᠪᠡᠷᠢ ᠪᠠᠷ ‍ᠣᠯᠠᠷᠢᠵᠦ ᠬᠤᠪᠢᠷᠠᠬᠰᠠᠨ ᠭᠡᠳᠡᠭ ᠢ  ᠮᠡᠳᠡᠵᠦ ᠪᠣᠯᠣᠨ᠎ᠠ᠃ ᠣᠰᠣᠨ ᠤ ᠰᠢᠳᠦᠯᠭᠡ ᠳᠤ ᠷᠠᠰᠢᠶᠠᠨ ᠪᠣᠯᠠᠬ ᠲᠤ ᠶᠡᠬᠡᠪᠴᠢᠯᠡᠨ ᠬᠠᠳᠠᠬ ᠲᠠᠯᠣ ᠶᠢᠨ ᠶᠠᠰᠣ  ᠲᠡᠷᠢᠭᠦᠳᠡᠨ ᠢ ᠣᠯᠠᠨ ᠢᠶᠠᠷ ᠵᠡᠭᠦᠵᠦ᠂ ᠲᠡᠭᠦᠨ ᠤ ᠡᠬᠢᠨ ᠳᠤ ᠶᠠᠭᠤᠮ᠎ᠠ ᠣᠬᠢᠶᠠᠬᠤ᠂ ᠬᠤᠬ ᠪᠣᠷᠳᠠᠬ ᠬᠠᠶᠠᠬᠤ᠂ ᠰᠦ  ᠴᠠᠭᠠᠨ ᠢᠳᠡᠭᠡ ᠲᠣᠰᠣᠭᠠᠬᠤ ᠵᠡᠷᠭᠡ ᠶᠢ ᠶᠡᠬᠡᠳᠡ ᠴᠡᠭᠡᠷᠯᠡᠬᠦ ᠪᠦᠭᠡᠳ ᠮᠠᠯ ᠪᠠ ᠬᠦᠮᠦᠨ ᠡᠪᠡᠳᠴᠢᠯᠡᠵᠦ ᠡᠪᠡᠳᠬᠦ  ᠲᠣᠬᠢᠶᠠᠯᠳᠣᠯ ᠳᠤ ᠷᠠᠰᠢᠶᠠᠨ ᠣᠰᠣᠨ ᠳᠤ ᠡᠯᠳᠡᠪ ᠬᠤᠷᠢᠭ᠎ᠠ ᠴᠡᠭᠡᠷ ᠲᠠᠢ ᠶᠠᠭᠤᠮ᠎ᠠ ᠣᠷᠣᠭᠤᠯᠣᠬᠰᠠᠨ ᠠᠴᠠ ᠭᠠᠵᠠᠷ  ᠣᠰᠣ ᠲᠣᠬᠰᠢᠷᠠᠯ᠎ᠠ ᠭᠡᠵᠦ ᠣᠢᠢᠯᠠᠭᠠᠳᠠᠬ ᠪᠠᠶᠢᠵᠠᠢ᠃ ᠣᠰᠣᠨ ᠳᠤ ᠰᠦ ᠴᠠᠭᠠᠨ ᠢᠳᠡᠭᠡ ᠲᠣᠰᠤᠭᠠᠬᠤ ᠶᠢ  ᠴᠡᠭᠡᠷᠯᠡᠬᠦ ᠨᠢ ᠭᠠᠵᠠᠷ ᠣᠰᠣ ᠲᠣᠬᠰᠢᠷᠠᠬᠤ ᠠᠴᠠ ᠴᠡᠭᠡᠷᠯᠡᠭᠰᠡᠨ ᠰᠠᠨᠠᠭ᠎ᠠ ᠪᠠᠶᠢᠳᠠᠬ᠃          ᠬᠤᠷᠴᠢᠨ ᠳᠤ ᠣᠷᠣᠰᠣᠮᠠᠯ ᠣᠰᠣᠨ ᠳᠤ ᠰᠢᠭᠡᠵᠦ ᠭᠠᠳᠠᠭᠠᠯᠠᠪᠠᠯ ᠡᠵᠢ ᠶᠢᠨ ᠬᠢᠨᠢ ᠬᠦᠬᠦᠨ ᠲᠡᠭᠡᠷ᠎ᠡ ᠨᠢ ᠶᠠᠷ᠎ᠠ  ᠰᠢᠷᠬ᠎ᠠ ᠭᠠᠷᠣᠨ᠎ᠠ ᠭᠡᠵᠦ ᠬᠡᠦᠬᠡᠳ ᠪᠠᠭᠠᠴᠣᠳ ᠲᠤ ᠰᠠᠨᠠᠭᠤᠯᠳᠠᠬ ᠠᠴᠠ ᠭᠠᠳᠠᠨ᠎ᠠ ᠣᠰᠣ ᠭᠤᠣᠯ ᠤᠨ ᠬᠠᠵᠠᠭᠤ ᠳᠤ  ᠡᠯᠳᠡᠪ ᠡᠰᠡᠨ ᠮᠠᠭᠤ ᠦᠭᠡ ᠶᠠᠷᠢᠵᠦ ᠪᠣᠯᠬᠤ ᠦᠭᠡᠢ᠂ ᠣᠷᠣᠰᠴᠦ ᠪᠠᠶᠢᠭ᠎ᠠ ᠣᠰᠣ ᠶᠢ ᠪᠠᠰᠣᠨ ᠶᠠᠷᠢᠪᠠᠯ ᠦᠶᠡᠷ  ᠪᠠᠭᠤᠵᠦ ᠭᠠᠮᠰᠢᠬ ᠪᠣᠯᠣᠨ᠎ᠠ ᠭᠡᠬᠦ ᠵᠡᠷᠭᠡ ᠶᠢᠨ ᠴᠡᠭᠡᠷ ᠶᠣᠰᠣ ᠪᠠᠶᠢᠳᠠᠬ ᠶᠣᠮ᠃      ᠬᠤᠷᠴᠢᠨ ᠤ ᠵᠠᠷᠢᠮ ᠭᠠᠵᠠᠷ ᠣᠷᠣᠨ ᠳᠤ ᠣᠳᠣᠬᠠᠨ ᠪᠣᠯᠳᠠᠯ᠎ᠠ ᠣᠰᠣ ᠶᠢᠨ ᠲᠠᠬᠢᠯᠭ᠎ᠠ ᠶᠢᠨ ᠬᠡᠯᠪᠡᠷᠢ ᠨᠢ  ᠪᠣᠯᠠᠬ ᠲᠠᠬᠢᠬᠤ᠂ ᠬᠤᠳᠳᠤᠬ ᠲᠠᠬᠢᠬᠤ᠂ ᠨᠠᠭᠤᠷ ᠲᠠᠬᠢᠬᠤ ᠵᠡᠷᠭᠡ ᠶᠢᠨ ᠵᠠᠩ ᠦᠢᠯᠡ ᠶᠢᠨ ᠬᠡᠯᠪᠡᠷᠢ ᠪᠠᠷ  ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃             ᠬᠤᠷᠴᠢᠨ ᠤ ᠨᠠᠭᠤᠷ ᠪᠣᠯᠠᠬ ᠲᠠᠬᠢᠬᠤ ᠵᠠᠩ ᠦᠢᠯᠡ          ᠬᠤᠷᠴᠢᠨ ᠤ ᠵᠠᠷᠢᠮ ᠭᠠᠵᠠᠷ ᠲᠤ ᠪᠣᠯᠠᠬ ᠢ ᠣᠪᠣᠭ᠎ᠠ ᠪᠣᠰᠬᠠᠨ ᠲᠠᠬᠢᠳᠠᠬ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠪᠣᠯᠠᠬ ᠲᠠᠬᠢᠵᠦ  ᠪᠠᠶᠢᠭ᠎ᠠ ᠨᠢ ᠭᠤᠣᠯᠳᠠᠭᠤ ᠪᠣᠯᠠᠬ ᠤᠨ ᠣᠰᠣᠨ ᠤ ᠡᠵᠡᠳ ᠰᠠᠬᠢᠭᠤᠰᠣ ᠶᠢ ᠪᠠᠶᠠᠷᠯᠠᠭᠤᠯᠵᠦ ᠬᠤᠷ᠎ᠠ ᠪᠣᠷᠣᠭᠠᠨ ᠢ ᠲᠡᠭᠰᠢ  ᠪᠠᠶᠢᠯᠭᠠᠨ᠂ ᠠᠳᠣᠭᠤ ᠮᠠᠯ ᠲᠠᠷᠭᠤ ᠬᠦᠴᠦ ᠲᠠᠢ ᠪᠠᠶᠢᠬᠤ ᠶᠢ ᠲᠠᠭᠠᠳᠬᠠᠬᠰᠠᠨ ᠵᠠᠩ ᠦᠢᠯᠡ ᠪᠣᠯᠣᠨ᠎ᠠ᠃  ᠭᠠᠳᠠᠰᠣ ᠶᠢᠨ ᠬᠠᠭᠤᠴᠢᠯᠠᠬᠰᠠᠨ ᠢᠶᠠᠷ᠄ ︽ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠲᠠᠪᠤᠨᠮᠣᠳᠣ ᠭᠠᠴᠠᠭ᠎ᠠ ᠶᠢᠨ  ᠴᠣᠬᠴᠢᠭᠦᠦ ᠭᠡᠳᠡᠭ ᠠᠶᠢᠯ ᠳᠤ ᠣᠷᠢᠳᠦ ᠳᠠᠭᠠᠨ ᠬᠤᠶᠠᠷ ᠶᠡᠭᠡ ᠮᠣᠳᠣᠨ ᠲᠦᠡᠭ ᠪᠠᠶᠢᠵᠠᠢ᠃ ᠠᠶᠢᠯ ᠤᠨ ᠵᠡᠭᠦᠨ  ᠡᠮᠦᠨ᠎ᠡ ᠵᠠᠬ᠎ᠠ ᠳᠤ ᠪᠠᠶᠢᠭ᠎ᠠ ᠶᠢ ᠨᠢ ᠮᠡᠶᠢᠷᠡᠨ ᠲᠦᠡᠭ ᠭᠡᠵᠦ ᠨᠡᠷᠡᠯᠡᠵᠦ ᠪᠠᠶᠢᠬᠰᠠᠨ ᠶᠣᠮ᠃ ᠡᠨᠡ ᠲᠦᠡᠭ ᠤᠨ  ᠲᠣᠮᠳᠠ ᠨᠢ ᠲᠣᠯᠢ ᠰᠢᠬ ᠲᠣᠩᠭᠠᠯᠠᠬ ᠶᠡᠭᠡ ᠨᠠᠭᠤᠷ ᠲᠠᠢ ᠪᠠᠶᠢᠬᠰᠠᠨ ᠪᠦᠭᠡᠳ ᠡᠨᠡ ᠨᠠᠭᠤᠷ ᠤᠨ ᠪᠠᠷᠠᠭᠤᠨ ᠬᠤᠶᠢᠳᠦ  ᠬᠦᠪᠡᠭᠡ ᠶᠢᠨ ᠲᠣᠪᠣᠷᠬᠠᠬ ᠤᠨ ᠡᠩᠭᠡᠷ ᠠᠴᠠ ᠠᠮᠢᠳᠦ ᠪᠣᠯᠠᠬ ᠣᠷᠭᠢᠯᠵᠦ ᠡᠨᠡ ᠨᠠᠭᠤᠷ ᠲᠤ ᠣᠷᠣᠰᠣᠨ ᠣᠷᠣᠳᠠᠬ  ᠪᠠᠶᠢᠬᠰᠠᠨ ᠶᠣᠮ᠃ ᠨᠠᠭᠤᠷ ᠤᠨ ᠲᠣᠮᠳᠠ ᠨᠢ ᠣᠰᠣ ᠭᠦᠨ ᠪᠣᠯᠬᠤᠷ ᠡᠪᠡᠰᠦ ᠣᠷᠭᠤᠮᠠᠯ ᠣᠷᠭᠤᠳᠠᠬ ᠦᠭᠡᠢ᠂  ᠬᠠᠷᠢᠨ ᠬᠦᠪᠡᠭᠡ ᠵᠠᠬ᠎ᠠ ᠪᠠᠷ ᠨᠢ ᠬᠤᠯᠣᠰᠣ ᠵᠡᠭᠡᠰᠦ᠂ ᠮᠣᠳᠣ ᠪᠣᠷᠭᠠᠰᠣ ᠢᠬᠴᠦᠷᠠᠨ ᠣᠷᠭᠤᠭᠠᠳ ᠨᠡᠳᠦ᠋ᠢᠨ  ᠬᠠᠷᠠᠯᠠᠵᠦ᠂ ᠣᠨᠢᠶᠠᠷ ᠬᠦᠳᠡᠩ ᠲᠠᠳᠠᠭᠠᠳ ᠲᠣᠩ ᠰᠦᠷ ᠲᠠᠢ ᠪᠠᠶᠢᠳᠠᠬ᠃ ᠡᠨᠡ ᠨᠠᠭᠤᠷ ᠤᠨ ᠵᠡᠬᠦᠨ ᠲᠣᠪᠣᠷᠬᠠᠬ  ᠲᠡᠭᠡᠷ᠎ᠡ ︿ᠴᠣᠬᠤᠷ ᠬᠠᠯᠬ᠎ᠠ﹀ ᠶᠢᠨ ᠬᠤᠰᠢᠭᠤᠨ ᠤ ᠮᠠᠶᠢᠷᠡᠨ ᠨᠣᠳᠣᠬᠯᠠᠵᠦ ᠪᠠᠶᠢᠬᠰᠠᠨ ᠠᠴᠠ ᠡᠨᠡ ᠬᠦ ᠭᠠᠵᠠᠷ ᠢ  ᠮᠡᠶᠢᠷᠡᠨ ᠲᠦᠡᠭ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠶᠣᠮ᠃ ᠮᠡᠶᠢᠷᠡᠨ ᠨᠣᠶᠠᠨ ᠠᠴᠠ ᠡᠨᠡ ᠨᠠᠭᠤᠷ ᠪᠠ ᠠᠮᠢᠳᠦ ᠪᠣᠯᠠᠬ ᠢ ᠠᠮᠢᠯᠠᠨ  ᠲᠠᠬᠢᠵᠦ ᠨᠠᠭᠤᠷ ᠤᠨ ᠲᠡᠷᠭᠡᠳᠡ ᠡᠬᠡᠨᠡᠷ ᠪᠦᠰᠡᠭᠦ᠋ᠢᠴᠣᠳ ᠤᠨ ᠣᠴᠢᠬᠤ ᠶᠢ ᠴᠡᠭᠡᠷᠯᠡᠭᠦᠯᠵᠦ ᠪᠠᠶᠢᠪᠠ᠃ ᠡᠨᠡ ᠪᠣᠯᠠᠬ  ᠪᠠ ᠨᠠᠭᠤᠷ ᠤᠨ ᠣᠰᠣ ᠨᠢ ᠡᠪᠦᠯ ᠳᠡᠭᠡᠨ ᠴᠦ ᠬᠦᠯᠳᠡᠬᠦ ᠦᠭᠡᠢ ᠪᠣᠯᠬᠤᠷ ᠪᠣᠯᠠᠬ ᠢ ︿ᠠᠮᠢᠳᠦ ᠪᠣᠯᠠᠬ﹀ ᠭᠡᠵᠦ  ᠨᠡᠷᠡᠯᠡᠭᠰᠡᠨ ᠶᠣᠮ᠃ ᠰᠣᠨᠣᠰᠣᠯᠳᠠ ᠪᠠᠷ ᠮᠡᠶᠢᠷᠡᠨ ᠨᠣᠶᠠᠨ ᠠᠴᠠ ᠠᠮᠢᠳᠦ ᠪᠣᠯᠠᠬ ᠤᠨ ᠢᠶᠠᠨ ᠬᠠᠵᠠᠭᠤ ᠳᠤ ᠵᠢᠵᠢᠭᠬᠡᠨ  ᠴᠢᠯᠠᠭᠤᠨ ᠣᠪᠣᠭ᠎ᠠ ᠪᠣᠰᠬᠠᠵᠦ ᠪᠣᠷᠭᠠᠰᠣ ᠮᠣᠳᠣ ᠪᠠᠷ ᠴᠢᠮᠡᠵᠦ᠂ ᠡᠮᠦᠨ᠎ᠡ ᠨᠢ ᠢᠳᠡᠭᠡ ᠵᠢᠮᠢᠰ ᠦᠷᠦᠵᠦ᠂ ᠴᠢᠯᠠᠭᠤᠨ  ᠶᠡᠨᠳᠡᠷ ᠵᠣᠬᠢᠶᠠᠵᠦ ᠵᠠᠰᠠᠭᠠᠳ ᠨᠠᠭᠤᠷ ᠪᠠ ᠪᠣᠯᠠᠬ ᠢᠶᠠᠨ ᠲᠠᠬᠢᠳᠠᠬ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠡᠨᠡ ᠬᠦ ᠨᠠᠭᠤᠷ ᠪᠣᠯᠣᠨ  ᠪᠣᠯᠠᠬ ᠢᠶᠠᠨ ᠲᠠᠬᠢᠬᠤ ᠳᠠᠭᠠᠨ ᠣᠷᠢᠳᠠ ᠡᠳᠦᠷ ᠨᠢ ᠮᠡᠶᠢᠷᠡᠨ ᠨᠣᠶᠠᠨ ᠠᠴᠠ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠠᠯᠪᠠᠳᠦ ᠪᠠᠨ  ᠲᠠᠭᠠᠭᠤᠯᠵᠦ ᠪᠣᠯᠠᠬ ᠤᠨ ᠲᠡᠷᠭᠡᠳᠡ ᠣᠴᠢᠵᠦ ᠵᠢᠵᠢᠭ ᠣᠪᠣᠭ᠎ᠠ ᠪᠠᠨ ᠵᠠᠰᠠᠵᠦ ᠴᠢᠮᠡᠭᠡᠳ ᠰᠠᠩ ᠣᠭᠤᠬᠢᠭᠤᠯᠣᠨ᠂  ᠬᠠᠵᠠᠭᠤᠳᠠᠬᠢ ᠵᠢᠵᠢᠭ ᠮᠣᠳᠣᠨ ᠲᠡᠭᠡᠷ᠎ᠡ ᠨᠢ ᠬᠠᠳᠠᠬ ᠰᠠᠮᠪᠠᠢ ᠡᠯᠭᠦᠵᠦ ᠲᠠᠬᠢᠯᠭ᠎ᠠ ᠶᠢᠨ ᠪᠡᠯᠡᠳᠭᠡᠯ ᠠᠵᠢᠯ ᠢᠶᠠᠨ  ᠬᠢᠳᠡᠭ ᠪᠠᠶᠢᠵᠠᠢ᠃ ᠪᠣᠯᠠᠬ ᠲᠠᠬᠢᠬᠤ ᠡᠳᠦᠷ ᠪᠣᠯᠬᠤ ᠪᠠᠷ ᠣᠢᠢᠷ᠎ᠠ ᠣᠷᠴᠢᠮ ᠤᠨ ᠠᠶᠢᠯ ᠣᠰᠣᠨ ᠤ ᠬᠢᠨᠢ ᠢᠷᠡᠵᠦ  ᠪᠣᠯᠠᠬ ᠲᠠᠬᠢᠬᠤ ᠳᠤ ᠣᠷᠣᠯᠴᠠᠳᠠᠬ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠮᠡᠶᠢᠷᠡᠨ ᠨᠣᠶᠠᠨ ᠠᠴᠠ ᠬᠦᠵᠢ ᠠᠰᠠᠭᠠᠨ ᠰᠦᠨ ᠰᠠᠴᠣᠯᠢ  ᠡᠷᠭᠦᠵᠦ ᠠᠷᠢᠬᠢ ᠴᠠᠭᠠᠨ ᠢᠳᠡᠭᠡ ᠲᠡᠷᠢᠭᠦᠳᠡᠨ ᠢ ᠵᠢᠵᠢᠭ ᠣᠪᠣᠭ᠎ᠠ ᠶᠢᠨ ᠶᠡᠨᠳᠡᠷ ᠲᠡᠭᠡᠷ᠎ᠡ ᠦᠷᠦᠵᠦ ᠲᠠᠯᠪᠢᠭᠠᠳ  ᠪᠣᠯᠠᠬ ᠲᠠᠭᠠᠨ ᠨᠠᠮᠠᠨᠴᠢᠯᠠᠨ ᠮᠦᠷᠭᠦᠬᠦ ᠳᠤ ᠠᠶᠢᠯ ᠤᠨ ᠣᠯᠠᠨ ᠢᠶᠠᠷ ᠢᠶᠠᠨ ᠪᠣᠯᠠᠬ ᠤᠨ ᠲᠣᠩᠭᠠᠯᠠᠬ ᠣᠰᠣ ᠶᠢ ᠷᠠᠰᠢᠶᠠᠨ  ᠪᠣᠯᠭᠠᠠ ᠣᠣᠭᠤᠵᠦ ᠪᠣᠯᠠᠬ ᠤᠨ ᠣᠰᠣ ᠶᠢ ᠮᠠᠩᠨᠠᠢ ᠳᠠᠭᠠᠨ ᠲᠦᠷᠬᠢᠳᠡᠭ ᠪᠠᠶᠢᠵᠠᠢ᠃ ᠪᠠᠰᠠ ᠵᠠᠷᠢᠮ ᠵᠢᠯ ᠳᠡᠭᠡᠨ ᠪᠣᠯᠠᠬ  ᠲᠠᠬᠢᠬᠰᠠᠨ ᠨᠠᠶᠢᠷ ᠨᠠᠭᠠᠳᠣᠮ ᠶᠠᠪᠣᠬᠳᠠᠭᠤᠯᠳᠠᠬ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠬᠤᠷᠴᠢᠨ ᠳᠤ ᠪᠣᠯᠠᠬ ᠤᠨ ᠣᠰᠣᠨ ᠳᠤ  ᠡᠮᠡᠭᠳᠡᠢ ᠬᠦᠮᠦᠨ ᠣᠷᠣᠵᠦ ᠪᠡᠶ᠎ᠡ ᠣᠬᠢᠶᠠᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠶᠣᠰᠣ ᠪᠠᠶᠢᠳᠠᠬ᠃ ᠰᠣᠨᠣᠰᠣᠯᠳᠠ ᠪᠠᠷ ᠰᠣᠶᠣᠯ ᠤᠨ  ᠶᠡᠭᠡ ᠬᠤᠪᠢᠰᠬᠠᠯ ᠤᠨ ᠦᠶ᠎ᠡ ᠳᠤ ᠮᠠᠶᠢᠷᠠᠨ ᠨᠣᠶᠠᠨ ᠤ ᠲᠠᠬᠢᠵᠦ ᠪᠠᠶᠢᠬᠰᠠᠨ ᠠᠮᠢᠳᠦ ᠪᠣᠯᠠᠬ ᠤᠨ ᠣᠰᠣᠨ ᠳᠤ ᠨᠢᠭᠡᠨ  ᠡᠮᠡᠭᠳᠡᠢ ᠰᠦᠨᠢ ᠪᠠᠷ ᠣᠷᠣᠵᠦ ᠣᠮᠪᠠᠭᠠᠳ ᠲᠣᠳᠣᠷ ᠬᠤᠪᠴᠠᠰᠣ ᠪᠠᠨ ᠣᠬᠢᠶᠠᠬᠰᠠᠨ ᠠᠴᠠ ᠪᠣᠯᠵᠦ ᠠᠮᠢᠳᠦ ᠪᠣᠯᠠᠬ  ᠰᠣᠬᠤᠷᠠᠯ᠎ᠠ ᠭᠡᠵᠦ ᠨᠣᠳᠤᠬ ᠤᠨ ᠨᠠᠰᠣᠳᠠᠶᠢᠴᠣᠣᠯ ᠠᠴᠠ ᠣᠳᠣᠬᠠᠨ ᠪᠣᠯᠳᠠᠯ᠎ᠠ ᠨᠡᠷ᠎ᠠ ᠲᠠᠢ ᠵᠢᠰᠣ ᠲᠠᠢ ᠨᠢ  ᠬᠠᠭᠤᠴᠢᠯᠠᠨ ᠶᠠᠷᠢᠬᠠᠰᠠᠭᠠᠷ ᠪᠠᠶᠢᠨ᠎ᠠ︾ ᠭᠡᠵᠡᠢ᠃          ᠨᠠᠭᠤᠷ ᠪᠣᠯᠠᠬ ᠢ ᠲᠠᠬᠢᠬᠤ ᠳᠠᠭᠠᠨ ᠠᠯᠠᠰᠢ ᠭᠠᠷᠭᠠᠨ ᠰᠢᠭᠦᠰᠦ ᠲᠠᠯᠪᠢᠳᠠᠬ ᠦᠭᠡᠢ ᠭᠡᠳᠡᠭ᠃ ᠬᠠᠷᠢᠨ ᠴᠠᠭᠠᠨ  ᠢᠳᠡᠭᠡᠨ ᠤ ᠵᠦᠢᠯ ᠢ ᠨᠠᠭᠤᠷ ᠪᠣᠯᠠᠬ ᠲᠤ ᠡᠷᠭᠦᠨ ᠰᠡᠷᠵᠢᠮᠯᠡᠵᠦ ᠪᠣᠷᠣᠭᠠᠨ ᠬᠤᠷ᠎ᠠ ᠬᠦᠰᠡᠵᠦ ᠪᠠᠶᠢᠭ᠎ᠠ ᠰᠡᠳᠭᠢᠯᠭᠡ ᠪᠠᠨ  ᠢᠯᠡᠷᠡᠭᠦᠯᠵᠦ ᠪᠣᠷᠣᠭᠠᠨ ᠣᠷᠣᠭᠤᠯᠵᠦ ᠦᠭᠬᠦ ᠶᠢ ᠬᠦᠰᠡᠮᠵᠢᠯᠡᠨ ᠲᠠᠭᠠᠳᠬᠠᠳᠠᠬ ᠪᠠᠶᠢᠵᠠᠢ᠃ ᠡᠨᠠ ᠬᠦ ᠲᠠᠬᠢᠯᠭ᠎ᠠ ᠠᠴᠠ  ᠭᠠᠳᠠᠨ᠎ᠠ ᠬᠤᠷᠴᠢᠨ ᠨᠣᠳᠤᠬ ᠲᠤ ᠪᠠᠰᠠ ︽ᠬᠡᠳᠦᠨ ᠬᠤᠳᠠ ᠠᠶᠢᠯ ᠤᠨ ᠡᠷᠦᠬᠡ ᠪᠦᠷᠢ ᠶᠢᠨ ᠡᠷᠡᠭᠳᠡᠶᠢᠴᠣᠳ ᠪᠠᠶᠠᠨ  ᠶᠠᠳᠠᠭᠤ ᠭᠡᠵᠦ ᠢᠯᠭᠠᠯ ᠦᠭᠡᠢ ᠪᠣᠯᠠᠬ ᠨᠠᠭᠤᠷ ᠤᠨ ᠬᠠᠵᠠᠭᠤ ᠳᠤ ᠴᠣᠬᠯᠠᠷᠠᠯᠳᠣᠵᠦ ᠲᠣᠯᠣᠭᠠᠢ ᠳᠠᠭᠠᠨ ᠨᠠᠶᠢᠯᠵᠠᠭᠤᠷ  ᠪᠣᠷᠭᠠᠰᠣᠨ ᠴᠠᠭᠠᠷᠢᠬ ᠣᠬᠯᠠᠵᠦ᠂ ᠲᠡᠭᠡᠳᠦ ᠪᠡᠶ᠎ᠡ ᠪᠠᠨ ᠨᠢᠴᠦᠭᠦᠯᠡᠵᠦ᠂ ᠰᠢᠷᠬᠤᠨᠠᠬ ᠢᠶᠠᠨ ᠰᠢᠭᠤᠵᠦ᠂ ᠬᠦᠯ  ᠨᠢᠴᠦᠭᠦᠨ ᠢᠶᠠᠷ ᠬᠦᠷᠢᠶ᠎ᠡ ᠲᠠᠳᠠᠨ ᠴᠣᠪᠣᠷᠠᠵᠦ ᠲᠡᠷᠢᠭᠦᠯᠡᠬᠦ ᠬᠦᠮᠦᠨ ᠨᠢ ᠣᠷᠠᠯᠢᠬ ᠦᠭᠡ ᠪᠠᠷ ᠣᠶᠠᠩᠭᠠᠯᠠᠨ  ᠲᠠᠭᠤᠯᠠᠵᠦ᠂ ᠣᠯᠠᠨ ᠢᠶᠠᠷ ᠢᠶᠠᠨ ᠲᠠᠭᠠᠵᠦ ᠠᠶᠠᠯᠭᠤᠯᠣᠨ ᠣᠰᠣ ᠶᠢ ᠪᠡᠶ᠎ᠡ ᠪᠡᠶ᠎ᠡ ᠲᠡᠭᠡᠷ᠎ᠡ ᠪᠠᠨ ᠰᠠᠴᠣᠵᠦ᠂ ︿ ᠪᠣᠷᠣᠭᠠᠨ ᠣᠷᠣᠯ᠎ᠠ︕﹀ ︿ᠭᠠᠨᠭ᠌ ᠬᠠᠭᠠᠷᠠᠵᠠᠢ﹀ ᠭᠡᠵᠦ ᠪᠡᠯᠭᠡᠳᠡᠨ ᠣᠷᠠᠶᠢᠯᠠᠵᠦ ᠪᠠᠶᠠᠷᠯᠠᠨ ᠲᠡᠪᠭᠡᠴᠡᠳᠡᠭ︾ ᠭᠡᠵᠦ  ︽ᠬᠤᠷᠴᠢᠨ ᠤ ᠵᠠᠩ ᠦᠢᠯᠡ︾ ᠭᠡᠬᠦ ᠨᠣᠮ ᠳᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠨ᠎ᠠ᠃ ᠪᠠᠰᠠ ᠵᠠᠷᠢᠮ ᠨᠣᠮ ᠪᠢᠴᠢᠭ ᠲᠠᠬᠢ  ᠲᠡᠮᠳᠡᠭᠯᠡᠯ ᠢ ᠦᠨᠳᠦᠰᠦᠯᠡᠪᠡᠯ ᠭᠤᠣᠯ ᠭᠤᠷᠤᠬ᠎ᠠ ᠶᠢ ᠴᠦ ᠡᠶᠢᠮᠦᠷᠬᠦᠤ ᠬᠡᠯᠪᠡᠷᠢ ᠪᠠᠷ ᠲᠠᠬᠢᠵᠦ ᠪᠠᠶᠢᠬᠰᠠᠨ ᠪᠠᠶᠢᠳᠠᠯ ᠪᠣᠢ  ᠃          ᠵᠠᠷᠢᠮ ᠭᠠᠵᠠᠷ ᠪᠣᠯᠠᠬ ᠢ ᠪᠠᠰᠠ ᠱᠠᠩ ᠪᠣᠰᠬᠠᠨ ᠪᠢᠳᠡᠭᠦᠮᠵᠢᠯᠡᠨ ᠲᠠᠷᠣᠬᠤ ᠬᠡᠯᠪᠡᠷᠢ ᠪᠠᠷ ᠴᠦ ᠲᠠᠬᠢᠵᠦ ᠪᠠᠶᠢᠵᠠᠢ  ᠃ ᠣᠷᠳᠣᠰ ᠤᠨ ᠲᠣᠮᠤᠬ ᠲᠤ᠄ ︽ᠲᠣᠭᠤᠭ᠎ᠠ ᠪᠣᠯᠠᠬ ᠭᠡᠭᠴᠢ ᠭᠦᠨ ᠪᠣᠯᠠᠬ ᠲᠤ ᠴᠢᠩᠬᠢᠰ ᠤᠨ ᠬᠡᠭᠦᠷ ᠢ ᠲᠡᠭᠡᠭᠡᠵᠦ  ᠶᠠᠪᠣᠵᠦ ᠪᠠᠶᠢᠬᠰᠠᠨ ᠲᠡᠷᠭᠡ ᠰᠢᠪᠠᠷᠳᠠᠬᠰᠠᠨ ᠶᠣᠮ ᠭᠡᠨ᠎ᠡ᠃ ᠲᠡᠷᠡ ᠦᠶ᠎ᠡ ᠳᠤ ᠪᠠᠰᠠ ᠨᠢᠭᠡ ᠵᠦᠢᠯ ᠤᠨ ᠶᠠᠭᠤᠮ᠎ᠠ ᠶᠢ  ᠲᠡᠷᠡ ᠪᠣᠯᠠᠬ ᠤᠨ ᠲᠣᠳᠣᠷ᠎ᠠ ᠠᠴᠠ ᠠᠪᠴᠦ ᠭᠠᠷᠭᠠᠵᠦ ᠴᠢᠳᠠᠬᠰᠠᠨ ᠦᠭᠡᠢ ᠣᠷᠬᠢᠬᠰᠠᠨ ᠭᠡᠵᠦ ᠬᠡᠯᠡᠯᠴᠡᠳᠡᠭ︾ ᠭᠡᠵᠦ  ᠦᠭᠦᠯᠡᠵᠡᠢ᠃ ︽ᠠᠯᠳᠠᠨ ᠣᠷᠳᠣᠨ ᠤ ᠲᠠᠶᠢᠯᠭ᠎ᠠ︾ ᠳᠤ᠄ ︽ᠠᠷᠠᠳ ᠤᠨ ᠶᠠᠷᠢᠶᠠᠨ ᠳᠤ ᠴᠢᠩᠬᠢᠰ ᠢ ᠡ᠊ᠨᠳᠡ  ᠣᠡᠭᠭᠤᠯᠠᠵᠠᠢ ᠭᠡᠬᠦ ᠪᠣᠶᠣ ᠲᠣᠭᠤᠭ᠎ᠠ ᠪᠣᠯᠠᠬ ᠲᠤ ᠨᠢᠭᠡ ᠶᠠᠭᠤᠮ᠎ᠠ ᠶᠢ ᠨᠢ ᠣᠷᠬᠢᠵᠦ ᠶᠠᠪᠣᠵᠠᠢ ᠭᠡᠬᠦ ᠬᠤᠶᠠᠷ  ᠶᠠᠩᠵᠦ ᠶᠢᠨ ᠬᠡᠯᠡᠯᠭᠡ ᠪᠣᠢ︾ ᠭᠡᠵᠡᠢ᠃ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠣᠨ ᠲᠣᠮᠳᠠᠳᠦ ᠬᠤᠰᠢᠭᠤᠨ ᠤ ᠪᠦᠭᠡᠷ᠎ᠡ ᠶᠢᠨ  ᠠᠭᠤᠯᠠ ᠨᠢ ᠪᠣᠯᠠᠬ ᠤᠨ ᠲᠡᠭᠡᠷ᠎ᠡ ᠭᠤᠷᠪᠠᠨ ᠲᠣᠭᠤᠭ᠎ᠠ ᠶᠢ ᠬᠦᠮᠦᠷᠢᠭᠰᠡᠨ ᠠᠴᠠ ᠣᠷᠭᠤᠵᠦ ᠭᠠᠷᠣᠬᠰᠠᠨ ᠭᠡᠳᠡᠭ  ᠲᠣᠮᠤᠬ ᠪᠣᠢ᠃ ᠡᠳᠡᠭᠡᠷ ᠲᠡᠮᠳᠡᠭᠯᠡᠯ᠂ ᠲᠣᠮᠤᠬ ᠵᠡᠷᠭᠡ ᠠᠴᠠ ᠰᠢᠨᠵᠢᠪᠡᠯ ᠪᠣᠯᠠᠬ ᠲᠤ ᠱᠠᠩ ᠪᠣᠰᠬᠠᠨ ᠪᠢᠳᠡᠭᠦᠮᠵᠢᠯᠡᠨ  ᠲᠠᠷᠣᠬᠤ ᠬᠡᠯᠪᠡᠷᠢ ᠪᠠᠷ ᠰᠢᠳᠦᠵᠦ ᠪᠠᠶᠢᠬᠰᠠᠨ ᠨᠢ ᠨᠡᠯᠢᠶᠡᠳ ᠡᠷᠳᠡ ᠦᠶ᠎ᠡ ᠠᠴᠠ ᠣᠯᠠᠮᠵᠢᠯᠠᠯ ᠲᠠᠢ ᠭᠡᠳᠡᠭ ᠢ ᠮᠡᠳᠡᠵᠦ  ᠪᠣᠯᠣᠨ᠎ᠠ᠃ ᠬᠤᠷᠴᠢᠨ ᠳᠤ ᠪᠣᠯᠠᠬ ᠤᠨ ᠣᠰᠣᠨ ᠳᠤ ᠡᠮᠡᠭᠳᠡᠢ ᠬᠦᠮᠦᠨ ᠣᠷᠣᠵᠦ ᠪᠡᠶ᠎ᠡ ᠣᠬᠢᠶᠠᠬᠤ ᠶᠢ  ᠴᠡᠭᠡᠷᠯᠡᠬᠦ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠪᠣᠯᠠᠬ᠂ ᠨᠠᠭᠤᠷ᠂ ᠣᠷᠣᠰᠬᠠᠯ ᠣᠰᠣᠨ ᠤ ᠬᠠᠵᠠᠭᠤ ᠳᠤ ᠣᠰᠣ ᠶᠢ ᠴᠢᠮᠠᠯᠠᠵᠦ  ᠬᠡᠯᠡᠭᠰᠡᠨ ᠪᠣᠶᠣ ᠬᠠᠷᠢᠶᠠᠬᠰᠠᠨ ᠮᠡᠳᠦ ᠶᠢᠨ ᠪᠡᠯᠭᠡ ᠦᠭᠡᠢ ᠦᠭᠡ ᠶᠢ ᠶᠠᠷᠢᠵᠦ ᠣᠰᠣᠨ ᠤ ᠡᠵᠡᠳ ᠰᠠᠬᠢᠭᠤᠰᠣ ᠶᠢ  ᠬᠢᠯᠢᠩᠯᠡᠭᠦᠯᠬᠦ ᠠᠴᠠ ᠴᠡᠭᠡᠷᠯᠡᠳᠡᠭ ᠲᠣᠬᠠᠢ ᠦᠯᠢᠭᠡᠷ ᠶᠠᠪᠣᠳᠠᠯ ᠤᠳ ᠠᠷᠠᠳ ᠤᠨ ᠲᠣᠮᠳᠠ ᠣᠯᠠᠨᠳᠠ ᠲᠠᠷᠬᠠᠬᠳᠠᠨ  ᠣᠯᠠᠮᠵᠢᠯᠠᠬᠳᠠᠵᠦ ᠪᠠᠶᠢᠨ᠎ᠠ᠃ ᠨᠣᠳᠤᠬ ᠤᠨ ᠪᠣᠭᠤᠷᠣᠯᠴᠣᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ᠂ ᠶᠡᠷᠡᠭᠡᠳ ᠣᠨ ᠤ ᠦᠶ᠎ᠡ ᠪᠠᠷ  ᠬᠤᠷ᠎ᠠ ᠪᠣᠷᠣᠭᠠᠨ ᠶᠡᠬᠡᠰᠴᠦ ᠡᠯᠡᠰᠦ ᠮᠠᠩᠬᠠᠨ ᠤ ᠬᠤᠳᠣᠭᠤᠷ ᠬᠤᠨᠭ᠍ᠬᠢᠯ ᠤᠳ ᠢᠶᠠᠷ ᠣᠰᠣ ᠲᠣᠨᠣᠭᠠᠳ ᠣᠯᠠᠩᠬᠢ  ᠨᠣᠳᠤᠬ ᠢᠶᠠᠷ ᠭᠦᠨ ᠭᠦᠢᠬᠡᠨ ᠨᠡᠯᠢᠶᠡᠳ ᠣᠯᠠᠨ ᠨᠠᠭᠤᠷ ᠪᠦᠷᠢᠳᠦ ᠪᠣᠢ ᠪᠣᠯᠣᠬᠰᠠᠨ ᠭᠡᠨ᠎ᠡ᠃ ᠨᠣᠳᠤᠬ ᠤᠨ ᠬᠦᠮᠦᠰ  ᠮᠠᠩᠬᠠᠨ ᠬᠤᠳᠣᠭᠤᠷ ᠲᠤ ᠲᠣᠨᠣᠬᠰᠠᠨ ᠨᠠᠭᠤᠷ ᠤᠨ ᠣᠰᠣ ᠶᠢᠨ ᠭᠦᠨ ᠠᠴᠠ ᠪᠣᠯᠭᠤᠮᠵᠢᠯᠠᠨ ᠣᠯᠠᠩᠬᠢ ᠨᠢ  ᠨᠠᠭᠤᠷ ᠲᠤ ᠣᠷᠣᠬᠤ ᠠᠴᠠ ᠪᠠᠨ ᠬᠡᠷᠰᠡᠦᠯᠡᠳᠡᠭ ᠪᠠᠶᠢᠵᠠᠢ᠃ ᠡᠨᠡ ᠦᠶᠡᠰ ᠬᠤᠯᠠ ᠭᠠᠷᠴᠦ ᠶᠡᠭᠡ ᠶᠢ ᠦᠵᠡᠭᠰᠠᠡ  ᠮᠦᠷᠳᠡᠭᠡᠨ ᠣᠮᠪᠠᠯᠳᠠ ᠳᠠᠭᠠᠨ ᠴᠦ ᠰᠠᠶᠢᠨ ᠨᠢᠭᠡᠨ ᠵᠠᠯᠠᠭᠤ ᠮᠠᠩᠬᠠᠨ ᠨᠣᠳᠤᠬ ᠲᠠᠭᠠᠨ ᠪᠣᠴᠠᠵᠦ ᠢᠷᠡᠭᠡᠳ ᠪᠠᠶᠢᠵᠠᠢ᠃  ᠲᠡᠷᠡ ᠲᠠᠭᠠᠭᠠᠴᠠ ᠳᠤ ᠲᠣᠨᠣᠬᠰᠠᠨ ᠣᠰᠣ ᠶᠢ ᠬᠠᠷᠠᠭᠠᠳ ᠬᠦᠪᠡᠭᠡᠨ ᠳᠤᠨᠢ ᠬᠦᠷᠴᠦ ᠬᠠᠵᠠᠭᠤ ᠶᠢᠨ ᠬᠦᠮᠦᠰ ᠲᠡᠭᠡᠨ ᠄  ︽ᠲᠠ ᠨᠠᠷ ᠡᠨᠡ ᠪᠠᠭ᠎ᠠ ᠱᠠᠯᠪᠠᠬ ᠣᠰᠣᠨ ᠳᠤ ᠣᠷᠣᠬᠤ ᠠᠴᠠ ᠪᠠᠰᠠ ᠶᠠᠭᠤ ᠶᠢ ᠨᠢ ᠲᠡᠳᠦᠢ ᠡᠮᠢᠶᠡᠴᠢᠬᠡᠭᠰᠡᠨ ᠪᠣᠢ ︖ ᠪᠢ ᠡᠭᠦᠨ ᠠᠴᠠ ᠴᠦ ᠠᠷᠪᠠᠨ ᠲᠠᠬᠢᠨ ᠲᠣᠮᠣ ᠣᠰᠣ ᠶᠢ ᠴᠦ ᠪᠠᠷᠳᠠᠭ᠎ᠠ ᠦᠭᠡᠢ ᠣᠮᠪᠠᠨ ᠭᠠᠷᠴᠦ ᠲᠡᠶᠢᠯᠦᠨ᠎ᠡ︾  ᠭᠡᠵᠦ ᠪᠠᠰᠣᠮᠵᠢᠯᠠᠨ ᠶᠠᠷᠢᠭᠠᠳ ᠣᠰᠣᠨ ᠳᠤ ᠦᠰᠦᠷᠦᠨ ᠣᠷᠣᠪᠠ᠃ ︽ᠪᠠᠷᠳᠠᠮ ᠳᠤ ᠰᠠᠶᠢᠨ ᠦᠭᠡᠢ ᠪᠠᠩᠵᠠᠯ ᠳᠤ  ᠲᠣᠯᠠᠭᠠᠨ ᠦᠭᠡᠢ︾ ᠭᠡᠳᠡᠭ ᠢᠶᠠᠷ ᠣᠰᠣᠨ ᠳᠤ ᠦᠰᠦᠷᠦᠭᠰᠡᠨ ᠪᠠᠷᠳᠠᠮ ᠵᠠᠯᠠᠭᠤ ᠶᠢᠨ ᠮᠠᠨᠢ ᠬᠦᠯ ᠤᠨ ᠪᠣᠯᠴᠢᠩ ᠨᠢ  ᠭᠡᠨᠡᠳᠳᠡ ᠪᠠᠷ ᠣᠷᠪᠠᠭᠠᠳ ᠲᠠᠭᠠᠭᠠᠴᠠ ᠶᠢᠨ ᠣᠰᠣ ᠪᠠᠨ ᠲᠠᠪᠠᠵᠦ ᠲᠡᠶᠢᠯᠦᠭᠰᠡᠨ ᠦᠭᠡᠢ ᠪᠠᠷ ᠣᠰᠣᠨ ᠳᠤ ᠴᠠᠴᠠᠬᠰᠠᠨ  ᠭᠡᠨ᠎ᠡ᠃ ᠪᠠᠰᠠ ᠶᠡᠷᠡᠭᠡᠳ ᠣᠨ ᠤ ᠦᠶᠡᠰ ᠲᠤ ᠮᠠᠩᠬᠠᠨ ᠨᠣᠳᠤᠬ ᠤᠨ ᠨᠢᠭᠡᠨ ᠲᠠᠷᠢᠶᠠᠴᠢᠨ ᠠᠴᠠ ᠠᠶᠢᠯ ᠳᠤ ᠭᠤᠣᠯ  ᠣᠷᠣᠰᠣᠨ ᠣᠷᠣᠭᠠᠳ ᠭᠠᠮᠰᠢᠬ ᠪᠣᠯᠬᠤ ᠠᠴᠠ ᠰᠡᠷᠭᠡᠶᠢᠯᠡᠨ ᠬᠠᠰᠢᠯᠭ᠎ᠠ ᠪᠣᠰᠬᠠᠵᠦ ᠪᠠᠶᠢᠬᠰᠠᠨ ᠬᠦᠮᠦᠰ ᠤᠨ  ᠬᠠᠵᠠᠭᠤ ᠳᠤ ᠢᠷᠡᠭᠡᠳ᠄ ︽ᠲᠠ ᠨᠠᠷ ᠶᠠᠭᠤᠨ ᠤ ᠬᠢᠨ ᠬᠠᠰᠢᠯᠭ᠎ᠠ ᠪᠣᠰᠬᠠᠭᠠᠳ ᠶᠠᠭᠠᠷᠠᠴᠢᠬᠠᠬᠰᠠᠨ ᠪᠣᠢ︖ ᠡᠨᠡ  ᠪᠠᠭ᠎ᠠ ᠭᠤᠣᠯ ᠠᠶᠢᠯ ᠢ ᠦᠶᠡᠷᠯᠡᠭᠦᠯᠬᠦ ᠪᠠᠶᠢᠳᠣᠭᠠᠢ ᠮᠢᠨᠦ ᠬᠡᠳᠦᠨ ᠮᠦ ᠭᠠᠵᠠᠷ ᠢ ᠴᠦ ᠨᠣᠷᠭᠠᠵᠦ ᠲᠡᠶᠢᠯᠬᠦ ᠦᠭᠡᠢ  ᠮᠠᠭᠠᠳ︾ ᠭᠡᠵᠦ ᠭᠤᠣᠯ ᠤᠨ ᠣᠰᠣ ᠶᠢ ᠪᠠᠰᠣᠵᠦ ᠶᠠᠷᠢᠭᠠᠳ ᠪᠣᠴᠠᠪᠠ᠃ ᠰᠦᠨᠢ ᠨᠢ ᠶᠡᠭᠡ ᠭᠤᠣᠯ ᠦᠶᠡᠷᠯᠡᠵᠦ  ᠭᠤᠣᠯ ᠤᠨ ᠣᠰᠣ ᠲᠠᠢ ᠨᠡᠶᠢᠯᠡᠭᠡᠳ ᠬᠠᠰᠢᠯᠭ᠎ᠠ ᠶᠢ ᠨᠢ ᠰᠡᠳᠡᠯᠦᠭᠡᠳ ᠪᠦᠬᠦᠢ ᠯᠡ ᠠᠶᠢᠯ ᠢ ᠣᠰᠣᠨ ᠭᠠᠮᠰᠢᠬ  ᠪᠣᠯᠭᠠᠬᠰᠠᠨ ᠭᠡᠳᠡᠭ ᠁ ᠭᠡᠬᠦ ᠮᠡᠳᠦ ᠶᠢᠨ ᠦᠯᠢᠭᠡᠷ ᠤᠳ ᠠᠶᠢᠯ ᠲᠣᠰᠬᠤᠨ ᠨᠤᠭᠤᠳ ᠢᠶᠠᠷ ᠲᠠᠷᠬᠠᠨ  ᠣᠯᠠᠮᠵᠢᠯᠠᠬᠳᠠᠬᠰᠠᠭᠠᠷ ᠪᠣᠢ᠃ ᠭᠠᠯ ᠣᠰᠣᠨ ᠤ ᠠᠶᠣᠯ ᠨᠢᠳᠦ ᠦᠭᠡᠢ ᠭᠡᠳᠡᠭ ᠢᠶᠠᠷ ᠣᠰᠣᠨ ᠤ ᠠᠪᠣᠷᠭᠤ ᠬᠦᠴᠦ ᠶᠢ  ᠡᠷᠳᠡ ᠲᠠᠨᠢᠬᠰᠠᠨ ᠬᠤᠷᠴᠢᠨᠴᠣᠳ ᠤᠨ ᠲᠣᠮᠳᠠ ︽ᠱᠠᠭ᠎ᠠ ᠶᠢᠨ ᠬᠢᠷᠢ ᠬᠦᠨ ᠱᠠᠯᠪᠠᠬ ᠤᠨ ᠣᠰᠣ ᠶᠢ ᠴᠦ ᠭᠦᠢᠬᠡᠨ  ᠭᠡᠵᠦ ᠴᠢᠮᠠᠯᠠᠵᠦ ᠪᠣᠯᠬᠤ ᠦᠭᠡᠢ᠂ ᠰᠢᠨᠠᠭ᠎ᠠ ᠶᠢᠨ ᠬᠢᠷᠢ ᠣᠰᠣ ᠴᠦ ᠠᠮᠢ ᠠᠪᠬᠤ ᠳᠤ ᠪᠠᠷᠳᠠᠭ᠎ᠠ ᠪᠠᠷ ᠭᠦᠢᠴᠡᠨ᠎ᠡ︾  ᠭᠡᠳᠡᠭ ᠬᠡᠯᠡᠯᠭᠡ ᠪᠣᠢ ᠪᠣᠯᠵᠦ ᠣᠰᠣᠨ ᠤ ᠲᠡᠷᠭᠡᠳᠡ ᠰᠠᠶᠢᠨ ᠠᠮᠠ ᠨᠡᠭᠡᠭᠡᠬᠦ ᠶᠢ ᠠᠩᠬᠠᠷᠬᠤ ᠪᠣᠯᠣᠬᠰᠠᠨ ᠶᠣᠮ᠃             ᠬᠤᠳᠳᠤᠬ ᠲᠠᠬᠢᠵᠦ ᠬᠤᠷ᠎ᠠ ᠭᠤᠶᠣᠬᠤ ᠵᠠᠩ ᠦᠢᠯᠡ          ᠴᠠᠬᠢᠯᠭᠠᠨ ᠬᠤᠳᠳᠤᠬ ᠪᠣᠶᠣ ᠲᠠᠷᠣᠭᠤᠯ ᠬᠤᠳᠳᠤᠬ ᠪᠣᠢ ᠪᠣᠯᠵᠦ ᠬᠡᠷᠡᠭᠯᠡᠭᠳᠡᠬᠦ ᠠᠴᠠ ᠡᠮᠦᠨ᠎ᠡ ᠬᠤᠷᠴᠢᠨ  ᠨᠣᠳᠤᠬ ᠤᠨ ᠠᠶᠢᠯ ᠲᠣᠰᠬᠤᠨ ᠨᠤᠭᠤᠳ ᠢᠶᠠᠷ ᠮᠠᠯᠳᠠᠮᠠᠯ ᠬᠤᠳᠳᠤᠬ ᠬᠡᠷᠡᠭᠯᠡᠵᠦ ᠪᠠᠶᠢᠬᠰᠠᠨ ᠶᠣᠮ᠃ ᠮᠠᠯᠳᠠᠮᠠᠯ  ᠬᠤᠳᠳᠤᠬ ᠨᠢ ᠬᠡᠳᠦᠨ ᠡᠷᠦᠬᠡ ᠶᠢᠨ ᠲᠣᠮᠳᠠ ᠪᠠᠨ ᠨᠢᠭᠡ ᠪᠣᠶᠣ ᠠᠶᠢᠯ ᠲᠣᠰᠬᠤᠨ ᠤ ᠲᠣᠮᠳᠠ ᠪᠠᠨ ᠬᠡᠳᠦᠬᠡᠨ  ᠪᠠᠶᠢᠬᠰᠠᠨ ᠢᠶᠠᠨ ᠡᠷᠦᠬᠡ ᠪᠦᠷᠢ ᠨᠢᠭᠡ ᠮᠠᠯᠳᠠᠮᠠᠯ ᠬᠤᠳᠳᠤᠬ ᠲᠠᠢ ᠪᠣᠯᠵᠦ ᠬᠦᠭᠵᠢᠵᠡᠢ᠃ ᠬᠤᠳᠳᠤᠬ ᠨᠢ ᠠᠶᠢᠯ  ᠲᠣᠰᠬᠤᠨ ᠤ ᠬᠤᠭᠤᠯᠠ ᠣᠮᠳᠠ ᠳᠤ ᠬᠡᠷᠡᠭᠯᠡᠬᠦ ᠣᠰᠣᠨ ᠤ ᠡᠬᠢ ᠰᠣᠷᠪᠣᠯᠵᠢ ᠶᠢ ᠬᠠᠨᠭ᠍ᠭᠠᠳᠠᠬ ᠠᠴᠠ ︽ᠬᠦᠬᠡ ᠯᠣᠣ︾ ᠬᠡᠮᠡᠨ ᠬᠦᠨᠳᠦᠳᠭᠡᠭᠳᠡᠵᠦ᠂ ᠬᠤᠳᠳᠤᠬ ᠮᠠᠯᠳᠠᠬᠤ ᠨᠢ ᠡᠷᠦᠬᠡ ᠪᠦᠷᠢ ᠶᠢᠨ ᠡᠷᠬᠡᠪᠰᠢ ᠬᠦᠢᠴᠡᠳᠭᠡᠬᠦ ᠴᠢᠬᠤᠯᠠᠲᠠᠢ  ᠠᠵᠢᠯ ᠲᠦᠷᠦᠯ ᠤᠨ ᠨᠢᠭᠡ ᠪᠣᠯᠪᠠ᠃ ᠬᠤᠳᠳᠤᠬ ᠢ ᠭᠡᠷ ᠤᠨ ᠢᠶᠠᠨ ᠲᠡᠭᠡᠷ᠎ᠡ ᠲᠠᠯ᠎ᠡ ᠳᠤ ᠮᠠᠯᠳᠠᠪᠠᠯ ᠭᠡᠷ ᠢ ᠯᠣᠣ  ᠣᠷᠢᠶᠠᠵᠦ ᠵᠣᠯ ᠪᠣᠰᠣ ᠶᠢᠨ ᠵᠣᠪᠠᠯᠠᠩ ᠢᠷᠡᠨ᠎ᠡ ᠭᠡᠵᠦ ᠬᠤᠷᠴᠢᠨᠴᠣᠳ ᠦᠵᠡᠳᠡᠭ ᠠᠴᠠ ᠭᠡᠷ ᠤᠨ ᠢᠶᠠᠨ ᠵᠡᠭᠦᠨ  ᠡᠮᠦᠨ᠎ᠡ ᠲᠠᠯ᠎ᠠ ᠳᠤ ᠬᠤᠳᠳᠤᠬ ᠮᠠᠯᠳᠠᠬᠤ ᠵᠠᠩᠰᠢᠯ ᠲᠠᠢ᠃ ᠮᠠᠯᠳᠠᠬᠰᠠᠨ ᠬᠤᠣᠠᠳᠤᠬ ᠢ ᠪᠠᠰᠠ ᠪᠦᠳᠦᠴᠡ ᠶᠢᠨ  ᠣᠨᠴᠠᠯᠢᠬ ᠢᠶᠠᠷ ᠨᠢ ᠪᠣᠷᠭᠠᠰᠣᠨ ᠬᠤᠳᠳᠤᠬ᠂ ᠬᠠᠪᠳᠠᠰᠣᠨ ᠬᠤᠳᠳᠤᠬ᠂ ᠨᠠᠢᠮᠠᠯᠵᠢᠨ ᠬᠤᠳᠳᠤᠬ᠂ ᠴᠢᠯᠠᠭᠤᠨ  ᠬᠤᠳᠳᠤᠬ ᠁ ᠭᠡᠬᠦ ᠮᠡᠳᠦ ᠪᠠᠷ ᠨᠡᠷᠡᠯᠡᠵᠦ ᠡᠵᠡᠳ ᠰᠠᠬᠢᠭᠤᠰᠣ ᠲᠠᠢ ᠭᠡᠵᠦ ᠰᠢᠳᠢᠴᠢᠯᠡᠨ ᠦᠵᠡᠳᠡᠭ ᠪᠠᠶᠢᠪᠠ᠃  ᠵᠢᠱᠢᠶᠡᠯᠡᠪᠡᠯ᠄ ᠲᠠᠪᠣᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠣᠨ ᠤ ᠦᠷᠯᠦᠭᠡ ᠡᠷᠳᠡ ᠪᠣᠰᠣᠭᠠᠳ ᠬᠤᠳᠳᠤᠬ ᠤᠨ ᠣᠰᠣ ᠶᠢ  ᠬᠠᠷᠠᠪᠠᠯ ᠨᠢᠳᠦ ᠡᠪᠡᠳᠬᠦ ᠦᠭᠡᠢ ᠪᠣᠯᠣᠨ᠎ᠠ᠂ ᠪᠠᠰᠠ ᠲᠣᠰ ᠡᠳᠦᠷ ᠬᠤᠳᠳᠤᠬ ᠤᠨ ᠣᠰᠣ ᠪᠠᠷ ᠠᠮᠠ ᠪᠠᠨ ᠭᠤᠷᠪᠠᠨᠳᠠ  ᠵᠠᠶᠢᠯᠵᠦ ᠠᠮᠰᠠᠨ ᠷᠠᠰᠢᠶᠠᠯᠠᠪᠠᠯ ᠰᠢᠳᠦ ᠴᠠᠶᠢᠷᠠᠵᠦ᠂ ᠬᠤᠳᠣᠭᠤᠳᠣ ᠭᠡᠳᠡᠰᠦ ᠶᠢᠨ ᠠᠷᠬᠠᠬ ᠬᠤᠣᠷ ᠠᠷᠢᠯᠣᠨ᠎ᠠ ᠬᠡᠮᠡᠨ  ᠦᠵᠡᠳᠡᠭ᠃          ᠬᠤᠳᠳᠤᠬ ᠨᠢ ᠬᠤᠷᠴᠢᠨᠴᠣᠳ ᠤᠨ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠣᠷᠠᠯ ᠲᠠᠢ ᠬᠠᠮᠤᠬ ᠤᠨ ᠣᠢᠢᠷᠠᠯᠴᠠᠭ᠎ᠠ ᠪᠠᠶᠢᠭ᠎ᠠ  ᠣᠰᠣᠨ ᠰᠣᠷᠪᠣᠯᠵᠢ ᠪᠣᠯᠬᠤᠷ ᠭᠠᠨᠭ᠌ ᠬᠠᠭᠰᠠᠷᠠᠭᠠᠨ ᠪᠣᠯᠬᠤ ᠬᠢᠷᠢᠨ᠎ᠡ ᠣᠯᠠᠩᠬᠢ ᠠᠶᠢᠯ ᠲᠣᠰᠬᠤᠨ ᠤ ᠬᠢᠨ ᠬᠤᠳᠳᠤᠬ  ᠲᠠᠬᠢᠵᠦ ᠪᠣᠷᠣᠭᠠᠨ ᠭᠤᠶᠣᠬᠤ ᠭᠡᠳᠡᠭ ᠵᠠᠩ ᠦᠢᠯᠡ ᠶᠢ ᠭᠦᠢᠴᠡᠳᠭᠡᠵᠦ ᠪᠠᠶᠢᠵᠠᠢ᠃ ᠡᠭᠦᠨ ᠤ ᠲᠣᠬᠠᠢ  ᠭᠠᠳᠠᠰᠣ ᠠᠴᠠ᠄ ︽ᠬᠤᠳᠳᠤᠬ ᠲᠠᠬᠢᠬᠤ ᠦᠢᠯᠡ ᠶᠢ ᠮᠠᠨ ᠤ ᠨᠣᠳᠤᠬ ᠲᠤ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠᠭᠠᠳ ᠣᠨ  ᠪᠣᠯᠳᠠᠯ᠎ᠠ ᠶᠠᠪᠣᠬᠳᠠᠭᠤᠯᠵᠦ ᠪᠠᠶᠢᠬᠰᠠᠨ ᠶᠣᠮ᠃ ᠬᠤᠳᠳᠤᠬ ᠲᠠᠬᠢᠬᠤ ᠦᠢᠯᠡ ᠶᠢ ᠣᠯᠠᠩᠬᠢ ᠳᠠᠭᠠᠨ ᠱᠠᠩᠰᠢ ᠶᠢᠨ  ᠲᠠᠬᠢᠯᠭ᠎ᠠ ᠲᠠᠢ ᠣᠶᠠᠯᠳᠣᠭᠤᠯᠣᠨ ᠶᠠᠪᠣᠬᠳᠠᠭᠤᠯᠳᠠᠬ ᠪᠠᠶᠢᠭᠰᠠᠨ ᠶᠣᠮ᠃ ᠬᠤᠳᠳᠤᠬ ᠲᠠᠬᠢᠬᠤ ᠳᠤ ᠣᠯᠠᠩᠬᠢ ᠳᠠᠭᠠᠨ  ᠡᠷᠡᠭᠳᠡᠢ ᠬᠦᠮᠦᠰ ᠣᠷᠣᠯᠴᠠᠨ᠎ᠠ᠃ ᠠᠶᠢᠯ ᠤᠨ ᠣᠯᠠᠨ ᠢᠶᠠᠷ ᠢᠶᠠᠨ ᠨᠠᠷᠠ ᠣᠨᠠᠵᠦ ᠰᠠᠷᠠ ᠭᠠᠷᠣᠬᠰᠠᠨ ᠤ ᠲᠠᠷᠠᠭ᠎ᠠ  ᠪᠣᠷᠭᠠᠰᠣᠨ ᠨᠠᠮᠠᠭ᠎ᠠ ᠪᠠᠷ ᠴᠠᠭᠠᠷᠢᠬ ᠣᠶᠠᠵᠦ᠂ ᠲᠣᠯᠣᠭᠠᠢ ᠳᠠᠭᠠᠨ ᠵᠡᠭᠦᠵᠦ᠂ ᠪᠡᠶ᠎ᠡ ᠳᠡᠭᠡᠨ ᠦᠮᠦᠳᠦ ᠯᠡ ᠡᠮᠦᠰᠦᠭᠡᠳ  ᠰᠢᠷᠬᠤᠨᠠᠬ ᠢᠶᠠᠨ ᠰᠢᠭᠤᠵᠦ ᠬᠦᠯ ᠨᠢᠴᠦᠭᠦᠨ ᠢᠶᠠᠷ ᠲᠠᠬᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠬᠤᠳᠳᠤᠬ ᠢᠶᠠᠨ ᠲᠣᠭᠤᠷᠢᠵᠦ  ᠬᠡᠯᠬᠢᠶᠡᠯᠳᠦᠨ ᠴᠣᠪᠣᠷᠠᠵᠦ᠂ ᠠᠶᠢᠯ ᠤᠨ ᠠᠬᠠᠮᠠᠳ ᠪᠣᠶᠣ ᠣᠪᠣᠭ᠎ᠠ ᠱᠠᠩᠰᠢ ᠲᠠᠬᠢᠬᠤ ᠦᠶ᠎ᠡ ᠶᠢᠨ ᠠᠬᠠᠯᠠᠬᠴᠢ ᠨᠢ  ᠲᠠᠭᠠᠭᠤᠯᠵᠦ ᠲᠠᠭᠤᠯᠠᠵᠦ ᠪᠦᠵᠢᠭᠯᠡᠳᠡᠭ ᠶᠣᠮ᠃ ᠬᠤᠷᠴᠢᠨ ᠤ ᠵᠠᠷᠢᠮ ᠭᠠᠵᠠᠷ ᠲᠤ ᠬᠤᠳᠳᠤᠬ ᠲᠠᠬᠢᠬᠤ ᠶᠢ ᠪᠠᠰᠠ ︿ ᠬᠤᠳᠳᠤᠬ ᠲᠠᠭᠤᠯᠠᠬᠤ﹀ ᠭᠡᠵᠦ ᠶᠠᠷᠢᠳᠠᠬ᠃ ᠬᠦᠮᠦᠰ ᠬᠤᠳᠳᠤᠬ ᠢᠶᠠᠨ ᠲᠣᠭᠤᠷᠢᠨ ᠲᠠᠭᠤᠯᠠᠵᠦ ᠪᠦᠵᠢᠭᠯᠡᠵᠦ  ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠬᠤᠶᠠᠷ ᠬᠦᠮᠦᠨ ᠬᠤᠪᠣᠭᠤ ᠪᠠᠷ ᠣᠰᠣ ᠲᠠᠳᠠᠵᠦ ᠲᠠᠭᠤᠯᠠᠬᠴᠢᠳ ᠤᠨ ᠲᠡᠭᠡᠷ᠎ᠡ ︿ᠪᠣᠷᠣᠭᠠᠨ  ᠣᠷᠣᠯ᠎ᠠ︕﹀ ︿ᠪᠣᠷᠣᠭᠠᠨ ᠣᠷᠣᠯ᠎ᠠ﹀ ᠭᠡᠵᠦ ᠪᠡᠯᠭᠡ ᠲᠠᠢ ᠦᠭᠡ ᠶᠠᠷᠢᠨ ᠰᠠᠴᠣᠨ᠎ᠠ᠃ ᠡᠨᠡ ᠦᠶ᠎ᠡ ᠳᠤ ᠬᠦᠮᠦᠰ ︿ ᠪᠣᠷᠣᠭᠠᠨ ᠣᠷᠣᠯ᠎ᠠ︕﹀ ︿ᠶᠡᠭᠡ ᠪᠣᠷᠣᠭᠠᠨ ᠣᠷᠣᠵᠠᠢ﹀ ᠭᠡᠵᠦ ᠬᠠᠰᠭᠢᠷᠣᠯᠳᠣᠨ ᠬᠠᠷᠢᠯᠴᠠᠨ ᠣᠰᠣ ᠰᠦᠷᠴᠢᠯᠳᠦᠨ  ᠪᠣᠷᠣᠭᠠᠨ ᠣᠷᠣᠬᠤ ᠶᠢ ᠪᠡᠯᠭᠡᠰᠢᠶᠡᠳᠡᠭ ᠶᠣᠮ︾ ᠭᠡᠵᠡᠢ᠃          ᠬᠤᠳᠳᠤᠬ ᠲᠠᠬᠢᠬᠤ ᠵᠠᠩ ᠦᠢᠯᠡ ᠨᠢ ᠦᠨᠡᠨ ᠳᠡᠭᠡᠨ ᠬᠤᠳᠳᠤᠬ ᠤᠨ ᠣᠰᠣ ᠶᠢ ᠠᠮᠢᠴᠢᠯᠠᠨ ᠦᠵᠡᠭᠰᠡᠨ  ᠰᠢᠳᠦᠯᠭᠡ ᠪᠣᠯᠣᠨ᠎ᠠ᠃ ᠲᠠᠷᠣᠢ ᠣᠰᠣ ᠶᠢ ᠰᠢᠳᠦᠵᠦ ᠪᠠᠶᠢᠭ᠎ᠠ ᠦᠵᠡᠭᠳᠡᠯ ᠤᠨ ᠨᠢᠭᠡ ᠲᠦᠷᠦᠯ ᠮᠦᠨ᠃ ᠡᠶᠢᠮᠦ ᠠᠴᠠ  ᠬᠤᠷᠴᠢᠨᠴᠣᠳ ᠤᠨ ᠲᠣᠮᠳᠠ ᠬᠤᠳᠳᠤᠬ ᠤᠨ ᠣᠰᠣᠨ ᠳᠤ ᠬᠤᠬ ᠬᠠᠶᠠᠪᠠᠯ ᠨᠢᠳᠦ ᠰᠣᠬᠤᠷᠠᠨ᠎ᠠ᠂ ᠬᠤᠳᠳᠤᠬ ᠤᠨ  ᠣᠰᠣᠨ ᠳᠤ ᠨᠢᠯᠪᠣᠪᠠᠯ ᠨᠢᠳᠦ ᠡᠪᠡᠳᠦᠨ᠎ᠡ᠂ ᠬᠤᠳᠳᠤᠬ ᠤᠨ ᠣᠰᠣᠨ ᠳᠤ ᠶᠠᠰᠣ ᠬᠠᠶᠠᠪᠠᠯ ᠡᠪᠡᠳᠴᠢᠨ ᠬᠢᠵᠢᠭ  ᠲᠡᠯᠭᠡᠷᠡᠵᠦ ᠪᠢᠳᠡᠭᠦᠦ ᠪᠡᠳᠡᠬᠢ ᠭᠠᠷᠣᠨ᠎ᠠ ᠭᠡᠬᠦ ᠮᠡᠳᠦ ᠶᠢᠨ ᠴᠡᠭᠡᠷ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ ᠬᠡᠦᠬᠡᠳ ᠬᠤᠳᠳᠤᠬ  ᠲᠣᠭᠤᠷᠢᠨ ᠣᠰᠣ ᠰᠦᠷᠴᠢᠯᠳᠦᠵᠦ ᠭᠦᠶᠦᠵᠦ ᠪᠠᠶᠢᠪᠠᠯ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠲᠡᠮᠳᠡᠭ᠂ ᠦᠬᠡᠷ ᠬᠤᠳᠳᠤᠬ  ᠲᠣᠭᠤᠷᠢᠨ ᠮᠦᠭᠡᠷᠡᠵᠦ ᠪᠠᠶᠢᠪᠠᠯ ᠠᠶᠣᠩᠭᠠᠳᠦ ᠪᠣᠷᠣᠭᠠᠨ ᠣᠷᠣᠬᠤ ᠶᠢᠨ ᠲᠡᠮᠳᠡᠭ ᠁ ᠭᠡᠬᠦ ᠮᠡᠳᠦ ᠶᠢᠨ ᠣᠴᠢᠷ  ᠶᠣᠰᠣ ᠴᠦ ᠪᠠᠶᠢᠳᠠᠬ ᠶᠣᠮ᠃          ᠬᠤᠳᠳᠤᠬ ᠲᠠᠬᠢᠵᠦ ᠪᠣᠷᠣᠭᠠᠨ ᠭᠤᠶᠣᠬᠤ ᠶᠣᠰᠣᠨ ᠪᠠ ᠨᠠᠭᠤᠷ ᠪᠣᠯᠠᠬ ᠲᠠᠬᠢᠬᠤ ᠶᠣᠰᠣ ᠨᠢ ᠬᠤᠷᠴᠢᠨ  ᠨᠣᠳᠤᠬ ᠤᠨ ᠠᠶᠢᠯ ᠲᠣᠰᠬᠤᠨ ᠤ ᠦᠪᠡᠷᠮᠢᠴᠡ ᠵᠠᠩ ᠦᠢᠯᠡ ᠪᠣᠯᠵᠦ ᠪᠠᠶᠢᠬᠰᠠᠨ ᠶᠣᠮ᠃ ᠠᠶᠢᠯ ᠲᠣᠰᠬᠤᠨ ᠤ  ᠴᠡᠴᠡᠭᠯᠡᠯᠳᠡ ᠬᠦᠭᠵᠢᠯᠳᠡ ᠠᠴᠠ ᠰᠢᠳᠦᠯᠭᠡ ᠪᠢᠰᠢᠷᠡᠯ ᠤᠨ ᠵᠠᠷᠢᠮ ᠵᠠᠩ ᠦᠢᠯᠡ ᠨᠢ ᠶᠠᠪᠣᠬᠤ ᠲᠣᠳᠣᠮ ᠢᠶᠠᠨ  ᠣᠷᠬᠢᠬᠳᠠᠨ ᠦᠭᠡᠷᠡᠴᠢᠯᠡᠭᠳᠡᠵᠦ ᠪᠠᠶᠢᠨ᠎ᠠ᠃ ᠭᠡᠪᠡᠴᠦ ᠡᠳᠡᠭᠡᠷ ᠵᠠᠩ ᠦᠢᠯᠡ ᠨᠢ ᠬᠤᠷᠴᠢᠨᠴᠣᠳ ᠤᠨ ᠣᠰᠣ ᠶᠢ  ᠠᠮᠢᠴᠢᠯᠠᠨ ᠰᠢᠳᠦᠭᠡᠨᠴᠢᠯᠡᠨ ᠲᠠᠬᠢᠵᠦ ᠪᠠᠶᠢᠬᠰᠠᠨ ᠤ ᠪᠣᠳᠠᠳᠦ ᠵᠢᠱᠢᠶ᠎ᠡ ᠣᠯᠠ ᠮᠦᠷ ᠪᠣᠯᠣᠨ ᠣᠳᠣ ᠳᠤ ᠲᠣᠯᠳᠠᠯ᠎ᠠ  ᠦᠯᠡᠳᠡᠵᠡᠢ᠃  
  
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠬᠤᠲᠠ ᠶᠢᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠤᠨ ᠤ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠱᠠᠩᠰᠢ ᠶᠢᠨ ᠰᠢᠳᠦᠯᠭᠡ
ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠣᠰᠣ ᠪᠠ ᠯᠣᠣᠰ ᠤᠨ ᠰᠢᠳᠦᠯᠭᠡ ︵ᠳᠣᠣᠷᠠᠳᠤ︶
ᠭᠦᠷᠢᠶ᠎ᠡ ᠬᠤᠰᠢᠭᠤ
ᠡᠬᠢ ᠶᠦᠭᠡᠨ ᠪᠠᠳᠠᠷᠠᠭᠤᠯᠤᠭᠴᠢ ᠬᠡᠶᠢᠳ
ᠪᠣᠶᠠᠨ ᠪᠠᠷᠢᠯᠳᠣᠭᠤᠯᠣᠭᠴᠢ ᠬᠡᠶᠢᠳ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号